¹ ''Taleni, nji tuma kanganda kange, na yikeye aka vuayetha ngila kulutue lyange. Keho Muene, uye muka thetela, aka heta vuathi vuathiku tembele yendi. Kanganda ua lyuvuathano muli uye yimua yongola, taleni, endi akenja,'' muana handeka Yehova ua vimbunga. ² Vuno yiya atha ku kela litangua lya kuinja chendi? Yiya ake mana muye mua kenja? ³ Muomu endi aka kala ngue feua ya muka kutunga ntanga. Endi aka tumama ngue muka kupangula na muka kuleletha mavue aku toka achili, keho aka toketha vana va Levi. Endi aka vuayetha vakevo ngue livue lya vunchele na livue lya ku toka lya chili, keho vakevo vaka neha chikombeleyo kuli Yehova. ⁴ Keho chikombeleyo cha Yunda keho Yelusalema chika vuaha kuli Yehova, ngue ku matangua a laya, ngue ku myaka ya ku laya. ⁵ ''Keho njika mi shuena mu ku mi pangula. Keho njika kala mukaleho ua ku kuingula vaka vulodhi, na kuli vaka vukuidhi, na kuli vaye ve ku paketha ngamba ku fueto yeni, na ntuluue, na ntciua, na kuli vaye va hangetha vya muka kulishuka, keho kova nju vuila lyova, muana handeka Yehova ua vimbunga. ⁶ Muomu yange, Yehova, ku nje kualuluka; ngocho vene eni mushovo ua Yakomba, ku mua tcile. ⁷ Kutunda matangua ava yishe yeniva tengulukile ku vitume vyange keho vavi takamethele vakevo. Tenguluka kuli yange, keho njika tenguluka kuli yove,'' muana handeka Yehova ua vimbunga. ''Vuno mu handeka nguendi, 'Vati tuka tha kutenguluka?' ⁸ Muntu aka puanja vya Kalunga ndi? hanga eni muna puanja yange. Vuno eni muna handeka nguendi, 'Vati tuna puanja yove?' Ku chimo cha ku likumi na ku vikombelo. ⁹ Eni vami thinga hamo na chithingo, muomu eni muli na ku nji puanja, mushovo uoshe vene. ¹⁰ Neheni chimo choshe cha ku likumi ku chishete, linga muka kale vya kulya mu njivo yange, na ku njetheka navyo mualolo muli evi,'' muana handeka Yehova ua vimbunga, ''nga ange ka nji mishokoluela vinjanena vya muilu, na ku muanyena chivedhikitho, ngechiye ko muka kala na muhela ha ku chitambuila. ¹¹ Ko njika vindika muka ku vilya omo yeni, keho kali kenyeka vushuka vua livu lyeni, nambe muti ua vinyu ko uka lundumuitha vushuka vuauo ku mehya ntcimbu kanda.'' muana handeka Yehova ua vimbunga. ¹² ''Na vifuti vyoshe vika mi tumbula vaka ku vedhuka, muomu muka kala chifuti cha ku vyuka, muana handekele ua vimbunga. ¹³ ''Majui eni ana kulu mu ku nji panga njikole,'' muana handeka Yehova. ''Vuno eni muna handeka ngueni?' ¹⁴ Eni muna handeka ngueni, 'Vika vituna handeka hakati ketu vavenya kuli yeni ndi?' Eni muna handeka ngueni, ''Cha ngocho ku pangela Kalunga. Keho nganyo yika tuna mono mu ku takametha lishiko lyendi, nomo tu nende na ku linyenga kumesho a Yehova ua vimbunga ndi? ¹⁵ Ngocho mualolo tu tumbula vaka ku lihaletha ngue vana vedhika, chili vaye va panga vya mulonga vana litungitha, chili vetheka Kalunga, na kuovoka.'' ¹⁶ Keho vuoshe vaye vo vuililile Yehova lyova va handekele umo na mukuavo, keho Yehova ua tolililileko na ku tolilila, keho mukanda ua thinganyeka vya thonene kumesho a yikeye vya vaye vo vuila Yehova na ku thingimika lidhina lyendi. ¹⁷ Na vakevo vaka kala vange,'' muana handeka Yehova ua vi mbunga, ''Vufuko vuange vavenya, ha litangua liye nja pangele. Njika vo hyela vakevo, ngue muntu munendi uye apangela yikeye. ¹⁸ Keho vuoshe muka hiluke na ku nongongonona hakati ka vaka vungulu na vaka ku vihya, hakati kou pangela Kalunga na uye ke ku mu lemetha yikeye.