¹ Muna hepa kutumona atwe ashi, vakareli va Kristusi ntani vatwali mbudi ya ushiri ya Karunga yikare mulihoramo. ² Ovyo vahepa unene vakareli mbyo vino ashi vana hepa kulimburuka na lihuguvaro kowo avatumo. ³ Kukwande me ovyo vininke vyavididi tupu nkene amu mpangura anwe ndipo kehe lipanguro lyavantu. Nampili nana umwande kapi nganikupangura. ⁴ Ame shimpe kapi nayiva nakara namarapoto ghangandi gha kuhamena kukwande, kapi nakutanta ashi ame nimuhungami. Ogho ngaka mpanguro mwene Hompa muyogholi. ⁵ Mpo ashi walye mwahovanga kupangura ghuye Hompa shimpe kapi anayatiki. Ghuye ndje ngayahororo ovyo vya horamo mumundema ntani ngaya shorora maghayaro gha mumutjima. Makura kehe uno ntani ngoli ngawana mpandu yendi ya kutunda kwa Karunga. ⁶ Vaunyande, ame vino kuna viruwanene ku kwande ntani na mukonda yenu, mposhi mukurongerepo kukwetu ovyo ana kutanta matjangwa ashi, '' walye mwa pitakanitanga povi vatjanga''. Mposhi kapishi munene pite vamwe ntani vamwe muva didipite. ⁷ Are ogho ana kumono ashi ghuye kapi ashetakana navaunyendi? Vinke ovyo una kara navyo ovyo wapira kuwana kwa Karunga? nkene shi nove kwavi wana, kukupandayikira vinke yira kapishi kwavikupa? ⁸ Kare kaghuviwana navintje ovyo wahepa! Kare kamukara muva ngawo! Muna kara ngoli va Hompa-ntani nambili nkashi natwe! Ani ndi muva Hompa mwakaliro, natwe ndi tupangere kumwe nanwe. ⁹ Ame kuna kuvimona ashi Karunga kututura atwe va Apostoli tukare palivega lya kuhulilira, yira mbova vatokwera kumfa. Atwe tuna kara ngoli vantu ava vanakushepa mu Udjuni- va Engeli na vantu. ¹⁰ Atwe tuva magova mwa Kristusi, Anwe muva konentu mwa Kristusi. Atwe kapi twakara nankondo, anwe muva nankondo. Anwe kwa wana mfumwa, atwe kwatushwaura. ¹¹ Dogoro weno atwe kuna kuyuva ndjara na linota, atwe nkagi, atwe vatoghona ntani atwe kwato mandi. ¹² Atwe kuruwana viruwana vyavidito namawoko ghetu. Vavo kuturundira, atwe kuvatungika. Vavo kutuhepeka, atwe kudidimika. ¹³ Vavo kuturundira, atwe kuvaghambera mwamuwa. Atwe tuna kara ngoli yira liyara lya mu Udjuni ntani tuna kara ndova kwanavintje. ¹⁴ Ame kapi nakutjanga vino ashi numufite ntjoni, ngoli kuna kumurondoro anwe vanavande nahora unene. ¹⁵ Nampili mukare nava deghuli mayovi murongo mwa Kristusi, ngoli kapi mwakara na vashenu vavangi. Ame nakara shenu mwa Kristusi Jesusi kupitira mumbudi yayiwa. ¹⁶ Kuna kumukorangeda mughupe shihonena kukwande. ¹⁷ Mbyo nakumutumina Timoteusi monande mwa Hompa ogho nahora na kuhuguvara. Ghuye ngaya mvhurukita ghukaro wande wamwa Jesusi Kristusi, yirta momu tupu naronganga kehe mbunga-Kriste. ¹⁸ Vaunyenu vamwe kuna kutumbu unene, yira mbovo vana kughayaro ashi kapishi kwenu nganuya. ¹⁹ Enengoli ntantani nganuye kwenu, nkene Hompa ana pulitire. Mposhi nuyayive kapishi nkango davo vana kukutumbo, nani nganuya mone nkondo davo. ²⁰ Mukondashi Untungi wa Karunga kapi wakara mu nkango, munkondo wa kara. ²¹ Vinke muna hepa po? Nganuye kukwenu nangora ndi nashihoro shakumuhora namutjima waghughomoki?