Lipisaromu lyaAsafi. ¹ Munankondo, Hompa, Karunga, ghuye ghaghambire nakuyita ntundayalivhu kutundilira opo lyakyanga liyuva nakukatoka. ² Kutundilira kuSiyoni, ghuwa wakuwaperera, Karunga ghanegheda. ³ Karunga wetu opo ghayanga kapi ghakugumininanga; mundiro kutwera kumeho yendi, ngoli nka ghamukundurukida mpepo yankondo. ⁴ Ghuye kuyita mawiru ghakuwiru napantunda yalivhu mposhi ghuye ghavhure kupangura vantu vendi. ⁵ ''Pongeka vapuli vaghushiri-shiri vakare kumwe kwande, mbovo varughana likukwatakano name nashidjambero.'' ⁶ Mawiru ngagha ngambipara ghupongoki wendi, Karunga mwene ndje mupanguli. ⁷ ''Yuva, vantu vande, ntani ame ngani ghambe; Ame Karunga, Karunga wenu. ⁸ Ame kapi ngani kuneghudura naghudjambero ghoye; ndjambo yakushwakerera nkehepano kukara kumeho yande. ⁹ Ame narumweshi nganighupamo nampiri ntwedu yimwe mundjugho yoye, ndipo vimpendje vyavirume nivighupe mushinyongo shoye. ¹⁰ Ngoli nkehe shikorama shamuwiyane shande, nangombe pamayovi pandunduwena. ¹¹ Ame nayiva vidira navintje vyamundundu, ntani namakiti ghamulifuvanka ghande. ¹² Ndi nayuvire ndjara, ame ndi nakutantelireve; ngoli ghudjunine wande, nanavintjeya vyakaramo. ¹³ Ame nganilye nyama yantwedu ndipo nganinwe honde dampendje ndi? ¹⁴ Tapa kwaKarunga shidjapo shakutapa mpandu, ngoli ghufute mughano doye kwaKarunga wakundaghandagha. ¹⁵ Ndjiteme mushirugho shamumaghudito; Ame ngani kupopera, ntanive ngaghuntungikame.'' ¹⁶ Ano ngoli kuvadona Karunga kughambashi, ''Nke ovyo warughana naghungambi wamafano ghande, ove nka waghupa likukwatakano lyande mukanwa koye, ¹⁷ ovenka wanyenga marondoro mbyonka wavukuma nkango dande ghure? ¹⁸ Opo wakenganga munawidi, ove kumukwatitako; ove kukuhamitira mwavo varughanango vyakushondera. ¹⁹ Ove kutapa kanwa koye kuvadona, nka kanwa koye kutimwitira vyarushongo. ²⁰ Ove kushingira nakughamba vyaghunkore navaghunyoye; ove kughamba nka vipempa kwamughunyoye wamukafumu mwene-mwene. ²¹ Ove warughana navintje vino,anongoli ame kwavimwena tupu, ngoli waghayalireshi ame yirave. Anongoli ame nganiku neghudura nakukuyita, kumeho yamantjo ghoye, kwanavintjeya ovyo warughana. ²² Ngoli kara ghunavangarara mukukengurura, anwe mwavhuramo Karunga, vyakuhupako nganikundembaghura ghugceneghugcene, ntani kwato ghogho kavhuro kukuvatera! ²³ Kwavo ghatapango ndjambo yakutapa mpandu nalikukanganga lyande, ngoli kwakehe ghuno ghaghayarango ndjira yendi mughuhunga ame nganimunegheda loyoghoko lyaKarunga.''