¹ Mulonga ua lijui lya Yehova kuli va Yisaleli ku livoko lya Malakia. ² ''Ange njami yonguele yeni,'' mua handekele Yehova. Vuno eni mua handekele ngueni, ''Vati ua tu yonguele yetu?'' ''Keti Esau munayina ua Yakomba ndi?'' Mua nahandeka Yehova. ''Nolo nja yonguele Yakomba, ³ vuno Esau nja mu dhindile. Mikinya yendi nja yi puithile ua ngocho, keho nja pangele kuhinga muhela ku vambanje vamu muthenge.'' ⁴ Nga Endome ua handekele, ''Tuna vihya, vuno etu tuka tenguluka na ku tunga viye vya kutca,'' Yehova ua vimbunga aka handeka nguendi, ''Vakevo kuatha vatunge, vuno njika vombila lalo hantci. Vakuavo vaka thana vakevo 'Chifuti cha vaka kuvihya' na 'Vantu vaye vana vuila Yehova vukalu ku myaka yoshe.' ⁵ Mesho eni aka mona evi, keho muka handeka ngueni, 'Yehova yikeye ua kama ku tuvakana vingamba vya Yisaleli.' ⁶ ''Mona a thingimika yishe, keho ndungo a thingimika muene uendi. Nga ange, yange Yishe, ka thingimiko kange kulihi? Nga ange nji muene, ku nji vuila lyova change chi lihi cho?'' Yehova ua handekele kuli sasendote, vaye vaka kuyengula lidhina lyange. ''Vuno eni mua handekele ngueni, 'Vati tua yenguile lidhina lyove?' ⁷ Mu kumbeleya mbolo ya ku vihya ha mutula uange. Vuno eni muka handeka ngueni, 'Vati cho etu tuna ku viyitha yove?' mu ku ngechiye chitafula cha Yehova cha ngocho. ⁸ Muye mu kombeleya ka puputua ngue chikombelo, chikecho chiye keti cha ku vihya ndi? Muye mukombeleya chilema na mavedhi, chikecho chiye keti cha ku vihya ndi? Chi hane mualolo kuli nguvulu ueni! Uka ka muya ku mbunge ndi aka kuitava ku mesho ove ndi?'' Muana handeka Yehova ua vimbunga. ⁹ Mualolo njina milombela ku mesho a Kalunga, linga atu vuile mema ku li yetu. Vuno Yehova ua vimbunga a handeka ngechiye hamo na chikombelo cha livoko lyove, aka mitava eni vamo vihanga vyeni ndi? ¹⁰ ''A, nga hakele umo hakati keni a tava ku shoka vikolo vya tembele, linga keti mu vuike tuhya ha mutula uange mu ngocho! Ka mua nji yile ku mbunge yeni,'' muana handeka Yehova ua vimbunga nguendi, ''keho ku niika tambula nkala chikombelo chitunda mu livoko lyove. ¹¹ Muomu kutunda ha ku tuhuka kua litangua na ku heta ha ku lahuka chalyo vene lidhina lyange lika kama hakati ka vaka vifuti na ku mihela yoshe vaka lumbila lidhina lyange vihemba na chikombelo cha ku yela. Muomu lidhina lyange lika neha hakati ka vaka vifuti, muana handeka Yehova ua vimbunga. ¹² ''Vuno eni muli viyitha mu mu handeka ngueni, chitafula cha Muene china vihya, na vuye vushuka vuayo, vya kulya vyacho, yikeyo vya ngocho. ¹³ Eni lalo mua handekele ngueni, 'Taleni, vikevyo ku li yandetha ngocho,' Muana handeka Yehova ua vimbunga. ''Keho muna neha chiye cha ku puanja na vindhili, na chilema ndi mavedhi; keho evi uneha ngue chikombelo. Cha nji pande ku tambula vya ngechiye ku livoko lyeni ndi?'' Muana handeka Yehova. ¹⁴ ''Vuno ua ku thinga uye muka vishaki yikeye mu vutanga vuendi ali na chidhamba , keho a lithinga na ku kombeleya kuli yange, Muene, chuma cha chipenga! Muomu ange nji Muene uakama,'' Muana handeka Yehova ua vimbuga, ''Na lidhina lyange vali thingimika hakati ka mishovo.''