¹ Kumbinga yavininke ovyo mwatjanga: '' ghuwa unene nkene mukafumu adire kukundama mukamali''. ² Ngoli mukonda ya masheteko gharushonda ghamangi unene, kehe uno mukafumu akare na mukamali wendi, ntani kehe mukamali akare namukafumu wendi. ³ Mukafumu ahepa kutikitamo shiruwana shendi akare kumwe parutu na mukamali wendi, mukamali naye mushi kwavo. ⁴ Mukamali kapi akara nankondo dakupangera rutu rwa mwene, mukafumu ndje wa kurupangera. Akare mukafumu naye kapishi akare nankondo da kupangera rutu rwendi, mukamali ndje wa kurupangera. ⁵ Nakushwenekashi ghunyoye, nkwandi kapi muna kukuyuvha pashiruwo shangandi. Viruwanenu ngoli mposhi mukare mundapero. Makura muna hepa kukara nka kumwe parutu nkene munakuyuvhu, mposhi kapishi muyende mumasheteko gha Satana mukonda yakupira kukupangera na umwenu. ⁶ Ovino kuna kumutantera muyive ovyo vapulitira ngoli kapishi dikare dimurawo. ⁷ Ame kwashana ashi navantje ndi vakare yira momu nakara me. Enengoli kehe uno akara na ushwi wendi watundo kwa Karunga. Kwa umwe akara na ushwi ghuno, kwa unyendi wapeke. ⁸ Kuvadike na kuvafitavya kuna kumutantera ashi nawa nkene mukare ngoweyo, yira momu nakara me. ⁹ Enengoli nkene kapi vana kuvhura kukupangera, vakware. Hasha tupu vavo vakware, kupitakana nomo vapya kulidowo. ¹⁰ Kuva kwali kuna kumupa dino dimurawo- kapishi me, Hompa- mukamali nakuvhura shi akugaunuke na mukafumu wendi, ¹¹ (Nkene ashuva vyendi akare ngoli muudike ndipo nkwandi vakuvyute namukafumu wendi), Ano mukafumu nakuvhura akombe mukamali wendi. ¹² Ngoli kukwenu namuvantje ame kuna kumutantera ame- kapishi Hompa- nkene mukafumu akwara mukamali ahanashi mupuli, enengoli uye amuhora vatunga kumwe, washa mushuva. ¹³ Nkene mukamali akwara mukafumu ahanashi mupuli enengoli vatunga kumwe vavo vakuhora, washa mushuva. ¹⁴ Mukafumu wakupira lipuro ngakapongokera mwa mukamali wendi ngoli akare mukamali wakupira kupuwa kwapongokera kwa mukafumu wendi. Ashi ndi kapishi mo vyakara weno vana venu ndi vanyata, ngoli vapongoka. ¹⁵ Ngoli nkeneshi ogho apiro kupura anashana ashi mukugaunuke, kumushuva tupu akayende. Kovino vyakukara weno akare mukafumu ndi mukamali kwato mutininiko. momu Karunga kwa tuyita tutunge mumpora. ¹⁶ Ove mukamali weni omo wayiva ashi mukafumu woye ngaka parukira mumoye? Ndi ove mukafumu weni omo wayiva ashi mukamali woye ngakaparukira mumoye? ¹⁷ Mpo ngoli ashi, kehe uno vamupa ruha rwendi, kehe uno akarere ruha rwendi yira momu amuhororwera Karunga. Yino ndjo veta yande kumbunga Kriste nadintje. ¹⁸ Nkene mpwali ogho vahorowora uye apwa kare kumuruwana vya vamba. Kehe uno vapira kuruwana vya vamba kumeho akare mupuli? Kapishi vamuruwane vya vamba. ¹⁹ Vakuruwana vya vamba ndi vapire kukuruwana vya vamba kapishi mbyo vahepa po. Ovyo vahepa unene vya kulimburuka kudimurawo da Karunga. ²⁰ Kehe uno akare na ushwi wendi ogho awana kwa Karunga kumeho va kuhorowore. ²¹ Ove kwa kalire mupika kumeho akuhorowore Karunga? Washa vikupakera mbili? nkene shi ghuwane livega lina kukumangururo, washa lindjengeda. ²² MUkondashi mupika ogho ahororora Hompa ogho Hompa amumangururo. Kumwe nka waro, mumanguruki ogho ahorowora Hompa uye mupika wa Jesusi Kristusi. ²³ Anwe kwa mughura kundando ya ndiro, mwasha kara waro vapika vavantu. ²⁴ Vaunyande, kehe uno akare navyo vamuwaninine kumeho vamuhororwore, akare mwa Karunga. ²⁵ Vyakuhamena kwavo vapiro kukwara mo nampili rumwe tupu kapi nakara na veta davo da kutunda kwa Hompa. Ame kuna kumupa maghano ghande yira ndjegho vapa nkenda ya Hompa ashi ghuye kuvhura ku muhuguvara. ²⁶ Mpo ngoli ashi, mukonda ya maudito ogho ana kuyo kumeho, ghuwa unene muntu ukare yira momo una kara weno. ²⁷ Ove wakwara mukamali? Kapishi umukombe. Nkene kapi wa kwara mukamali, kapishi ushane mukamali ashi ukware. ²⁸ Nkene unakwara, kwato undjoni ntani nkene mukadonaghona akwara, kwato undjoni. Ngoli kuvantu va weno ngava gwanekera namaudito ghapa rutu ghamangi, ame kuna shana nimuyowororemo. ²⁹ Vaunyande: ame kuna kumutantera ashi, shiruwo shifupiko. Kutunda pano, ovo vakaro navakamali vakare yira kapi vakara navo. ³⁰ Ava vana karo naliguvo vakare yira kapi vana guvu, kovo vana karo naruhafo vakare yira kapi vanahafa, ntani navo vana ghuro vyuma vakare yira kwato ovyo vaweka, ³¹ Enengoli kwavo vahameno kwavi vya muUdjuni vakare yira kwato ovyo vawanangamo muUdjuni. Oghuno Udjuni una karopo weno na navintje vyakaromo kuna kuyenda vishayepo. ³² Ame kuna horo mupire kukara nashinka shamawoko-woko. Wakupira kukwara kwakara nashinka shavi vya Hompa, ashi weni omo amuhafita. ³³ Ngoli mukafumu wakukwara kwa kara nashinka shavi vya mu Udjuni, ashi weni omo ahafita mukamali wendi- ³⁴ Uye kwakara pamaruha maviri. mukamali ndipo mukadona ghona ogho apira kukwara kukara nashinka sha Hompa, ashi weni omo apongokera rutu rwendi na mpepo yendi kwa Karunga. Ngoli mukamali wa kukwara kwa kara nashinka shamu Udjuni ashi weni omo ahafita mukafumu wendi. ³⁵ Ame kuna kughamba vino muwane uwa wenu, ntani kapishi kuna kumupa undjoni. Kuna kughamba vino mukare muna kushuka, mukarere Hompa mwahana upiki-piki. ³⁶ Nkene shi vamwe kuna kughayara ashi mukafumu kapi ana kufumadeka mbandeki yendi-Nkene mwaka damukadonaghona dakukwara datikamo vikare paveta-kuvhura aruwane ovyo anahepa. Kapi pakara ndjo. Kuvhura va kukware. ³⁷ Ngoli mukafumu nkeneshi anatokora mumutjima wendi, pahana mutininiko akwame shihoro shamwene, mbyo atokora mumutjima wendi ashi kapi ngakwara, ghuye kuwapeka. ³⁸ Wakukwara mbandeki yendi kuwapeka, ntani wakuhorowora ashi ghuye kapi ngakwara kuwapeka unene. ³⁹ Mukamali mumango daveta akara nkene mukafumu shimpe namonyo anakara. Nkeneshi mukafumu ana dohoroka, makura ana manguruka kukwara kehe uno anahoro, ngoli dikare nkwara dapa Ukriste. ⁴⁰ Kutwara mumwande, mufitavya ndi kapi anahepa kukwara nka waro, ngaparuke naruhafo. Ameshi name na mpepo ya Karunga nakara nayo.