Mupititi wamarushumo. Lipisaromu lyamona wamukafumu waKorahi. ¹ Yuvenu vino, anwe vantu namuvantje; turenuko litwi, namuvantji anwe vatungi vamughudjuni, ² vakare vamulidamenena ndi vapandundu, ndi vangavo navahutu namuvantje. ³ Kanwa kande ngaka ghamba ghunongo nalikutedo lyakumutjima wande ngalikara lyakukwata lighano. ⁴ Ame ngani kakatera litwi lyande kuvishewe; Ame ngani vareka vishewe vyande nashivetito. ⁵ Morwanke vyo nitjilira mayuva ghamadona, nangeshi ndjo dankundurukida kumaghuru ghande? ⁶ Nkevyo nganitjilira ovo vahuguvaro muviweka vyavo nakukukanganga vyakuhamena kumaghungavo ghavo? ⁷ Vyakena kareshi kwato ghumwe wakumangurura mukurwendi ndipo ghatape kwaKarunga mfuto, ⁸ ngoli ghumanguruki waliparu lyamuntu ndiroghunene, ntani kwato nka wakuvhura kufuta ovyo twakorota. ⁹ Kwato ghumwe wakutunga nanaruntje mposhi rutu rwendi ngarudire kudjuma. ¹⁰ Ngoli ghuye ngakenga ghudjumedi. Vakafumu vavanongo kwafanga; ngoli vavaya navakenya vavo kumyoka ano mamona ghavo kughashuva kuvaghunyavo. ¹¹ Maghayadaro ghavo ghamunda ashi makoro ghavo vavo ngavakarerapo nanaruntje, kumavango ogho vatunga, kuruvharo naruntjeya; vavo vata mavango ghavo namadina ghana ghumwafo. ¹² Ano ngoli muntu, ghakaro naviweka, ghuye kapi ghakarereranga kutunga; ghuye yira shikorama shamuwiya osho shaferererango. ¹³ Vino, mundjira davo, dado damungunda tupu; anongoli ovo vavakwamango vavo kukwatitako vighamba vyavo. ¹⁴ Yira vindjwi vanashororora viyende kuSheyoli, anongoli mfa kukarera kuvatakamita vyandjwi. Vahungami vavo kuvapangera nkehe ngurangura, ntani marutu ghavo ngaghaka djonaghukira muSheyoli, kwato kulivango kwakatungira. ¹⁵ Ano ngoli Karunga ngava mangurura maparu ghavo kughunankondo wavaSheyoli; ghuye ngaka ntambura. ¹⁶ Washa tjira nangeshi ghumwe mukatjikenu ghakara mungavo, morwa ghuntungi wamumundi wendi nagho kukuwederera. ¹⁷ Ngoli ghuye pakufa kwato ovyo ngashimbapo; ghuye ghuntungi wendi kapi ngaghumukwama pakufa. ¹⁸ Ghuye ghatungikire monyo wendi paghuyumi --- ntani vantu kukutangaghuka nangeshi wakutungika naghumoye --- ¹⁹ ano ngoli pakuyenda kuruvharo rwakukwamako rwavasha vavo kapi ngavaghukenga ghukenunka. ²⁰ Muntu wakuweka vintu ngoli kwato kukwatalighana yira shikorama shakukufera.