¹ Thinganyeka, Yehova, vika vya yomboluele kuli yetu; Tala na ku mona ku shahuka chetu. ² Kuhinga chetu china tenguluka kuli vangendhi; vinjivo vyetu kuli vaka vifuti. ³ Yetu tu vana ntciua, va kuyeneka yishe, na vayina vetu vana kala ngue ntuluue. ⁴ Tunua mema etu mu ku fueta vimbongo, vikuni vyetu va tu landetha vyo. ⁵ Voshe vaye venja kunima yetu vali muyehi munima yetu; tuna hono keho ku tu uana ku huima. ⁶ Tuna lihana yetu vavenya kuli Yingitona kuli Asiliya ku uana vya kulya vya ku puamo. ⁷ Va tata yetu vapangele mulonga, keho vahiko, Netu tunemi milonga yavo. ⁸ Vangamba vali na ku shika yetu, keho ku kua kele umo muka ku tuovola ku livoko lyavo. ⁹ Tu uana mbolo yetu na vushonde vua myono yetu, muomu mukuale ua mu muthenge. ¹⁰ Chikanda chetu chi dhivala ngue choto cha kuochela mbolo muomu ntuima ya ku tcimika ya njala. ¹¹ Vakentu va va kuatela kundhili mu Siyono, na vana vakentu mu membo akama a Yunda. ¹² Va kulikile vimyene ku mavoko avo vavenya, na ku thingimika vihanga vya va kuluntu. ¹³ Vakuenje vambatele mavue aku lola, na vana vakuenje va shuntcukile muintci lya vikuni. ¹⁴ Na vakuluntu vana tundu ko ku chikolo cha ku membo, na vana vakuenje vanethela madhina avo. ¹⁵ Yolela ya mbunge yetu yina likela na vuchino vuetu vuna tenguluka. ¹⁶ Chilongo china u ku mitue yetu; chikele kuli yetu, muomu tuna panga mulonga! ¹⁷ Muomu echi mbunge yetu yina ledhumuka, muomu vyuma evi mesho etu ana tcitcivala ¹⁸ muomu mukinya ua Siyono una tenguluka, vambanje vendela ko. ¹⁹ Vuno yove, Yehova, uakala ku myaka yoshe, keho una tumama ha chitumamo chove cha vumuene kutunda mushovo ku mushovo. ²⁰ Vika vi ua tushuvila yetu ku myaka yoshe? Vika ua tuthila yetu ntcimbu yakama ngechiye? ²¹ Tu tengulule kuli yove vavenya, Yehova, keho tuka tenguluka. Puitha matangua etu amaha ngue alaya_ ²² vuno una tuvyana keho una kala na vukalu hamo netu muakama.