¹ Na limbo liye lya kama ya kele na kushula lya vantu mualolo lina tumama lika lyalo. Yikeye nakala ngue ntuluue, nambe yendi uakama ku mishovo. Endi ua kele muene hakati ka mishovo, vuno yikeye mualolo muka ku lambula mulambu. ² Yikeye ua lilile muakama ku vutciki, na mishodhi yendi ya fuikile matama endi. Naumo uendi ua chidhango ua mu dhembelekele yikeye. Voshe vamuthamba vendi vana mutenguluka. Vakevo vana kala vaka chidhindo chendi. ³ Yunda na yi mu vundhinda kunima ka kayando na vipana vyakama. Yendi ua kele hakati ka mishovo keho ka uanene ko vu huimino. Voshe vaka kumu yandetha va muanene mu kayando. ⁴ Vingila vya Siyono vi linyenga muomu na umo uahi ue kinja ku viuano vya kama. Vikolo vyendi vyoshe vili vya ngocho. Vasasendote vendi va vakentu vali na kuyanda. Na yikeye vavenya na mono vya kushasha. ⁵ Vaka chidhindo chendi vana kala vimyene vendi; vitodhi vendi vana fuku. Yehova na mu yandetha muomu kuilana cha milonga yendi. Na vana vrendi vana kala vindhindha ku lutue lya muka chidhindo chendi. ⁶ Na ku muna mukentu ua Siyono. Vunulu vuendi vuna kala ngue vamyene vendi vaye va tenguluka ngue vantava, keho vakevo kava uanene ndhili kulutue lya muka ku vakava. ⁷ Mu matangua a kayando kendi na mapaketho endi, Yelusalema yika vulukitha vyoshe vyendi vya ku tovala viye vya kele kutunda ku matanua a kunima. Muye vantu vendi va uile mu livoko muka chitodhi, keho na umo uahi ua mu kuathele yikeye. Na vaka chidhindo vendi va mumuene na ku tcopa ku vihya kuendi. ⁸ Yelusalema na panga mulona ua kama, ngicho vene na tenguluka chuma chiye cha kuvihya. Voshe va mu thingimikile va mu yengula muomu vana mono mushengashenga uendi. Yikeye a tutumuitha muintci na ku futuluka. ⁹ Madhile endi akele ku vintana vyeni. Ka thinganyekele vya kulutue. Ngocho vene ku lahuka chendi chakomokethele. Kuye ku kua kele naumo uahi ua ku mudhembeleka yikeye. Yikeye ua tambakanene nguendi, ''Tala ku kayando kange, Yehova, muomu chitodhi na lihake ku vukama!'' ¹⁰ Muka chidhindo na haka livoko lyendi hali vyoshe vyendi vya ku vuaha. Muomu na mono nechiye mishovo yina kovela munjivo yendi ya kuyela, nambe ngocho yeni muneshikile ngechiye keti vakovele mu vikungulukilo vyove. ¹¹ Vantu vendi voshe va tutumuitha va thetela mbolo. Vakevo vana hane vyavo vya ku vuaha ku vya kulya mu ku koletha myono yavo. Mona, Yehova, keho tala yange, muomu njina vihya. ¹² Ka chethi na chimo chahi kuli yeni, eni voshe mune kuhita ko ndi? Taleni na ku mona nga kuye kuli umo ali na vuthiua ngue vuthiua vuye vuna yandethele hali yane, vua na njiyandetha navuo Yehova ku litangua lya vukalu vuendi vua ku lema. ¹³ Kutunda muilu na tumu tuhya mu vitciha vyange, keho vili na ku va tuvakana vakevo. Na tela vilyato vyange vuanda na nji futulula na nji vihisa na ku nji hombuesa litangua lyoshe. ¹⁴ Njoko ya milonga yange livoko lyendi lina yikutu kumolika. Vina kuheta ku ntcingo yange ndhili yange vana yihaka kumo lika. Yikeye napanga ndhili yange linga yishelele. Na Muene na njihele yange mu mavoko avakevo, keho ange ku njatha kuimana. ¹⁵ Na Muene a yenula voshe vamala vane vaye va njohyelele yange. Endi na nji kuluila chiuano cha kama ku thanyuona vamala vange. Na Muene na lyatangela ngue likina lya vinyu vana vakentu va Yunda. ¹⁶ Muomu vyuma evi ange nji lila, mesho ange a hita mishodhi; muomu muka dhembeleka uye ua pandele ku kolesa ku kolesa muono ali kulako na muono uange. ¹⁷ Siyono a ololola mavoko endi; kuye ku kuakele umo muka ku mu dhembeleka. Yehova neshika vya Yakomba ngechiye vaye vana mu dhengelekele vana pande ku kala vaka chidhindo chendi. Yelusalema yili hakati kavo ngue vyuma vya ku vihya. ¹⁸ Yehova yikeye muka vungulu, ngue , muomu njina vyana lishiko lyendi. Tolilileni, njina mi kandelela eni vantu voshe, na ku mona vusiua vuange. Vana vakentu vange vakuenje va nayi mu vunkuati. ¹⁹ Nja thanene vaka chidhango change, vuno vanji kuithile. Va sasendote vange na vakuluntu vange vechelele muthithimba muimbo, vuoshe va thetelele vya ku lya mu ku kolesa myono yavo. ²⁰ Tala, a Yehova, muomu njili mu kayando; mbune yane yili na kulua, na mbunge yange yina tenguluka hakati kange, muomu nji na kala muakama dhimpata. Hanja, na mukuale utciha; na mukati ka njivo muye mukemo muli kutca. ²¹ Vakevo vana nji tolilila ku linyenga change, vuno kuye ku kuakele umo muka ku njidhembeleka. Vaka chidhindo change voshe vana tolilila kayando kange, keho vakevo va yolela ngechiye vana chi panga. Una neha litangua liye li una tumbula; mualolo linga va kale ngue yange. ²² Milonga yavo yoshe yi hete ku mesho ove. Keho panga navo ngue mu una panga nange muomu lya ku vihya change. Na ku linyenga change chikecho cha chingi keho na mbunge yikeyo yina dheye.