¹ Muomu yeni vavenya muna dhivuka, vamunanana va vamala, kuinja kuli yeni keti vipanga vya vungocho. ² Nambe, ngue muomu na dhivuka, nambe tuna yandele ntcimbu ya kunima keho va mipangethele vya shuama ku Filipi, va tu nehele muli Kalunga ketu muku kuanya neni mudhimbu ua Kalunga mu ku yanda. ³ Muomu ko tua likelelele kuthinganyeka vipanga vyeni vyaku yeneka kuyela nambe kumi kuitha. ⁴ Muku dhivukitha vaye vana yongola Kalunga Ngue muye muva tu tambuile kuli Kalunga muku tcelela kua mudhimbu, linga tuka kuanye, keti mu ku shangala muntu, vuno Kalunga. Yikeye umo uye atala vimbunge vyetu. ⁵ Muomu ku tuadhivukile na mathona aku lelemetha, ngue mu mu na vidhivuka, nambe mathona aku fuika vakala vutha_Kalunga yikeye mukaleho uetu. ⁶ Ndi tua kuthetele vungulu kuli vantu nambe kuli yeni ndi kutunda ku vakueni. ⁷ nga tua litumbuile muku kala vapostolo va Kilistu. Nambe tua kele vaka vukama hakati keni ngue mukentu aholuetha munendi uendi vavenya. ⁸ Mu ngila yiye vene tua kele na chidhango kuli yeni. tua shangalele mu ku lya vadhela neni keti ku mudhimbu ua Kalunga lika, vuno lalo vya muono uetu. Muomu muna kala vetu. ⁹ Muomu muna vuluka, vamunanana va va mala, vipanga vyetu na ndhili. matciki na mutanya tua pangele linga keti tukale na mulonga kuli yeni voshe muye mu tua mbuluile mudhimbu ua Kalunga kuli yeni. ¹⁰ Muna kala na vukaleho, na Kalunga lalo, vati kuyela, na mu ku vuaha, na ku linyenga vya kele vishoti kuli yeni vaye vaka ku tcelela. ¹¹ Mungila yiye vene muna dhivuka vati mu tua kele hamo hamo lika ku nkala umo ueni, ngue yishe ali na vana vendi va venya, ¹² Mu ku mimamuna na ku mikoletha na mukuambulula linga yeni muende mu vungulu vua Kalunga, uye ami thana ku vumuene vuendi vavenya na vungulu. ¹³ Muomu ku vyuma evi yetu lalo tushangala Kalunga ntcimbu yoshe, ngechiye muye mu mu tambula mathona a Kalunga aye umuo vuile kuli yetu, mua vitambuile keti ngue mathona a muntu, vuno ngue a vungulu vene, mathona a Kalunga, akeuo lalo apanga muli yeni va ka ku tcelela. ¹⁴ Muomu yeni, va munanana va vamala, mua kele vaka kutangula mu chikungulukilo cha Kalunga chiye cha kele mu Yundeya muli Kilistu Yesu. Muomu lalo mua yandele kuli vantu veni vavenya, ngue muva vipangele kuli va Yunda. ¹⁵ Vaye voshe va tcihile Muene Yesu na va Polofeto, na kuli uye ua tu tuhuithile hanja. kuva shangalele Kalunga. Nambe, vakele kuli vantu voshe. ¹⁶ Vatu yene kethele ku kuanya na vaka Vifuti linga vakovoke. Vi uanamo vikevyo viye vye ku shulitha nkala hoshe milonga yavo ha ha ndende. Vuno vukalu vukatambula vakevo ku ku manethela. ¹⁷ Vuno yetu, va munanana va vamala, tua litundithile ko kuli yeni haka ntcimbu ka kandende, ku muntu keti mu mbunge. Tua kele na chidhango cha kama, muku mona chi hanga chove. ¹⁸ Muomu tuyongola kuinja kuli yeni_yange vene, Paulu, lumo keho lalo_vuno Satana na tuvindika yetu. ¹⁹ Muomu vya ku tcelela kuetu, ndi ku yolela ndi ku kala na chidhango kulutue lya Muene uetu Yesu ku kuinja kuendi? Keti yeni ndi? ²⁰ Muomu yeni vaka vungulu vuetu na ku yolela.