¹ Nɔvilɛ, myɛmɛ éxé mɔ ɖo unkɔnsisɔ ɖe nuɖiɖimɛ lɛ ɔ mɛlele kpokpwe nɔ hu exwɛ emɔ kpoedo ɔ hun mi ɖe do mɔji, mimɔ bayi gɔdo odɔmɛ fifa. Mɔ gɔ nɔ lɛ na mi fan ami cɔ mi ɖe nɛ myɛtetelɛ ni ma we jɛ tintɛnkpɔn mɛ e. ² Mi hɛn mi agban lɛ gɔ miɖelɛ; nɛ mi bayi etɔnɛ ɔ, hun Klisu e sɛn lɛ we nɛ mi nɔ nyi. ³ E mɛ éxé mɔ eɖe lo mɔ inu gbo ɔ, gbɛ ego nyi inu ti e le ɔ, eɖe enɔ klɔɖu; ɖo ego wa nuti e. ⁴ Mɛ lokpo lokpwe ni byɔ eɖe mɛ mɔ kpɔn inu éxé enɔ bayi lɛ, nɛnyifan inu éxé enɔ bayi lɛ etɛnwun nyi jijwɛ ni ɔ, ni lɔ jijwɛ ɖe eɖe mɛ, ni ma jlɛ eɖe do mɛɖetɔlɛ go e. ⁵ ɖO mɛlokpo lokpo ɖo wa wadɔn éxé nyi etɔn ɔ. ⁶ Emɛ éxé enɔ kplɔn Mawuxo lɔ ɖo wa ma nu ɖagbɛ exe ɖesilɛ tɛtɛ gɔ emɛ éxé nɔ kplwɛn Mawuxo ɔ. ⁷ Mi ma klɔ miɖe ɖu e , mɛti go wa yɛ na Mawu e. Inu éxé e do eyi e gbɛn. ⁸ Mɛlele wa jlo nyinylan gbɛtɔ etɔn, jlo nyinylan gbɛtɔ etɔn la hɛn ku lowa ni. Mɛlele wa jlo gbigbɔ ɖedovo etɔn ɔ, gbigbɔ ɖedovo la na egbɛ magɔn magɔn wi. ⁹ Hun awakanmɛ ni ma ku mi do ɖagbɛ wiwa go e, ɖo nɛn awa kanmɛ go kumi e le ɔ, nɛ e gan we xo ɔ, mi la mɔ e ojɔ mɔ yi. ¹⁰ Nɛ e nyi etɔnɛ hun un nɔvilɛ, nɛ mi mɔ ɖagbɛ wiwa emɔ gan lele kpokpwe mɛ ɔ, mi nɔ wa na emɛtɛṭɛ. ɖe taji ɔ na nɔvi ɖe nuɖiɖimɛ lɛ. ¹¹ Tɛn ɔ, inyɔ tete enɔ wlan ixo éxé lɛ loxlan gɔ un olɔ. Nɛ mi mɔ mɔ kɛn xokunlɛ ga ɖo ɔ, mi la nyɔ fan nyɔ tete e wlɛn. ¹² Emɛ exe lɔ fan ada jɛn mi la gbo dandan lɛ, inu éxé enɔ din ɔ eyi enyi fan nɛ ɖexlɛ ɖe gbɛtɔ lɛ e unkɔn, ɖo e go jlo fan nɛ do aya na eyɛ Klisu exe ku ɖe otinsogaji wutu e. ¹³ Eyɛmɛ enɛlɛ tete go nyi esɛn enɛlɛ e. Ejlo fan ami yigbe mɔ gbo ada nɛ lo tɔfɔ awan fan eyɛ e gbo ada na mi. ¹⁴ Inyɔɔ inu lokpo éxé wutu lo tɔfɔ awa ɔ, eyɔ enyi ku éxé mi Aklunɔ Yesu Klisu ku ɖe otinsoga ji ɔ. Xonugbo ɔ, lozɔn iku Klisu etɔn ji ɔ, egbɛ ɔ e ku na , inyɔ fe imɔ ku na egɛ ɔ. ¹⁵ Ada gbigbo go wa nuti e, ada magbo fe go wa nuti e; inu éxé ɖe taji ɔ eyi enyi fan nɛnyi emɛ yɔyɔ. ¹⁶ Fifa gɔdo odɔmɛ jɔhun Mawu etɔn ninɔ kpwɛ gɔdo emɛ éxé jɛ tito enɛlɛ gun ɖe e gbɛzan mɛ lɛ ɔ mɔ nɔ kpwɛ gɔ emɛɖedevo Mawu etɔn lɛ tɛtɛ. ¹⁷ Bɛɖe tɛn ɔ, mɛti ni ma gɔ do tagba ti na e. ɖo abikpa éxé ɖe un go lɛ ɔ emɔ ɖexlɛ fan inyi Yesu Klisu etɔn. ¹⁸ Nɔvi lɛ mi, majɛna Aklunɔ mitɔn Yesu Klisu etɔn ni nɔ kpwɛ gɔ mimɛ tɛtɛ ! ami !