¹ Un nɔ vi lɛ mi, e mawu ɖe e dɔmɛ kinkɔn xlɛ mi ɔ, nɔ fankpwe na mi fan a mi yi mi ɖe tɛtɛ i na ɖi vɔsanu gbɛɖe exe e yi ɖawan na Mawu, e mɔ jɛ enu kun ɔ mɔ ɖe. Kɛn mi wa sɛn ɖo, e mɔ nyi sinsɛn mɛ mɛ yi ɔ we nɛ. ² Mi ma nɔ bayi nu kɛn gbɛ ɔ bayi ɖo e, vɔ mi jo Mawu do ni trɔ mi zɔn mi ayi e titrɔ mɛ. Enɛ ɔ, mi la kpego mɔ nyɔ Mawu e jlo: E yi e nyi nu ɖagbɛ, nu exe jɛ enu kun ɔ, nu exe sɔgbe nu tɛtɛ mɔ gɔn ɖe go ɔ. ³ Ɖo nunina exe Mawu na mi zɔn e dɔmɛ kinkɔn mɛ ɔ, nɔ lɔ na mi e mɛ lokpo-lokpwe fan: Nɛ ma nɔ mɔ, mɛɖe zɛ nu exe e nyi ɔ go e do linlɛn eyɔ tete etɔn mɛ e, vɔ linlɛn exe eɖo do eyɔ tete go ɔ, ni nɔ jlɛ mɛ, kɛn Mawu na nuɖiɖi mɛ lokpo-lokpwe ɖo ɔ. ⁴ Wujɔnu susu e ɖe agbaza mi e mɛ lɛ lokpo-lokpo etɔn go, ye mɛ lokpo-lokpwe mɔ wa dɔn vovo. ⁵ Etɔnɛ ke ɔ, kɛn mi su ɖo ɔ, agbaza lokpo gee mi nyi ɖe kpwɛ exe mi ɖe ɖe Klisu mɛ ɔ, mi e mɛ tɛtɛ mɔca do wutugonu exe ɖe agbaza lokpo go ɔ ha. ⁶ Nu nina vovovo mi ɖo kɛn Mawu na mi ɛmɛ lokp-lokpwe ɖo ɔ, nɛ mɛ lele ɖo nunina, exe yi ewɛn ɖe Mawu si mɔ do ɔ, e ɖo a bayi kɛn mi ɖi nu na Klisu ɖo ɔ. ⁷ E nyi mɛ lele ɖo nu nina exe la wa Mawu e dɔn ɔ, ni wa. Mɛxe ɖo nu nina a kplɔnnu wu emɛ ɔ, ni kplɔnnu wu emɛ. ⁸ Mɛ xe ɖo nu nina e na okɔnkpinkpan wu emɛ ɔ, ɖo wa na okɔnkpinkpan wu emɛ. Mɛxe na nu wu emɛ ɔ, ni nɔ hun olɔ mɔ nɔ na nu wu emɛ. Mɛ xe nyi unkɔntɔ ɔ , ni bi do odɔn gɔ. Mɛ xe do lɔ gbɛdo nɔ lɛ ɔ, ni bayi gɔ jijwɛ. ⁹ Wanyiyi exe mi ɖo ɔ, ni sɔn odɔmɛ ganji, mi gbɛwan na nu nyinyla wiwa. Mi bi do ɖagbɛ wiwa go. ¹⁰ Mi nɔ ɖo wanyiyi tete na mi ɖe lɛ kɛn nɔvi-nɔvi nyi wan na eɖe ɖo ɔ. Mi nɔ ɖo sisi tete na mi ɖe. ¹¹ Mi bi do dɔn go, mi ma nɔ wa ɖiɖɔ e, akpakpa ni sɔ mi do Mawu e dɔn wiwa go. ¹² Nu exe mi nɔ ɖo okun ɔ, ni do jijwɛ na mi. mi nɔ ɖo sɔxwixwe, ɖe vivɛ e mi nɔ se lɛ mɛ. Mi nɔ bi do ɖexixo go. ¹³ Mi nɔ do lɔ nɔvi ɖe Klisu mɛ exe ɖe hudo mɛ lɛ.Mi nɔ yi mɛ exe wa mi kɛ lɛ ganji. ¹⁴ Mi nɔ byɔ Mawu fan ni xo eɖɛ do mɛ exe do aya na mi lɛ ji, mi nɔ byɛ fan ni xo ɖɛ do e ji, e ni ma do nugbɛn wi e. ¹⁵ Mi nɔ mɔ jijwɛ, mɛ xe nɔ mɔ jijwɛ lɛ ha, mɔ vi avi gɔ mɛ xe nɔ vi avi lɛ. ¹⁶ Mi nɔ ɖo linlɛn lokpo do mi ɖe go. Mi ma nɔ yi go e, mi ma ɖo okungbo e, vɔ mi nɔ din nu exe ɖe jlɛ mɛ ɔ. Mi ma nɔ mɔ miɖe lo mɔ nunyɔtɔ e. ¹⁷ Mi ma nɔ ze nu nyinyla lo su nu nyinyla e axɔ wu mɛ ti e. Mi nɔ din a wa nu ɖagbɛ ɖe gbɛtɔ lɛ tɛtɛ e unkɔn. ¹⁸ E nyi mi kpego ɔ, mi tɛnkpɔn zɔn olɔkpa tɛtɛ mɛ kɛn mi kpego ɖo ɔ, mɔ nɔ fifa mɛ gɔ gbɛtɔ lɛ tɛtɛ. ¹⁹ Mɛ vivɛna un tɔn lɛ, mi ɛ te lɛ mi ma nɔ vi hlɔn e, vɔ mi jo xomɛsin Mawu etɔn do ni nɔ wadɔn, ɖo ye wlan do Mawuxo wema mɛ fan, nyɔ eyi e vi hlɔn, nyɔ e yi e su nu exe e wa ɔ e axɔ mɛ, aklunɔ e lɔ etɔnɛ. ²⁰ E gɔ wlan do Mawuxo wema mɛ fan: E nyi xovɛ ci xi kɛntɔ, hun na nuɖuɖu wi, e nyi sinkɔmɛci ɔ, na sin wi. Nɛ o nɔ bayi etɔnɛ ɔ, inya la wɛɛ gbɔɔn e mɔ ci ɖi zokan e kpli do takun ni mɔ ɖe. ²¹ Ma jo i ɖe do nu nyinyla wiwa ni ɖu ɖe iji e, vɔ nɔ wa nu ɖagbɛ lo ɖu ɖe nyinyla ji.