¹ Enɛ e godo ɔ, ise igbe gbo ɖehwlɛn ɖi ɖe jihwle ɖikɛn emɛ susu enɔ lɔxo mɔɖe; igbe lɔ mɔnɔ lɔfan: "Aleluya Mawu ewa hwlɛgantɔ, susu gɔ hinhlɔn. ² E hwɛ sɔgbe mɔ nyi xonugbo, ɖo e ɖo kojo na ogalɔtɔ gbo éxe yi ogalilɔ etɔn lo nɔ hin awanglo lɔ gble lɔ. Mawu yi lo ba hlɔn, ɖo ehu e mɛsɛntɔ lɛ." ³ Egɔ lɔ fan: "aleluya! izo éxe nɔ fyɔ toho gbo lɔ e ozɔ nɔslo gbɛn losɔn." ⁴ Mɛxo kokun enɛ enɛlɛ gɔ inu ɖegbɛ enɛlɛ jɛklo ɖe Mawu e unkɔn lo nɔ sɛn, Mawu éxe ɖe awansinnɔ ɖe kɔsu zinkpoeji mɔ lɔ "Ami. Aleluya!" ⁵ E se igbe lohwlɛn ɖi ɖe Kɔsuzinkpwe lɔ kɔn, igbe lɔ mɔnɔ lɔ fan: "myɛlɛ emɛsintɔ Mawutɔnlɛ tɛtɛ; myɛlɛ emɛ éxé na bubu wilɛ, mɛxo gɔ vikpɛvu, mi kafu Mawu mitɔn." ⁶ Enɛ godo ɔ, i se igbe lohwlɛn ɖi gbɛtɔ susu e gbe mɔɖe; igbe lɔ ɖi esin e nɔ kɔnhwan gblogblogblo mɔɖe; e ɖe ɖikɛn jokun enɔ dogbe gɔdo hinhlɔn mɔɖe; i se e mɔnɔ lɔ fan: "Aleluya!o Aklunɔ Mawu mitɔn nutɛtɛgokpetɔ lɔ jɛ kɔsu ɖu ji! ⁷ Mi wa ami jɔji, mɔ kɔn dɔmɛ, mɔ kafu wi! Ɖo olɔ wiwli alinvi lɔ etɔn e gan xo, e gɔswɛ mɔ ɖocɔ. ⁸ E na acɛ esi fan ni do exwavɔn fɛ́ɖɛ́fɛ́ɖɛ́ mɛmɛyi éxé dazo, mɔ kɔn ɔ. Ɖo emɛɖedovo Mawu etɔn lɛɛ e dɔn enyi ixwanuvɔn fɛ́ɖɛ́fɛ́ɖɛ́ mɛmɛyi lɔ. ⁹ Ewɛnzangun lɔ lɔna fan: "Wlan: inu jɔhun na emɛ éxé eylɔ lo wa olɔwiwlinuɖuɖu alinvi lɔ etɔn gbe lɛɛ." Egɔ lɔ na fan: "Mawu e xojɔxo wenɛ. ¹⁰ I mɔ jɛ klo ɖe e ofɔ lɛɛ kɛ, mɔ ɖekɔ n'i, e mɔ lɔ na fan: "Bayi yɔ! ma bayi etɔnɛ e! Emɛsɛntɔ inyi ɖi oyɔ gɔ inɔvi lɛ́ɛ mɔɖe; i nɔvi éxé hɛn klunɖiɖe Yesu etɔn lɛ́ɛ ɔ. Mawu o wa ɖekɔ na!" Klunɖiɖe Yesu etɔn lɔ e yɔ e yi ixo éxé ixoyilɔ lɛ́ɛ la lɔ ɔ do ayimɛ nɛ. ¹¹ Enɛ lɔ e godo ɔ, i mɔ jihwle ɖe nuvo, isɔ weweyi ɖehwlɛn mɔ tɔn. Emɛ éxé ɖe isɔ lɔ ji ɔ, e nyikɔ nyi gbejinɔtɔ, mɔ nyi Titewungbe; e da ehwɛ, mɔ fun ahwan gɔdo ehwɛjijɔ. ¹² Okun etɔn lɛ́ɛ klɛn ɖi izo mɔɖe, kɔsugba susu mɔ ɖe e takun. E wlan nyikɔ ɖehwlɛn do ego, gbɛ mɛti go nyɔ nyikɔ enɛ ɖi eyɔ tete ha e. ¹³ E do awu zaa ɖehwlɛn , awu lɔ mɔ ɖeɖi ehunmɛ e ylɔn ɛn do mɔɖe; e nyikɔ enyi "Mawuxo". ¹⁴ Ahwanfungbɛ jihwletɔn lɛ́ɛ xwedi; emɔ ɖe izɔ weweyi ji; e do ixwnuvɔn fɛ́ɖɛ́fɛ́ɖɛ́ weweyi kinkɔn mɔ vioxwɛn. ¹⁵ Iji ɖiɖa ɖehwlɛn tɔn ɖe e kemɛ; iji ɖiɖa lɔ ela yi lo xo ito lɛ́ɛ. E la kpacɛ do e nugbɛn, acɛkpikpa etɔn la syɛn ɖi gankpo mɔɖe; e la kutu viwun sinsɛn lɔ de xomɛsin gbo Mawu inutɛtɛgokpetɔ lɔ e viwunto ɔ mɛ. ¹⁶ E wlan nyikɔ ɖehwlɛn do awu etɔn gɔdo ofɔ etɔn go; e wlan fan: "Kɔsu kɔsu lɛ́ɛ etɔn; Aklunɔ aklunɔ lɛ́ɛ etɔn." ¹⁷ Enɛ e godo ɔ, i mɔ ewɛnzangun ɖehwlɛn ɖete sɛzomɛ. E d'abobo igbe lélélé loxlan ɖi exɛ éxé nɔ zlɔn zɔn jihwle hwlan mɔ nɔ lɔ fan: "Mi wa; mi bɔ miɖée na inuɖuɖue gbo Mawu etɔn ɔ! ¹⁸ Mi we ɖu Kɔsu lɛ́ɛ e lan; mi we ɖu ahwanga lɛ́ɛ gɔdo asuka lɛ́ɛ e lan; mi we ɖu izɔ lɛ́ɛ gɔdo izɔjihɛtɔ lɛ́ɛ e lan; mi we ɖu gbɛtɔ lɛ́ɛ tɛtɛ e lan; kannumyɔn gɔ emɛ éxé ɖe eyɛtelɛsi lɛ́ɛ, mɛxo gɔ vikpɛvu e lan." ¹⁹ Enɛ e godo ɔ, i mɔ kanlin ɔ; i mɔ kɔsu awlango ji tɔn lɛ́ɛ gɔdo ahwangbɛ etɔn lɛ́ɛ; e bɔ mɔna fun ahwan gɔ emɛ éxé ɖe izɔ ji lɔ gɔdo ahwangbɛ etɔn. ²⁰ Ahwan wli kanlin lɔ gɔdo ewɛnzangunnyikɔjɛtɔéxé jlɛnu ɖe e owunkɔn lɔ. Inujijlɛ enɛlɛ eyɔ e lo flu emɛ éxé go kanlin lɔ e jesido ɖe, e mɔ yi lo sɛn kanlin lɔ e akpajlɛ lɛ́ɛ. Eyi kanlin lɔ gɔdo ewɛnzangunnikɔjɛtɔ lɔ gbɛgbɛ yi dun do izo hɛ́hɛ́ éxé mɛ hwemi nɔ hunɖe lɔ mɛ. ²¹ E yi iji éxé nɔ tɔn ɖe emɛ éxé ɖe isɔji lɔ e kemɛ lo hu emɛ éxé kpo lɛ́ɛ, exɛlɛ́ɛ tɛtɛ mɔ ɖu e lan mɔ jigo.