¹ Na livue lya vunchele lina kala lya ku vyadhima; vati livue lya vunchele liye lya tuvakana kuyela lina tenguluka! Mavue a njivo ya kuyela yijukuka ku mbango ya nkala ngila. ² Vana va va mala va Siyono vakele va kuetheka na livue lya vunchele lya ku vuaha, vuno mualolo vana thinganyeka ngue dhinjava dhya vuma, vipanga vya mavoko a muka kushonga! ³ Nambe vambanje vene va hana livele va muetha vana vavo, vuno muna mukentu ua vantu vange na kolo, ngue vankumbua mu limbalanda. ⁴ Na ndaka ya mbututu yi vamuetha ya kakateya ha ndakulo ya kanua kendi omo lihuila; na vanike valomba vya kulya, vuno kukua kele naumo. ⁵ Vaye va lile vya vutupe vana vihya mu vingila. Vaye voshe va dhalele vintanga vya ku venga mualolo vana kotha vintumbo vya muto. ⁶ Na milonga ya muna mukentu ua vantu una tuvakana mulonga ua Sandoma, uye uva uithilile mu kantcimbu na mavoko aku tjaleka yikeye ahi. ⁷ Vimyene vendi va yelele ngue neve, na tokele mu ku tuvakana mahini, va vengele mivila mu ku tuvakana mavue a rubi, ku vatumuna chavo cha kele ngue safila. ⁸ Vihanga vyavo vya dhivala ku tuvakana linungu; vakevo ku ve ku va dhivuka mu vingila. Chikanda chavo cha kakateya vitciha vyavo; vina kala ngue kuma ngue chiti. ⁹ Vaye va tciha na mukuale vana tuvakana vaye va tciha ku njala, vaye vombilile kuti, va ku tuva omo vaka yeneka vushuka vua kuhya. ¹⁰ Na mavoko a vakentu vaka ngodhi ana teleka vana vavo vavenya; vana kala vana vya kulya vyavo ntcimbu muye muna mukentu ua vantu vange vamu viyithile. ¹¹ Yehova na leketha vukalu vuendi vuoshe; na muanya vukalu vuendi vua ku kola. Keho na vuiki tuhya mu Siyono liye lilya mavula endi. ¹² Na vimyene vya hantci ku va tcelelele, nambe vandambo voshe va hantci va tcelelele, ngechiye muka chidhindo na chitodhi va ka kovele mu vikolo vya Yelusalema. ¹³ Vya yombolokele muomu lya milonga ya vapolofeto na ku viyitha kua vasasendote vendi vaye vana muanya maninga avaka vungulu mukati kendi. ¹⁴ Vendangana, ngue tupuputua, mu vingila. Vana juala na maninga ngechiye vantu ku vatha ku kuata ku vidhala vyavo. ¹⁵ ''Kayeni! vaka kuyeneka kutoka!'' Vantu vatambakanene kuli vakevo. ''Kayeni! Kayeni! Keti mukuate ko!'' Ngocho vendanganene; vantu va handekele hakati ka mishovo nguavo, ''Ka vaka lishukila muno lalo.'' ¹⁶ Yehova vavenya uava shanduile vakevo; endi ke ku vatala vakevo lalo. Vakevo kuva thingimikile vasasendote, keho kava thompelele ku va kuluntu. ¹⁷ Mesho etu ana hono, kutatela vukuathi vuetu vua ngocho; mu kutatelela chetu tutatelela mushovo ku uatha kuovola yetu. ¹⁸ Va shuama myanja yetu, etu ku tuendele mu vingila vyetu. Ku manethela chetu cha kele muyehi na matangua etu ali na kupua mo, ku manethela chetu chinenja. ¹⁹ Vaka ku tukava vakele na ku shatuka kutuvakana vihungu va muilu. Va tu shekuile yetu ku mikinya keho vatu tatelele mu muthenge. ²⁰ Muku ua mayulu_ etu uye umo yuva vuavethele Yehova_va mu kuatele mu vipuku vyavo; uye yitua tumbuile nguetu, ''Muintci lya muthithimba uendi tuka kala na muono hakati ka mishovo.'' ²¹ Yolela na ku yanguluka, munamukentu ua Endome, yeni vaye mua kele mu chifuti cha Uze. Vuno kuli yeni lalo nganja yika mihita; mu kanua na ku lishulula yeni vavenya vuntcelentcele. ²² Muna mukentu ua Siyono, kayando kove ka kenja ku kulenga; yikeye ka ka vuedhelela ko vundhinda vuove. Vuno muna mukentu ua Endome, yikeye aka yandetha ku vihya kuove; keho yikeye ka ka fuiki milonga yove.