¹ Kuruku yaruvede oro Amoni mona waukafumu waDaviti kwaholire unene-nene muunyendi-kadi wakuvashe wamuwa Tamara, ogho akaliro mpandja Abisalomu mwene-mwene, mona wakafumu umwe waDaviti. ² Amunoni avimu garapita naku muyitira uvera mukonda Tamara mpandjendi. Tamara kapi akundama rumwe mukafumu, nko kukara ngoli udito kwaAmunoni mukuruwana nkehe vino kwaTamara. ³ Ngoli Amunoni kwaholire namuholi walidina lyakaliro Jonadaba mona wamukafumu waShimeya, mukurwa Daviti. Jonadaba kwakalire mukafumu wakukotoka unene. ⁴ Jonadaba atantere Amunoni, ''Vinke, mona wamukafumu wahompa, waguvara ngoweyo nkehe yino ngurangura? kwato kuvintantera ndi?'' Makura Amunoni amulimburura, ''Ame kwahora Tamara, mpandja mukurwande wamukafumu Abisalomu.'' ⁵ Makura Jonadaba amutantere, ''Rara pambete yoye kumwe ghukurenkite yira kuna kuvera. Opo vaya vasho vayakukenge, ghuya pure, 'Nakanderere kuvhura mukantumine mpandjande Tamara aka ndjitireko vyakulya nakuya vitereka kumeho yande, niya vhure kuya vikenga nalya vyamulighoko lyendi ndi?''' ⁶ Makura Amunoni arara nakuku renkita yira kuna kuvera. Opo ayie hompa ayamukenge, Amunoni atantere hompa, ''Nakanderere kantuminenu mpandjande Tamara mukuya nduwanenako tundya mughuvera wande aya turuwanene kumeho yande makura niya lye vyamulighoko lyendi.'' ⁷ Makura Daviti atumu liywi kwaTamara kumbara yendi, aghamba, ''Yenda ngoweno kundjugh yampandjoye Amunoni kumwe ghuka mururwaneneko ndya.'' ⁸ Makura Tamara ayendi kundjugho yampandjendi Amunoni oko akalire. Tamara aghupu utura warukokotwa mukuduva kumwe nakutenda mboroto mushikenga mantjo ghendi, makura adi yoto. ⁹ Atuliki vikangero kumwe nakumpa mboroto, ngoli Amunoni ashwena kulya. Makura Amunoni atanter vamwe ovo vakaliromo, ''Vatundemo navantje varupuke, vatundeko kukwendi.'' Makura navantje ava rupuka vamutunde. ¹⁰ Makura Amunoni atantere tamara, ''yita ngoli ndya munkondwa yande makura niya vhure kulyera mulighoko lyoye.'' Makura Tamara aghupu mboroto odo aruwanine, kumwe nakudiyita munkondwa yampandjendi Amunoni. ¹¹ Opo ayitire ndya kukwendi, Amunoni akwata Tamara kumwe nakumutantera, ''koya, turare name, mpandjande.'' ¹² Tamara amulimburura, ''Hawe, mpandjande washa ntininika ngoweyo, morwa kwato vyakufana ngoli varuwana rumwe muIsraeli. Washa ruwana vino vifita ntjoni! ¹³ Weni ngoli ngani pitamo muntjoni dande? Kuhamena kukoye weni ngoli? Ngaghukara yira ligova limwe lyamuIsraeli! Ngoli, nakanderere kaghambe nahompa, morwa kapi ngavhura kuntjweneka kukoye.'' ¹⁴ Ngoli hawe Amunoni, kapi ana kutegherera kukwendi, ngoli ghuye nka nkondo kupitakana Tamara, kumwe nakumumanenenapo munkondo, dogoro arara naye. ¹⁵ Makura Amunoni anyenge Tamara nanyengo yayinene. Ghuye kwamu nyengire unene kupitakana omo amuholire. Amunoni amutantere, ''shapukapo kumwe ghuyende.'' ¹⁶ Ngoli Tamara amu limburura, ''Hawe, mukonda oghuno ghudona waghunene ghuna kuruwana mukutjida kuvhura ghupitakane ovyo ghuna nduwana!'' Ngoli Amunoni kapi amu teghelire. ¹⁷ Murupe oro, ayita mukareli wendi waparutu nakumutantera, ''Ghupa ogho mukamali atundepo pande, kumwe nakupata livero kuruku yendi.'' ¹⁸ Makura mukareli wendi amurupwitamo kumwe nakupata livero kuruku yendi. Tamara kwadwatire lirwakani lyakurerema unene mukonda vana-kadona vavahompa ovo vakaliro vahana kukundama vakafumu ngoli kavadwatanga murupe oro. ¹⁹ Tamara atura mutwitwi pamutwe wendi kumwe nakutaghura lirwakani lyendi. Maghoko ghendi agha fiki shipara shendi kumwe nakuka yenda, ayenda alira unene. ²⁰ Mpandjendi Abisalomu amutantere, ''Na mpandjoye Amunoni ghunakara naye ndi? Ngoli makra mwena, mpandjande. Ghuye ne mpandjoye. Washa vitura vininke vino kumtjima.'' Makura Tamara akara mpentjendi mundjugho yampandjendi Abisalomu. ²¹ Ngoli opo aviyuvire hompa Davita vinike navintje vino, agarapa unene. ²² Abisalomu kwato ovyo aghambireko kwaAmunoni, morwa Abisalomu kwamunyengire mukonda yavyo aruwaninie kwaTamara nomu afitire ntjoni mpandjendi Tamara. ²³ Ruvede rwakukwamako kuruku rwamwaka mbiri dakuyuraa makura Abisalomu kwakalire navakuruli ndjwi varuwanino paBala Hazoro, ogho wakaliro pepi naEfurayimu, makura Abisalomu a rekere vana vahompa navantje vavakafumu mukuka mudingura nkoko. ²⁴ Abisalomu ayendi kwahompa nakughamba, ''Kenga ngoli, mukareli ghoye ana kara navakuruli ndjwi. Nakanderere, kuvhura Hompa navakareli vendi tuyende kumwe name, mukareli ghoye.'' ²⁵ Hompa alimburura Abisalom, ''Hawe, monande wamukafumu, natuvantje kapi tuyenda mukonda kutukupa muremenena kukoye,'' Abisalomu aku kwambere kwahompa, ngoli kapi ayendireko, ngoli nko kumupa matungiko ghendi. ²⁶ Makura Abisalomu aghamba, ''Ngjeneshi munashwena, nakanderere shuvenu mughunyande Amunoni ayende natwe.'' Makura hompa amutantere, ''Morwa nke Amunoni ayendera nanwe? ²⁷ Abisalomu akondjita Daviti, dogoro nkokurenka Amunoni navana navantje vahompa vavakafumu vayende naye. ²⁸ Abisalomu arawiri vakareli vendi aghamba, ''Teghererenu nawa. Opo akara Amunoni yina mugwaneke nawa vinyu, makura opo nimutantera, 'Homokerenu Amunoni makura mumudipaghe mwashatjira. Ndi kapishi monakumu rawira? kwato dimutjima nakupama.'' ²⁹ Makura vakareli vaAbisalomu ava viruwana kwaAmunoni yira momo ava rawilire. Makura vana vahompa vavakafumu navantje ava shapuka, kumwe nankehe ghuno mukafumu pakasino kendi kuronda kumwe nakukayomona. ³⁰ Makura ruvede oro, vavo shimpe mundjira vana kara,ngoli mbudi nkokuya tika kwaDaviti mukutanta, ''Abisalomu ana dipagha vana vahompa vavakafumu navantje,ngoli kwato ghumwe ana shuvuko.'' ³¹ Makura hompa ashapuka kumwe nakutaghura vyuma vyendi, ngoli nkokurara parughorongwa; Vakareli vendi navantje ava kara pendi okuno vyuma vyavo vanatavaura. ³² Jonadaba mona wamukafumu waShimeya, mukurwa Daviti wamukafumu, alimburura nakughamba, ''Ndi ntilyande kapishi avipure ovyo ashi vana dipagha vakafumu ghona navantje ovo vana karo ashi vana vahompa vavakafumu, morwa Amunoni mpentjendi anofo. Abisalomu kwalitulidirepo lino lighano kutunda liyuva olyo kwatilire kunkondo Amunoni mpantjendi Tamara. ³³ Makura ngoweyo kapishi vikare kumutjima wantilyande hompa shino shiyuvika ashi yira momo ana viyuvhu nakuvita mbura ashi navantje vana vavakafumu vahompa vana fu, morwa Amunoni mpentjendi ana fo.'' ³⁴ Abisalomu atwayuka. Mukareli wamukungi ayerura mantjo ghendi nakumona vantu vavangi kuna kuya mushitaghura kuruha rwandundu kughutokero wendi. ³⁵ Makura Jonadaba atantere hompa, ''Kenga, vana vavakafumu vahompa kuna kuya. Yira momo anaghamba mukareli ghoye.'' ³⁶ Makura ruvede oro amana kughamba, vana vahompa vavakafumu ava yatiki kumwe nakukwenaghuka nakulira. Hompa navakareli vendi navantje navo nka ava liri unene. ³⁷ Ngoli Abusalomu atjwayuka kumwe nakuyenda kwaTalimayi mona wamukafumu waAmihudi, hompa waGeshuri. Daviti kwalilire monendi wamukafumu mayuva ghamangi. ³⁸ Makura Abisalomu atjwayuka nakuyenda kuGeshuri, oko nko aka kalire mwaka ntatu. ³⁹ Maghano ghaHompa Daviti ashana kuyenda aka kenge Abisalomu, morwa vamushengawidire kuhamena Amunoni namfa dendi.