¹ Paulu, kapostolu ua Kilistu Yesu, ngue ku chiyongola cha Kalunga, vantu vakuyela muli Kalunga vali ku Efeso, ava vali na ku tu tcelela muli Yesu Kilistu. ² Mu Efeso, kavumbi ka kale neni na chivovo cha kutunda kuli Kalunga Tata uetu kuli Muene Yesu Kilistu. ³ Vamushangale Kalunga na Yishe ya Muene uetu Yesu Kilistu, ua tuvedhukitha na vyoshe vivedhukitho vya Mpundhi yachili mu mihela ya muilu muli Kilistu. ⁴ Kalunga uatu hanguile muli yikeye te nolo vapange mavu, linga tukale vakua kuyela, nava kua ku yeneka kahenga kumesho endi mu chidhango. ⁵ Mu chidhango Kalunga ua tu puithile ngue vana vendi kuhitila muli Yesu Kilistu, ku tuala haku shangala cha chili ku vipanga vyendi. ⁶ Kupuitha kuetu ku kala mu ku shangala kua vungulu kavumbi kendi kaye ka na tuhele yetu ka vungocho hali umo ya yongola. ⁷ Muli Yesu Kilistu tu novoka mu maninga endi na ku tuechela kuku vihitha kuetu, ngue ku vufuko vua kavumbi kendi. ⁸ Yikeye ua vuedhelela kavumbi kendi kulyetu na mana oshe linga tuidhivithe. ⁹ Kalunga na tuidhivitha vya kushueketha vya ku chidhango chendi, ku tuala kulyevi vya yonguele, nevi vya lekethele muli Kilistu, ¹⁰ na kumona ku vithinganyeka mu kushula kua ntcimbu, mu ku neha vimantu vioshe hamo, vyoshe vimantu via muilu na hano hantci, muintci lya mutue umo, nambe Kilistu. ¹¹ Muli Kilistu vana tuhangula ngue vaka kuhinga. Vatu hanguile kulutue lya ntcimbu kushuama ku vidhango vyo uye aka panga vyoshe kushuama ku chidhango chendi. ¹² Kalunga uatu hanguile vashuana linga etu, vaye vaku livanga kutcelela muli Kilistu, tuka kala vaku shangala ku vungulu vuendi. ¹³ Muli Kilistu, neni lalo, muye mu muovuile lijui lya vushunga, mudhimbu ua kuovoka cheni, muetavele muli yendi keho vami vandakanene na mpundhi yachili, yiye ya litavathano, ¹⁴ yiye yikeyo lukulahetho luetu lua kushuana noho tukawane ku kupala mpundu, kuvishangala vya kavumbi kendi. ¹⁵ Mukemuo ange kutunda honjovuile vyaku tuala ku kutcelela cheni muli Muene Yesu na mu kuyongola chendi kuvantu voshe vakuyela vaKalunga. ¹⁶ Ko nja likelele kumi shangala kuli Kalunga muku mitumbula na mu kulomba kuange. ¹⁷ Njilomba ngachiye Kalunga ua Muene uetu Yesu Kilistu, Yishe ya vungulu ami hana Mpundhi yamana na kuyombolola mu mana endi. ¹⁸ Njilomba ngachiye nguange mesho a vimbunge vyeni linga atue cheke, ngue mu muna dhivuka ku tcelela cha uye uami tuamenene muhete ku vungulu vua kuhinga kuendi muli vantu vendi va kuyela. ¹⁹ Muvi lombelo vyange njina milombela mudhivuke ndhili yendi yakama kuli yetu, vakua kutava kutuala kuvipanga vya ndhili yendi. ²⁰ Eyi yikeyo ndhili yapangethele Kalunga muli Kilistu haku mu hindula ku kutca na kumu tumbika ku livoko lyendi lya chilyo mu mihela ya muilu. ²¹ Ua tumbikile Kilistu helu lya mashiko oshe na lijui lya lishiko na ndhili na mishovo yoshe na lidhina nkala eli vatumbula Kilistu atua menena, keti mu myaka yino lika vuno ku myaka ya kulutue lalo. ²² Kalunga ua haka vyuma vyoshe kuintci lya Kilistu na ku muhana mu chikungulukilo, linga akale mutue ua chi kungulukilo. ²³ Na chikungulukilo chikecho muvila uendi, kushula kuendi kulyauye a shulitha vyoshe muoshe.