¹ Aa akeuo majui a Amose, uye ua kele hakati vutanga kutunda ku Tekoua, viye vya muene kushuama Yisaleli mu matangua a Uziya muene ua Yunda, keho lalo mu matangua a Yelomboame muna ua Yoashe muene ua Yisaleli, myaka yivali kulutue lya kungangama kua livu. ² Endi ua handekele ngue di, ''Yehova akohya kutunda ku Siyono; endi aka katula lijui lyendi ku Yelusalema. Na muthenge ua vutanga uka tambakana; na kuilu lya mukinya Ngamelu likema. ³ Evi vikevyo vya na handeka Yehova nguendi: ''Muomu milonga yitatu ya Ndamasiku, nambe vya kuheta ku viuana, ange kunjika tenguluka chilunguitho, muomu vakevo viyithile Ngileande hamo na mukuale ua chikungu. ⁴ Njika tuma tuhya ku njivo ya Hazaele, keho tukalya va Mbene-Handande. ⁵ Njika pokola vikolo vya vikungu vya Ndamasiku na ku teta muntu uye aka shika mu limbalanda lya Avene, keho lalo na muntu uye akuata vaka kushika mu Mbete Endene. Na vantu va Alame vakaya mu ku vakuata ku Kile,'' muana handeka Yehova. ⁶ Evi vikevyo vya na handeka Yehova nguendi: ''Muomu milonga yitatu ya Ngaza, nambe yiuana, ange kunjika yeneka kuva yandetha, muomu vakevo vambatele vantu voshe ntcimbu vaka ku kuata, ku vahana kuli va Endome. ⁷ Ange njika tuma tuhya ha vivumbe vya Ngaza, keho tuka mulya yikeye. ⁸ Njika teta muntu uye akala mu Ashendonde na muntu uye akuata vaka kushika ku Ashekelone. Ange njika tengulula livoko lyange kuli va Ekelone, keho voshe va Filisitine vaka dhimangana,'' muana handeka Muene Yehova. ⁹ Evi vikevyo vya na handeka Yehova nguendi: ''Muomu milonga yitatu ya Tile, nambe yiuana, ange kunjika tengulula chilunguitho, muomu vakevo va hanene vantu voshe ku Endome, keho vakevo va pokuele lyuvuathano lyavo lya vu munayina. ¹⁰ Ange njika tuma tuhya ha vivumbe vya Tile, keho tuka mulya yikeye. ¹¹ Evi vikevyo vya nahandeka Yehova nguendi, ''Muomu milonga yitatu ya Endome, nambe yiuana, ange kunjika tengulula kayando kavo, muomu ua thininikile munayina ua lyala na mukuale na ku kuta voshe. Vukalu vuendi ua va tavula vakevo kulishuama, na vukalu vuendi vuka kala kumyaka yoshe kuye kulenga. ¹² Ange njika tuma tuhya ha Temane, keho tukalya muhela ua Mbozela. ¹³ Evi vikevyo vya na handeka Yehova nguendi, ''Muomu milonga yitatu ya vantu va Amone, nambe yiuana, ange kunjika tengulula kayando kavo, muomu vakevo vashokoluele vakentu vaka mita va Ngileande, vaye vakevo linga vahamethe vingamba vyavo. ¹⁴ Njika shuameka tuhya mu vivumbe vya Lamba, keho vikalya mihela, na tambakana mu litangua lya ndhita, hamo na matoto mu litangua lya mpundhi. ¹⁵ Muene uavo akaya muku mukuata, yendi na vantu vendi hamo lika,'' muana handeka Yehova.