¹ Ngocho vene, muye kutua lihakele ko, tua thinganyekele cha kele cha chingulu ku tutha kunima ku Atene lika lyove. ² Tua tumine Timoteo, munanana uetu ua lyala na muka vipanga mukuetu muli Kalunga mu mudhimbu ua Kilistu, mu ku koletha kushuama ku ku tcelela kuove, ³ Linga naumo uahi atha ku ku teuetha vya ku mishovo. Muomu yeni vavenya muna dhivuka viye vitua minikilile. ⁴ Vu chili, muye mutua kele neni, tua mi lekele ha kuli vanga viye vitua yandelelele na ku yomboloka ngocho, ngue mumu na vidhivuka. ⁵ Muomu echi vene ange lalo, muye yange kunjathele ku koletha lalo, nja tumine linga nji dhivuke vya ku tcelela kueni. Keho kufuita ngana kuetu kuka kale mu ngocho. ⁶ Vuno Timoteo uedhile kuli yetu muku tunda kuli yeni na ku tunehela mudhimbu ua chili ua ku tcelela na chidhango cheni. Endi ua tu lekele viye yetu ntcimbu yoshe tuli na ku vuluka vya vingulu vyetu, na viye vimua tatelela ku tumona yetu ngue yetu lalo muku mimona. ⁷ Muomu kulyevi, va munanana va vamala, mua tukolethele muomu vya ku tcelela kueni. ⁸ Muomu tuovoka, nga yeni muimana muli Muene. ⁹ Muomu tuka shangala vati kuli Kalunga omo yeni, muomu kuyolela kuye ko tua kele kulutue lya Kalunga ketu hali yeni? ¹⁰ Vutciki na Mutanya tua lombele muakama kama linga tuka mone chihanga chendi na ku muhana viye vina yeneka mu ku tcelela kueni. ¹¹ Vuno Kalunga Tata uetu yendi vavenya, na kuli Muene uetu Yesu, atuala ngila yetu kuli yeni. ¹² Keho Muene yikeye ami kulithe na ku milanetha mu chidhango umo na mukuavo, na ku vantu voshe, ngue mutua pangele neni. ¹³ linga akolethe mbunge yeni, naha ha ku mipayela hahi kumesho a Kalunga na kuli Tata uetu ha kuinja kua Muene Yesu hamo na vantu vendi vaka kuyela voshe.