¹ Ngovera yaDaviti, oru ayimbire Karunga kutwalilikita kunkango daKushi muBenyamini. Karunga Hompa wande, mumoye nahuguvara! mpopere kwavo vana kuhepeko ove ghumparure. ² Nangeshi kapishimo, vavo kuvhura vahomoke yira nyime, vampapaghure muvintaghu kundereko mpirindi wandjambo avhuro kundjita kughughami. ³ Karunga Hompa wande, ntjeneshi ame navirughano vino, ano nangeshi mumavoko ghande munakarandjo --- ⁴ Nangeshi kwarughana ghudona kovo vakaliro mumpora name, ndipo natoghona mukankore ahana ndjo, ndjuvhire vitwenya vyande. ⁵ Renka nkore yande yidjonaghure liparu lyande nakumfunda; renka atavirikide monyo wande kulivhu nakufutira lifumano lyande mumbundu. Shera. ⁶ Shapuka, Karunga, mughugara ghoye; yimona ghudivyuke nyanya yakankore vande; pahukira likoshonono ntani shimba mughano davahungami odo wavarawilire. ⁷ Virongo navintje ovyo vyakukundurukido; palivango lyaghuhunga ghuvapangere. ⁸ Karunga, pangura dimuhoko; mpangura, Karunga, mukonda nimuhungami naghupirandjo, shankondo nkondo. ⁹ Mposhi virughanadona vyavanandjo viye kughuhura, ngoli tamununa vantu vavahungami, Hompa wamuhungami, ove mukonakoni dimutjima namaghayadaro. ¹⁰ Lipopero lyande kutundilira kwaKarunga, ogho aghamenango ghuhungiki wamumutjima. ¹¹ Hompa ndje mpanguro yavahungami, Hompa ogho agaraperango kehe liyuva. ¹² Nangeshi muntu kapi ana kukushighura, Karunga ngarora rufuro rwendi ntani ngawapayika ghuta wendi wankandja mukurwa vita. ¹³ Ghuye kukuwapayikira mukuruwanita virwita vyakumuvyuka; ghuye kuruwana virwita vyakurwedima. ¹⁴ Ghayadara kwagho anakaro anatumbaparo ndjo, ogho ana tumbaparo maghano hana dumba, ogho ana kushampuruko vimpempa. ¹⁵ Ghuye kutima likwina nakuliyupurura makura kuwera mulikwina olyo atima mwene. ¹⁶ Ano naghanodona ghendi kudimuvyuka mwene, ano ghukorokotji wendi kusheghunukira pamutwe. ¹⁷ Ame ngani tapa mpandu kwaKarunga kughuhungami wendi; Ame ngani yimba matango kwaKarunga shankondo nkondo.