¹ Ghuye kwarughanine shidjambero sha ngoporo, ure washo kwakalire dimurongo mbiri, ntani unene kwakalire dimurongo mbiri. ² Ghuye nka kwarughanine lifuta lya kukudingilika na vikugho, metera murongo kuruha na kuruha. Ure walyo metera ntano, ntani lifuta kwakalire metera rontatu mukukudingilika. ³ Kuntji ya lifuta kwakalireko ntwedu, metera murongo kehe ruha, vatulire muruvambaro rumwe na lifuta opo lifuta lyeneko valirughanine. ⁴ Kandimbe kakanene kayivikwo ashi ''Lifuta'' kwakatentikire pahove ronambiri, ntatu kwakengera kuumboyera, ntatu kwakengera kuutokero, ntatu kwakengera kuucuma, ntani ntatu kwakengera kuupumeyuva. ''Lifuta'' kwalitentikire pawiru yado, ntani nyima dado kwakalire munda. ⁵ ''Lifuta'' mpu yalyo kwakalire yira unene wa lighoko, ntani ghuhura kwaghudidipitirelire ghuhura wa nkinda, yira mucuko. ''Lifuta'' kwakalire mumavango gha kuyoghanena mayovi matatu. ⁶ Ghuye nka kwaruwanine mbalisha murongo pakukushira vininke, ghuye kwatulire vitano kuucuma, ntani vitano kuumboyera, virughanita varughanitire mukutikitamo ndjamo yakushora mo vayikushilire momo. Mbalisha yayinene yayuviko ashi ''Lifuta'' kwayirughanitire vapristeri vayoghanemo. ⁷ Ghuye kwarughanine ramba murongo da kuyimana da ngorodo odo varughanine kutunda kumanangwiro gha rupe rwavo, ghuye kwaditulire muntembeli, ntano kulighoko lya rulyo, ntani ntano kurumontjo. ⁸ Ghuye kwarughanine ntishe murongo ntani kwaditulire muntembeli, ntano kuruha rwa rulyo, ntano ntano kurumontjo. Ghuye kwarughanine mbalisha lifere limwe da ngorodo. ⁹ Mukuwedererako ghuye kwarughanine livango lya mapungwira gha vapristeri, ntani nka mpangwiro ya yinene ntani mavero gha mapungwiro ntani kwavambayikire mavero ghavo na ngoporo. ¹⁰ Ghuye kwatulire mbalisha yayuviko ashi ''Lifuta'' kuruha rwa upumeyuva wa ntembeli, lya kengero kuucuma. ¹¹ Huramu kwarughanine poto, viharaghuva, ntani visha vya vididi. Haramu amanine virughana ovyo arughaninine hompa Solomoni mundjugho ya Karunga. ¹² Ngundi mbiri, dimutwe da kulighundungura visha odo dakaliro pawiru ya ngundi mbiri, ntani nka mbiri da kushingira da kuwapayikita vipirangi mukufika dimutwe da kulighundungura odo dakaliro pawiru ya ngundi. ¹³ Ghuye arughana nka kwarughaninepo maukuyu mafere mane gha vipirangi viviri vya kuwapayikita: dimurayini miri da maukuyu pa kehe ruha rwa vipirangi mukufika dimutwe mbiri da kukughundungura yira visha odo dakaliro pawiro ya ngundi. ¹⁴ GHuye kwarughanine nka pakutura ntani mbalisha dakuyenda pakutura, ¹⁵ lifuta limwe ntani ntwedu ronambiri munda yalyo, ¹⁶ nka waro na poto, viharaghuva, marutugho gha nyama, ntani navirughanita navintje ovyo arughanine Haramu-Abi kungoporo vakusha vya hompa Solomoni, vya mundjugho ya Karunga. ¹⁷ Hompa kwavarughanitire vino mumuramba wa Jorodani, mushihemwino sha pakatji ka Sukkoth na Zarethan. ¹⁸ Solomoni arughanine navintje vino muungi, muushiri, shiviha sha ngoporo mukudira kushiyiva. ¹⁹ Solomoni arughanine viwapayikita navintje vino vyakaliro mundjugho ya Karunga, waro nka shidjambero sha ngorodo, ntani ntishe odo kavaturanga mboroto da vakutapa ndjambo, ²⁰ pakutura ramba na ramba dene, odo dakaliro murupe mukushora kumeho ya nkonda yamunda - ovino kwavirughanine kungorodo yene-yene, ²¹ ntani dimucuko, ramba, ntani tukonde, twa ngorodo, ngorodo yene-yene. ²² Shirughanito sha ramba, malisha, marutugho, vyakusholita vyalidumba kwavirughanitire ku ngorodo yene-yene. Mwakungenena mundjugho, mavero gha kuntji mulivango lya kupongoka unene ntani mavero gha kundjugho, oggho ngo, gha kuntembeli, kwagharughanitire kungorodo.