¹ Paulu na Timoteo, vangamba va Kilistu Yesu, kuli voshe vaka kuyela muli Kilistu Yesu vaye vali mu Filipu, hamo na vakuluntu na va ndyakunu. ² Kavumbi kakale neni na chivovo cha Kalunga Tata yetu na Muene Yesu Kilistu. ³ Njishangala kuli Kalunga kange hoshe hanji mi vulukila, ⁴ ntcimbu yoshe mu vilombela vyange muomu yeni voshe, nje ku lomba na kuyolela ⁵ muomu kuli kuata kueni mu ku shuenethako ku lutue vinkanda vya chili kutunda ku litangua lya kutameka noho lelo. ⁶ Munja tcelela nguange uye na shangumukile vipanga vya ku vuaha muli yeni aka yanguluka na ku litangua olyo lya Kilistu Yesu. ⁷ Ngue muana vuaha vene kuli yange kuthinganyeka ngocho muomu yeni voshe, muomu njili neni mumbunge, muomu njili muma lyenge na muku hakuila na mu ku koletha vinkanda vya chili yeni voshe muna tambula hamo nange ku kavumbi. ⁸ Muomu Kalunga yikeye mukaleho uange, muomu vi ntcimbu vingahi muomu yeni muva voshe chidhango cha chi votci cha Kilistu Yesu. ⁹ oku ku kekuo ku lombela kuange: ngechiye vaka chidhango veni linga vakakateye mua muingi na mu mana oshe, ¹⁰ linga muye mo muvitambula viye vya kuvuaha, na yikeye linga akale na ku yeneka mulonga noho ha litangua lya Kilistu, ¹¹ shulitheni na vushuka vua kutcelela kuye kukenja kuli Yesu Kilistu ku vungulu na kushangala Kalunga. ¹² Ngechi njiyongola yeni mudhivuke, vamuna nana, vika vya yombolokele kuli yange vuchili njipange mudhimbu uachili. ¹³ Ngue vya ku uanamo, malyenge ange muli Kilistu vyedhile kumutanya. ¹⁴ Keho vamuna nana vavengi vali muli Muene muomu lya malyenge ange, na kutuvakana kukanyama mu kuambula lijui lya Kalunga na lyova lyahi. ¹⁵ Vamo chili vambula Kilistu omo kuliveya na vimpata, na vamo lalo na liyango lya chili. ¹⁶ Ava vachi panga omo chidhango, omo va dhivuke ngechiye va na njihaka mo muomu mukuohyela mudhimbu ua chili. ¹⁷ Vuno vaye vakuavo vambulula Kilistu omo vana litepe, keti mua vungulu. Vathinganyeka kunji katuila kayando mu malyenge ange. ¹⁸ Vika honi? Evi lika Kilistu va li na ku muambuluila mueka nambe na chi vembulu ndi mu vungulu, keho omo vene njika yolela. Mukemo, nji ka yolela, ¹⁹ muomu njina dhivuka ngechiye evi vi ka panga vuovoke vuange, omo vilombelo vyeni na ku hana Mpundhi ya Yesu Kilistu. ²⁰ Ngue ku ku thetela kuange kua kama na ku tatela kuange ngechiye shuama ko yi kanji kuata, vuno na ku kanyama kuoshe ngue ntcimbu yoshe, na mualolo vene Kilistu va ka mu vaka mushangaletha mu muvila, nambe na muono ndi mu ku tca. ²¹ Muomu kuli yange mu muono muli Kilistu na ku tca tuna ku tuvakana. ²² Vuno nga muono uli muntcitu, nga vikevyo vinji hana vushuka ku vipanga muomu yange. Keho njili na vitanga mu kuhangula? ²³ Muomu njili na vitanga ha kati kevi vivali. Omo njili na chidhango kutunda hano na ku kala na Kilistu, vikevyo vili hale, ²⁴ vuno ku kala muntcitu vya nji uahela muomu vya chidhango cheni. ²⁵ Keho evi vene nguange, nji na dhivuka ngachiye nji ka kala na ku kala neni voshe, muomu kushuenetha kueni na ku yolela kuli mu ku tcelela, ²⁶ linga kuli hametha kueni mu li Kilistu Yesu muye mu nji kenja lalo. ²⁷ Vuno pangeni viye vya ku vuaha vina pande ku kala mudhimbu ua chili ua Kilistu, linga viye nambe mo njikenja kulyeni ndi mo nji na yeneka ko, nji na pande kumyuvua, mu nemana mu mpundhi yimolika, na vithinganyeka vi molika mu ku panga mu mo lika muomu lya kutcelela kua mudhimbu ua chili. ²⁸ Keti va mi teuethe mu nkala ka thingimiko kuli voshe vaye vaka vidhindo vyeni. Evi vikevyo vimuetho kuli vakevo vya ku mi tanganetha, vuno vya vuovoke vueni na vukevuo vua kuli Kalunga. ²⁹ Muomu va mi hanene vyo vya vuana muomu kuchi dhango cha Kilistu keti lika kutcelela muli yikeye, vuno lalo mu kuyanda muomu lya chidhango chendi, ³⁰ mu ku kala na chipanga chiye chimua muene muli yange, na vuno muvyuvua muli yange vene.