¹ Na Muene na fuiki muna mukentu ua Siyono na lishelua mu vukalu vuendi.Yikeye nombila hantci kutunda muilu ku vuaha kua Isaleli. Yikeye ka vulukile chilyatelo chendi ha litangua lya vukalu vuendi. ² Na Muene na mini vikalo vyoshe vya Yakomba keho na nodhi yahi. Mu matangua a vukalu vuendi endi na uitha membo akama a muna mukentu ua Yunda; mu ku vi puitha mo yikeye na sheleletha hantci vumuene na ku shika kuacho. ³ Na vukalu vua kulema na vatula mbinga yoshe ya Isaleli. Na jendeka livoko lyendi lya chilyo kulutue lya chitodhi.Keho na tcimika Yakomba ngue tuhya va ku shukuma ve kulya kuoshe. ⁴ Na koko vuta vuendi vua lunkusa ngue chitodhi, ne mana na livoko lyendi lya chilyo ngue muka chidhindo. Keho na tcihi voshe va vyukilile ku lisho mu mbalaka ya muna mukentu ua Siyono; yikeye na muanya vukalu vuendi ngue tuhya. ⁵ Na Muene na kala ngue chitodhi. Yikeye na mini Isaleli. Yikeye na mini membo endi a vumuene. Yikeye na viyitha kuimana kua vindhili vyendi. Yikeye na vuedhelelela kulinyenyeta na ku lila hakati ka vana vakentu va Yunda. ⁶ Yikeye na panga ndhita ku viuano ngue lihya. Yikeye na viyitha mihela ya vikungulukilo. Yehova na panga vyoshe viuano vyakulya na Sambata linga vayivale mu Siyono, muomu yikeye na hisa voshe muene na sasendote mu vukalu vuendi. ⁷ Na Muene na vyana mutula na vyanetha muhela uendi ua kuyela. Yikeye na hana vivumbe vya mihela yendi mu mavoko a chitodhi. Vana katula kalua mu njivo ya Yehova, ngue ha litangua lya shovola lya chiuano chakama. ⁸ Yehova na thinganyeka ku viyitha chivumbe cha lyakama lya muna mukentu ua Siyono. Endi nolola chetheketho keho ka hetekele livoko lyendi ha ku viyitha chivumbe. Yikeye na panga chimpaka na chivumbe ku linyenga; vi hungumuka kumo. ⁹ Vikolo vyendi vina nyekumuka mu livu; nenyeka na ku vatuola mivelenge ya vikolo vyendi. Muene uendi na vimyene va vakentu hakati mishovo, na majui a lishiko na vupolofeto vendi ku ve ku uana chimona cha kuli Yehova. ¹⁰ Vakuluntu va muna mukentu ua Siyono va tumama hantci mu ku holoka kulu. Va nombila likungu ha mitue yavo vana lidhitika vavenya vikoveyo vya vishaku. Vana vakentu va Yelusalema vana tcikamena mitue yavo hantci. ¹¹ Mesho ange ana vulua ku mishodhi yavo; mbunge yange yimona kalua; lishuli lyange limuanya hantci muomu ku tca kua muna mukentu ua vantu vange, vanike na tumbututu mu vingila vya membo akama. ¹² Va handekele kuli vayina yavo nguavo, ''Mbuto na vinyu kuiko yili?'' Ngue vakevo va tca ngue lyala a lemana mu vingila vya membo akama, na myono yavo vana yimuanya ku ntulo ya vanaye yavo. ¹³ Vika njika mbuluila kuli yove vumbangi? Ku vika njiketheketha nove, muna mukentu ua Yelusalema? Ku vika njika ku yonguela yove, viye njikatha ku dhembeleka nove, muna mukentu ua Siyono? Na mbandu yove yikeyo yakama ngue kalunga ndonga. Yiya aka ku nguitha yove? ¹⁴ Vapolofeto veni vamuene vimona vya vishaki na vuheve. Keho ku va fukuile ku milonga yove, mu ku hiluitha vundhinda vuove, vuno muomu va hanene majui a vishaki nevi vya ku shevuitha. ¹⁵ Voshe vaye vahita ko ku ngila vaya na ku shangala mavoko avo. Va kemba na ku nenenga mitue yavo vana vakentu va Yelusalema na ku handeka nguavo, ''Eli likelyo limbo liye vantu vali lukile nguavo 'Vu tantuluke vua ku vuaha,' 'Na ku yolela kua hantci hoshe ndi'?'' ¹⁶ Vitodhi vove voshe vana kuashamena muakama milomo yavo. Vakevo va kemba na ku likuecha ku madho na ku handeka nguavo , ''Etu tuna mu mini! Eli likelyo litangua litua tatelelele! Etu tua kele na muono linga tu limone. ¹⁷ Yehova na panga viye vya thinganyekele kupanga. Yikeye na puithamo majui endi, aye eshikile mu matangua a kunima. Yikeye na kumbila yove ku yeneka ngodhi; muomu yendi netavetha chitodhi chove ku kuyolela hali yove; endi na kulitha vimbinga vya vitodhi veni. ¹⁸ Vimbunge vyavo vitambeka kuli Muene, vivumbe vya muna mukentu ua Siyono! Linga mishodhi yove yishelele ngue ndonga vutciki na mutanya. Keti uli hane yove vavenya ku kaluua kua mbunge, na mesho ove keti alile. ¹⁹ Katuka, lila mu matciki, vingileni mu ku shangumuka kua matciki! Muanya mbunge yove ngue mema kumesho a Muene. Katula mavoko ove kuli yikeye muomu lya myono ya vana vove vaye vaua na njala ku vimbango lya nkala ngila.'' ²⁰ Tala, Yehova, keho mona yiya yuna panga ngechiye. Vakentu vaka lya vushuka vuavo, na vanike vaye vuva lela? Kuatha sasendote na ka polofeto va ka tciha mu njivo ya kuyela ya Muene ndi? ²¹ Voshe mukuenje na mukuluntu va kotha ha likungu lya mu vingila. Vana vange va vakentu na vakuenje vana uu ku mukuale; Una va tcihi ku litangua lya vukalu vuove na kuyeneka ku tambula ngodhi hali vakevo. ²² Ngue ku litangua lya chiuano cha kama una thana vantu, na lyova lyange ha nkala hoshe, ha litangua lya vukalu vua Yehova na umo uahi aka shevuka ndi kuovoka; voshe nja yongola na ku valela, chitodhi change na va viyitha.