¹ Ewesu gbelokpo, Yesu mɔnɔ kplɔn inu wu emɛlɛ ɖe sinsɛnxɔmɛ lonɔ jla ewɛnɖagbɛ Mawu etɔn , ovɔsa na Mawutɔ galɛ gɔdo esɛnkplɔn emɛtɔ lɛ, fe gɔdo tomɛxolɛ wa Yesu kɛ, mɔnɔ lɔni fan: ² "Acɛ exe oɖo lonɔ inu enɛlɛ bayi tɔn lɔ nami" ; egloɔ mɔlɔ emɛ exe na acɛ lɔ wi nami. ³ Yesu mɔ ɖo ego nɛ fan: "inyɔfe la kan ixo lokpo se wumi . ⁴ Emɛ na acɛ Jǎan elo nylɔn emɛ do esinmɛ . Mawu nɛɛ . Alo gbɛtɔ lɛ nɛɛ . Mi lɔna ase. ⁵ Emɔ jɛ ayi kan ɖe eɖelɛmɛji fan: "nɛnyifan milɔni fan Mawu nɛɔ ela kanse wumi fan amu wtu mi go ɖinu na Jaan lɔe. ⁶ Vɔ nɛnyifan milɔni fan gbɛtɔlɛ nɛɛ ɔ, togun lɔ tɛtɛ la ɖun ekpɛn lo hu mi, ɖo emɛ tɛtɛ emɔ Jaan lomɔ xoyilodahwantɔ Mawu etɔn. ⁷ Emɔ gbɔjɔɛ ɖoegoni fan migo nyɔ emɛ exe na acɛ lɔ wie . ⁸ "Hun nyɔfe go na lɔ emɛ exe na acɛ wu lo nɔ inulɔlɛ bayi tɔn namie." ⁹ Enɛ ego Yesu dolo na emɛlɛ fan: "dahwe dehwlɛn ɖoxwanglo mɔ do viwun deji, mɔ yi xaya na viwun dɔn watɔ dehwlɛn lɛ mɔ sɔn hwɛn zɛgbemɛ na azan susu. ¹⁰ Exe viwun ɖiɖe egan xoɔ, dahwe enɛ yi devi etɔn lokpo ɖoxlan viwundɔn watɔ enɛlɛ nilo la yi viwun etɔn lo wani. Viwundɔ watɔlɛ mɔ xoe mɔ nyɛ asigba olɔgba ¹¹ Dahwelɔ gɔ yi devi owegɔ ɖohwlan, egɔ xo eyɔfe mɔ do nya wi mɔ nyɛ inuti mayi do lɔmɛ ni. ¹² Dahwelɔ mɔgɔ yi devi otɔngɔ ɖoxlan, egɔ xo eyɔfe mɔdo fɔku wi, mɔ nyɛ asigba olɔgba. ¹³ Dahwe gletɔexe we biɛ eɖemɛ mɔ kanxose wu eɖe fan: "amu la bayi ɖo tɛn ya . La yi unvi vivɛ loxlan. Tanyɔɔ ela ɖo sisi ni. ¹⁴ Vɔ, ganexemɛ glejikpɔntɔ lɛ mɔɛn ɔ, elɔ ɖe eɖelɛmɛ fan: "ivi cinɔ ɖutɔlɔ we. Ami hwi enɛɔ cinɔ mɔzun mitɔn." ¹⁵ Emɔ ɖetɔn ɖe viwungle lɔmɛ mɔ hwi. Tɛn ɔ, amu cica gletɔ enɛ la wewa enu ɖo . ¹⁶ Ela wa mɔ we clɔn viwunglecɔtɔ lɔlɛ mɔ yi viwungle lɔ yina emɛbulɛ. Exe ese ixo enɛ ɔ, emɔ fan, "Mawu nɛ ma lwɔn e ! " ¹⁷ Yesu mɔ kpɔn ɛn mɔ lɔ fan: "inugɔnmɛ sise lomu eɖe inu wiwlan exe si . "ekpɛn exe ixɔgbatɔlɛ zeglɛ ɔ wenyi xɔzoemɛ kpɛn . ¹⁸ Emɛ lele kpokpoe exe jɛ ekpɛn enɛji la gba , emɛ exeji e kpɛn lɔ jɛ ma kutu mɔ li kpɔɖɔ kpɔɖɔ." ¹⁹ Vɔ ɖe gan enɛlɔmɛ ke ovɔsana Mawu tɔ lɛ gɔdo esɛnkplɔnemɛtɔ lɛ mɔnɔ ɖe susu do kɛn elawli Yesu ɖogo, ɖo enyɔfan exo Yesu nɔ lɔ. Vɔ emɔ nɔ cwɔ na gbɛtɔ exe ɖe tɛnhwe lɔ mɛ lɛ. ²⁰ Emɔ jɛ Yesu cɔ ji mɔɖo emɛlɛ te ni nɛlokpɔn xie elajɛ esɛnmɛɖe ɖe exolilɔlɛ mɛ. enɛ ɔ, emɔ yisa na iga ehwɛɖɔtɔ gbolɛ. ²¹ Emɔnɔ kanse wi fan : "cica mi nyɔ en fan inu exe onɔ kplɔn lɛ tɛtɛ nyi xonugbo. Ogo kpɔn mɛti e kuntakun lolɔ ixoe, omɔ xlɛ Mawu emɔlɔ emɛ taun. ²² Eɖe esɛnlɔmɛ fan mila su takuɛ na Seza etɔn nɛ. Ɛ̌ alo òò. ²³ Yesu mɔ wlikun do emɛlɔgo mɔ egonɛ fan: ²⁴ "Mi yi ixwa HIɔmanulɛ etɔn lokpo na akpɔn. emɛ e nyikɔ ewlan dego . Emɔ ɖo egoni fan Seza e nyikɔ. ²⁵ Yesu mɔ ɖo egonɛ fan: "mi yi nuexe nyi Seza etɔn yi na Seza, mɔ mawu etɔn yi na mawu". ²⁶ Ego kpego mɔ wli ɖe exogbe ti mɛe. Ixo exe enɛ lɔlɛ tɛtɛ nɔ kpaca wi, emɔ gbɔjɔɛ bɔnui. ²⁷ AGgun gbɛ exe eylɔfan Saduseɛn lɛ wa Yesu kɛ. Eylɛ elɔ fan emɛ kuku lɛgo afɔn e , emɔ kanse wu Yesu fan: ²⁸ "Cica, esɛn exe Moyizi wlanɖawan nami san we : Nɛnyifan mɛ lele ɖo nɔ islun, mɔ ɖe nyɔ, mɔ ku jo nyɔsi lɔ do ivi maji, enɔvi lɔ la yi nyɔsi lɔ iɖe mɔjivi ɖego, loyi loyi enɔvi exe kulɔ enyikɔ ɖote. ²⁹ Nɔvi nɔvi acowe ɖehwlɛn lɛ mɔ ɖe. Emɛ tantɛn lɔ ku, ivi maji ɖe esigo. ³⁰ Emɛ owegɔ lɔ yi osukusi lɔ iɖe mɔku, ivi maji, emɛ otɔngɔ mɔ yi nyɔsi lɔ iɖe ivi maji. ³¹ Kɛn ezɔnɖo na nɔvi nɔvi acowe lɔlɛ wenɛ, eku ivi maji ɖe nyɔsi lɔgo. ³² Egodo ɔ, nyɔsi lɔ mɔwe ku. ³³ Gan exemɛ emɛkuku lɛ we fɔn ɔ, emɛ etɔn nyɔsi lɔ la we nyi. Ɖo eɖe islun acowe lɔ lɛ tɛtɛ. ³⁴ Yesu mɔ ɖoego nɛ fan islun gɔdo nyɔsi exe ɖe gbɛmɛ egbelɛ eɖe nyɔ mɔ ɖe osu. ³⁵ Vɔ, emɛ exe Mawu mɔ fan fɔnsɔnku jɛgɔdo ema nɔ egbɛ exe zwan lɛ gona ɖenyɔ gbɛ egona ɖe osue. ³⁶ Gbɛ ego na gɔ ku fee. Ɖo ela ciɖi ewɛnzangun Mawu etɔn lɛ ha, ema nyi Mawu evi. Ɖo efɔn ɖe emɛ kuku lɛ mɛ. ³⁷ Emɛkuku lɛ la fɔn lɔ exo Moyizi nɔ lɔ ɖe esɛnxoma exe lɔxo do nukan klewun exe izo sisuɛn mɔnɔbi lɔ go, gan exemɛ eylɔ Mawu fan Mawu Ablaxámu etɔn, Mawu Izaki etɔn, Mawu Jakɔbu etɔn. ³⁸ Tɛn ɔ, Mawu gɔ nyi emɛkukulɛ etɔn e, Mawu emɛ gbɛgbɛlɛ etɔn nɛ, ɖo ɖe Mawu e nkɔn ɔ, yɛmɛ tɛtɛ ɖegbɛ ³⁹ Esɛnkplɔntɔn Siklibu ɖehwlɛn lɛ mɔ ɖo ego ni fan : "cica olɔxo ganji". ⁴⁰ Gbɛ ego egɔ kanxo bu ti wie ⁴¹ Yesu mɔ lɔ nɛ fan: "amu ewalɔ fan klisu nyi Davidi evi ɖo . ⁴² Ɖo Davidi tete elɔɖe hanji xoma etɔn mɛ fan: "Mawu lɔna un Mawu fan: xinɔ awan ɖe un aɖisimɛ. ⁴³ Gbɔn na gan exemɛ la yi kɛntɔ itɔnlɛ lo bayi ofɔxomɛ susunu itɔn". ⁴⁴ Davidi ylɔ klisu fan "osintɔ", amu Yesu la gɔ nyi eviɖo". ⁴⁵ Gbɛtɔ lɛ tɛtɛ mɔnɔ ɖoto Yesu, emɔlɔna devi etɔn lɛ fan: " ⁴⁶ Micɔ miɖe esɛnkplɔnemɛtɔ, siklibu lɛgo, ɖo inu exe vivi nɛlɛ enyifan nɛɖe awuzaamɛ mɔnɔ ɖisa, emɔnɔ dogbe wi ɖe todogba lɛji ; edin wanɔsinawan ɖe zinkpoe unkɔn tɔn lɛji ɖe ikplɔnxɔlɛmɛ gɔdo ixwe ganmɛlɛ. ⁴⁷ E kpacɛ na osukusi enu lɛ, mɔnɔ acɛkpatɔn , mɔnɔ eɖɛ zaa lɛ xotɔn, nɛ lo ɖexlɛ emɛlɛ fan emɛ mɛmɛi enyi. Mawu la dɔnto nɛ.