¹ Vaunyande, ame kapi navhulire kughamba navo yira vantu ovo va karo pampepo, nani ngoli yira vantu va muno muUdjuni, yira vanuke mulipuro lya kupura mwa Kristusi. ² Ame kwa murera na mashini, kapishi na ndya da kutafuna, moomu shi kapi damuwapera, na mpili namuntji shimpe kapi dina muwapere. ³ Anwe shimpe vamuUdjuni ghuno. ovyo muna karere mfudu na dimutangu mukatji kenu, ame shi mbyovyo mwaruwananga yira vya mu Udjuni ghuno, mbyo muna karere na Ukaro wamu Udjuni ghuno. ⁴ Nkene umwe aghamba ashi, '' Ame wa Appollos,'' nani kapi muna kuruwana yira vamu Udjuni ghguno? ⁵ Appollos kukwenune are? Are Paurusi? Vavo va kareli va Hompa ovo vayuvhito mbudi mupure, kehe uno kwaruwana shiruwana shendi yiramomu va shimupera. ⁶ Ame kwa tapeka Appollos kwatekera mema, Ene ngoli Karunga ndje wa kumenita mbuto yikure. ⁷ Mpo ngoli mutapeki ndi mutekeli navimweshi. Wa munenepo Karunga wa kukulita mbuto. ⁸ Mpo ngoli ashi mutapeki na mutekeli navantje kumwe tupu, ntani kehe ghuno ngaka wana ndjambi yendi kutwara moomu aruwanine viruwana vyendi. ⁹ Mpo ngoli ashi navantje tuva ruwani vaKarunga. Anwe ko lifuva lya Karunga ndi matungo a Karunga. ¹⁰ Kutwara munkenda oyo atapa kukwande Karunga nikare mutungi wa mukonentu unene, kwatura po ntjima-ntjima yalitameko ntani vamwe ngava yatungire po. Ngoli kehe uno atakamite ashi weni omo atungirapo. ¹¹ Kwato ghumwe ghavhuro kutateka litateko nalyo peke lyahanashi olyo lyakaro po kare, lyalyo Jesusi Kristusi. ¹² Kehe uno kuvhura ghatunge kulitateko lino aruwanite Ngorodo, Sisiliveli, mawe andiro, vitondo, mushoni ndi virwenge, ¹³ viruwana vya kehe uno ngavi kushorora, ngavi shoroka muliyuva ndyo lyo. Ngavi kushorora mumundiro. mundiro ngongaghu shororo mulyo waviruwana ovyo aruwana kehe uno. ¹⁴ Nkene viruwana ovyo watunga kapi ngavi likana kumundiro, ghuye ngawana mfuto. ¹⁵ Nkene ngavi pya po viruwana vyendi ngakombanita mfuto, ngoli uye mwene ko ngaka paruka, yira ndjegho apitiro mumundiro. ¹⁶ Mwaviyiva nawa-nawa ashi anwe ntembeli da Karunga ntani ashi mpepo ya Karunga mumwenu yatunga? ¹⁷ Muntu nkene adjonaura ntembeli yaKarunga, Karunga naye ngadjonaurapo ogho muntu. Momushi ntembeli yaKarunga kwapongoka, mo nanwe ngoli ndi. ¹⁸ Mwasha kengerera muntu aku pukite mwene. Nkene umwe mukatjikenu akumoneshi ghuye akara na ghukonentu wavi vyamu Udjuni, ahove tanko kukara '' mugova'' mposhi ngawanenemo ukonentu. ¹⁹ Mbyovo shi ukonentu wamuno mu Udjuni ugova kwa Karunga. Matjangwa kwatanta ashi, '' Karunga kwa manga dimutjima da vakonentu.'' ²⁰ Shimpe waro, '' Hompa ayiva una ndunge wa vakonentu ashi navimweshi kukwendi''. ²¹ Mukonda ndjoyino, kapishi pakare ogho ana kukunenepitiro vya vantu. Momushi vininke navintje vyenu, ²² Akare Paurusi, ndi Appollosi, ndi Kefasi, ndi Udjuni, ndi liparu, ndi mfa, ndi vyantantani, ndi vya kumeho ko, navintje vyenu. ²³ Anwe kwahamena kwa Kristusi, ano Kristusi kwa Karunga.