¹ Lijui lya muene kapolofeto Havakuke. ² ''Yehova, vintcimbu vingahi njika tambakane ku vakuatha, keho ku ukovuko? Nja tambakenene kuli yove, 'Muyoyo!' vuno kumu kovoka. ³ Vika unji muetha mulonga na ku tala vupuye ndi?Muomu kuenyeka na muyoyo vili kumesho ange; keho kua kala muyoyo, na ku katula vimpata. ⁴ Ngocho vene lijui lya lishiko lya kuvihya na kuovoka kuye ku tuhuka nkala ntcimbu. Muomu vaka kuvihya vana dhengeleka vaka vuchili; ngocho vuoloke vu tuhuka vua kuhenga.'' ⁵ ''Talenihakati ka vaka vifuti keho moneni na ku komoka chikomokelo chakama! Muomu nji kapanga chipanga chimo ku matangua eni ngechiye eni ku mu tcelela nambe va chileka kuli yeni. ⁶ Muomu taleni! Ange nji katula va Kalendeya_mushovo uye ua kuatha vuathi_kutuvakana mu vuihi vua hantci, mu ku fuka vikalo viye keti vyavo vavenya. ⁷ Vakevo vana hono na ku kala nalyova; kupangula chavo na vukama vuavo vi tuhuka vakevo vavenya. ⁸ Tukambe vavo lalo va tuvakana va yinge, ku tuvukana tungunga va ku chinguedhi. Ngocho vaka tukambe vavo va tunda ku laako, va tuvakana ngue chungu ashatukila ku kulya. ⁹ Vakevo voshe va nenja mu ku panga muyoyo; va taleketha vihanga vyavo kulutue krho vaka kungiya ngue musheke. ¹⁰ Ngocho vakevo vashopele muene, na kuishika lika vaka kushopa vakevo. Vana kala vaka kuyola kuli yikeye muomu vakungiya likungu lya hantci na ku vikuata. ¹¹ Keho aka hita ngue mpundhi; na ku panga mulonga na ku uana mulonga uye vene una puitha ndhili Kalunga kavo.'' ¹² ''Keti ove ua tunda ku ntcimbu yoshe kuye kulenga, Yehova Kalunga kange, muka Kuyela Umo uange? Kotu ka tca. Yehova una mutumbula yikeye muka ku pangula, keho ove, Livue, una muhaka yikeye mu ku mushungametha. ¹³ Yove muka mesho aku yela ngechiye ko uatha ku tala mulonga, keho ku uatha ku tala vupuye, vika uva talela vaye vapanga vungungu ndi? Vika uholokela omo muka milonga amina uye na mi tuvakana vungulu ndi? ¹⁴ Na ku puitha vantu ngue vantci va mu Kalunga ndonga, ngue vaye va kokava, kova kele na muka ku vashika vakevo. ¹⁵ Endi aneha voshe kuli vakevo hamo lika na malovo; endi ava kuata mu vuanda; ngocho vyukilila na ku yolela. ¹⁶ Ngocho vene endi aka kombeleya ku vuanda vuendi keho a shinga vihemba ku vuanda vuendi; muou ha vukevuo muono ueni uka hindala na vya kulya vyeni vi kelana. ¹⁷ Ngocho vene aka jukula vya mu vuanda vuendi, na ku likela kuahi ku tciha vaka vifuti ntcimbu yoshe ndi?