¹ Mbudi ya kuhamena Tirusi ndjeyino: Lirenu unene anwe vayendi mu Lifuta! Ndjira ya kukwenu ku Tirusi yina yungurukapo; ndjugho damo na liyenga lyasho marunda ana karo. Apa ngavitunda vikepa vyenu ku kipurusi, ngamu vikuyuvhira. ² Mwenenu, anwe vatungi vapa shirudi, vaghuliti va Sidoni. Anwe kamu tumanga vantu. ³ Vavindakane lifuta vakaghure na kughulita mahangu agha vayanguranga mu Egipite, mukaruwane ndando mu udjuni naghuntje. ⁴ Kufe ntjoni, ove Sidoni, lifuta na litondo lya linene lya lifuta, ndyo lina kutanto ashi: '' Ame kapi na vhara rumwe vana. Kapi narera rumwe vana vavarume ndi vakadi.'' ⁵ Nava Egipite mbava ngava kankama kushitukutjima, apa ngava yuvha ashi Tirusi yina yungurukapo. ⁶ Pitenu ya Tarusisi, Lirenu anwe ruvharo waku lifuta. ⁷ Ene ngoli ndjo tupu mbara ya ruhafo ya Tirusi yino ya kare-kare? Hee ndjo tupu mbara eyi kayi tumango vantu vavindakane mafuta vakatunge mu virongo peke? ⁸ Oghu avi rongikido vino ayitire navintje vino Tirusi, mbara ya shighu Hompa, vahompaghona vamo, vaghuliti ava vafumano muudjuni, are ghuno? ⁹ Hompa muka nkondo nadintje avi rongikido vino. Ghuye kwavi rongikidire vino mukuya shayikitapo makutumbo ghavo kwevi kava ruwananga kuno kuna kudidipita vaka makuto vano. ¹⁰ Yendenu mukalime shirongo, anwe vantu vamuvirongo vya mu Sipaniya! Kundereko nka ghu ulitiro mu Tirusi. ¹¹ Hompa kwa wonywenena livoko lyendi ku lifuta, mbyo akankamita virongo. Ghuye kwa panga ashi madi ghandando gha Fonisiya gha hanaukepo. ¹² Makura aghamba ashi, '' Ove mbara ya Sidoni, ruhafo roye runa shaghapo, ano vantu voye kuna kuva hepeka. Nampili vatjwayukire ku Kipurusi, naposhi kapi ngava kawapa. ¹³ Kengenu shirongo sha va Kalideni. Vantu vasaho kapi nka vana kara na mulyo; va Asiliya vana shitura shikare sha vishitwa vya mumburundu. Vana turamo maruhungu ghavo, vana shidjonaura kunderemo evi vina karomo nka. ¹⁴ Lirenu anwe vikepa vya Tarisisi, nkuru mbara eyi mwa huguvara yina hanaukapo. ¹⁵ Mu liyuva linya, Tirusi ngava yi vurama mwaka di murongo ntano na mbiri, yira mumayuva gha Hompa. Muruku rwaughura wa mwaka dimurongo ntano na mbiri ngamu shoroka shininke shimwe mu Tirusi yira murushumo rwa mushondedi. ¹⁶ Ghupa shighumba shoye ghu yendaure mu mbara, ove mushondedi wa muhepwe oghu vavurama! ¹⁷ Muruku rwa mwaka dimurongo ntano nambiri Hompa ngarenka nka Tirusi, yivyukire kundando dayo dakare, makura ghuye nga kudjambera mwene kuvirongo navintje vya muudjuni. ¹⁸ Ntjontjo yendi na viwana vyendi evi ngawanamo mundando, ngavavi pongwera Hompa. Kapi ngava vipungwida, ngoli ava vatongamenango Karunga, mbo ngava ruwanito vimaliva vyendi vaghure ndya navidwata evi va hepa.