¹ Vyakuhamena kunyama ya kudjamba kuva Karunga vavimpempa: twa yiva ashi natuvantje twa kara na unandunge wavyo. Ngoli unandunge kutura muntu akunenepite ngoli shihoro kutunga mukare kumwe. ² Ogho ana kukughayaro ashi uye ayiva vintu, muntu wa weno kwato ovyo ayiva ovyo ahepa kuyiva muntu. ³ Ngoli kehe uno ahoro Karunga, ndje muntu ayivapo uye. ⁴ Ngoli vyakuhamena nyama yakudjambita kuva Karunga vavimpempa: Twayiva ashi muno muudjuni vaKarunga vavimpempa navimweshi vatanta ntani mwamo kwakaramo Karunga umwe tupu. ⁵ Nampili vakare ovo vatwenyanga ashi vaKarunga vakare vamuliwiru ndi vakare vamulivhu ( yira momu tupu pa kara vaKarunga na vaHompa vavangi), ⁶ ngoli atwe Karunga umwe tupu twa kara naye, shetu, ogho ashito navintje ntani uye ndje twakarera po, ntani muyowoli umwe tupu twakara naye Jesusi Kristusi mumwendi mo ashitilire Karunga vininke navintje ntani mumwendi mbyo twakarerapo. ⁷ Ene ngoli, uno ukonentu kapishi wa kehe uno. Ngoli vamwe kava kareranga vaKarunga vavimpempa, nkene kuna kulya yino nyama kuyimona yira yakudjambera kuva Karunga vavimpempa. Liywi lyavo lyamumutjima makura kuvarondora nakuvapa ndjo. ⁸ Ndya kapishi ndo dakututwara pepi naKarunga. Nakuvhurashi kukombanita vyuma nkene upira kudilya ndi tuwanenepo vyuma nkene kudilya. ⁹ Ngoli takamitenu ashi umanguruki wenu kapishi mulimbike vamwe valipuro lyalisheshu vapunduke. ¹⁰ Ene ngoli nkene umwe ana kumona, ogho akaro na ukonentu mumutjima, ove wa karo na ukonentu ngoli kuna kulya nyama munte mbeli yava Karunga vavimpempa. Mulipuro lyendi lyalisheshu kuvhura awanenepo nkondo da kulya nyama ya kudjambera kuva Karunga vavimpempa? ¹¹ Mukonda ya ukonentu woye wakuhamena kuva Karunga vavimpempa, makura unyoye walipuro lyalisheshu, ogho afera Kristusi, akombane mukonda yoye sha? ¹² Ngoli, nkene una djonene unyoye umuyivhite kukora muliywi lya mumutjima wendi, unatura ndjo kwa Kristusi. ¹³ Mpo ngoli shi, nkene shi ndya kuvhura dipukite unyande apunduke, nganukufera ngoli kulya nyama, manashi nganupukita vaunyande.