¹ 1Paulu, ngamba ya Kalunga na kapostolu ua Yesu Kilistu ngue ku kutcelela kua vaye va na hangula Kalunga na kudhivuka vuchili vuye vuliya na Kalunga, ² mu ku tatelela muono ua Kalunga uye ku ue kuhua, uye ke ku kuitha, uye ua tcelelethele kulutue lua myaka yoshe. ³ Ha ntcimbu ya yingulu ua lekethele lijui lyendi mukuambulula mudhimbu uye uva nji tcelelela ngue mua njishika Kalunga Muovole uange. ⁴ Kuli Titu, munange ua mungulu mu lutcelelo luetu kumo. Ngodhi na chivovo cha Kalunga Yishe ya Kilistu Yesu Muovole uetu. ⁵ Muomu lyevi nja ku thililile ku Keleta, linga u vuayethe vyuma viye nolo vi chihue na kuvuavuetha vakuluntu munkala limbo lya kama ngue munja ku leka. ⁶ Mukuluntu ayeneke kumu uana mulonga, na lyala ua kuambata mukentu umo, navana vaka kutcelela vakevo kuve kuvatumbula vaka kuyeneka vishoti ndi kuyeneka kuononoka. ⁷ Mukuluntu ua chikungulukilo ayeneke mulonga, omo yikeye apanga vipanga vya Kalunga. Keti akale navutha, keti akale na vukalu vua vuathi, keti akale muka kupenda vinyu, keti akale muka kupupa na lifuua lya ngocho. ⁸ Ua kakateya lijui liye lya chili lya litavathano na viye vituambulula, atha kumamuna na mudhimbu uye ua vungulu na kupayetha vaka kuvyana. ⁹ A kakatele ku majui a chili ava longethele, linga a mamune vakuavo vilongetha vya vungulu na ku vuayetha vaye va mu vyana. ¹⁰ Muomu kuli vaka vimpata vavengi, vaka kuhandeka ngocho nava ka ku kuithakuitha, muakama vaka kulovola. ¹¹ Vana pande ku va vindika. Va tanganetha vinjivo vyoshe mu ku longetha viye kuvya fuililile vya shuama ya ngocho. ¹² Kapolofeto umo uavo na kuanya nguendi, ''Vaka Keleta va kuitha ngocho, tuthitu tua kuvihya, na vilenda vya litcita.'' ¹³ Vumbangi ovu vua chili. Keho honi,va vuayethe vuino-vuino, linga va kale na vungulu mu lutcelelo luavo, ¹⁴ keti va tolile vithimo vya vaYundeya nambe mashiko a vantu vaye va thembulula vungulu. ¹⁵ Kuli va ka kuyela, vyuma vyoshe vya yela. Vuno kuli va ka kuvihya na vimpata, vyahi ko vya yela, vuno mana avo voshe na vithinganyeka vyavo vya juala. ¹⁶ Avo va li tava nguavo va dhivuka Kalunga, vuno va mu vyana na vipanga vyavo. Avo va ku vihya, va thina, kuve ku panga vyuma vya chili.