¹ Inyɔ Pɔlu éxé nyi emɛ ɖoloxlan KLISU Yesu etɔn , lo zɔn jlo Mawu etɔn mɛ ɔ éyi enɔ ɖo xoma éxé loxlan emɛɖedovo Mawu etɔn éxé ɖe Efɛzi mɔɖe gbeji ɖe kpwɛ éxé eɖe ɖe KLISU Yesu mɛ lɛ ɔ. ² Mi Mawu tɔ gɔ mi Aklunɔ Yesu Klisu ni na majɛna gɔ fifa mi. ³ Mi na nɛ ami do kpɛ na Mawu Aklunɔ mitɔn , Yesu Klisu etɔ, ɖo ena nu ganji gbigbɔ ɖedovo etɔn olɔkpa lɔkpa wu mi, mɔ yi lo xo eɖɛ do miji, ɖe kpwɛ exe mi ɖe Aklunɔ mɛ ɖe gbigbɔmɛ ɔ. ⁴ Ɖo feto Mawu a lo bayi egbɛ lɔ emɔ can mi , mi mɔ nyi etɔn ɖe Klisu mɛ, nɛ ami lo nyi emɛ kinkɔn, emɛ mɛ ma ɖo oblɔ ɖe e okunmɛ; ɖe e wannyinyimɛ ɔ, ⁵ Mawu mɔ to ɖawan fan eyɛ la yi mi lo bayi ivi zɔn Yesu Klisu ji . Ejlo etɔnɛ , ejɛ enukun etɔnɛ. ⁶ A mi do ekpɛ na Mawu ɖo e na e majɛna susunɔ lɔ gɔdo e jijwɛ mi, ɖe evi vivɛ ɔ mɛ. ⁷ Ɖo Mawu ɖe mi ɖe nu nyinylan mɛ, mɔ yi mi exwɛ lɛ ikɛmi zɔn Yesu Klisu e hunmɛ. Kɛn e ɖe e odɔmɛ fifa ma ɖo jlɛ ɔ hlɛmi ɖo ɔ wenɛ. ⁸ E na nu nyɔnyɔ enɛ wumi emɔ tunfla zɔn nunyinyɔ kpikpe gɔdo okunnu mɔjɛnumɛ kpikpe éxé ena mi ɔ mɛ. ⁹ Mawu ɖe nubuvo éxé emɔto mɔ lɔ gɔ ejlo fan eyɛ la bayi zɔn Klisu ji ɔ yi xlɛ mi. ¹⁰ Tito enɛ éxé Mawu bayi gɔn ɖe e ganmɛ ɔ, eyɔ enyi fan inu éxé eɖe jiwle lɛ, gɔdo éxé ɖe awngloji lɛ la kpli mɔnɔ galokpo gée gun; iga enɛ ewa Klisu. ¹¹ Kpwɛ éxé mi ɖe gɔ Klisu ɔ mɛ eyi mi mɔ hwlɛngan éxé nyi mitɔn ɔ yi ɖe; ɖo Mawu mɔ yi mi ɖawan ɖikɛn e mɔ bayi e tito ɖo ɔ; Mawu nu éxé mɔ sɔgbe gɔdo eyɔ tete e jlo mɔ lɔ ɖo ɔ. ¹² Mi mɛ Jwifu lɛ enyi emɛ tantɛn atɛn éxé enɔ ɖokun nu ɖe Klisu mɛ lɛ ɔ. Hun ami mɔ kafuwi mɔ kpa susu na Mawu etɔn. ¹³ Myɛlɛ emɛ éxé go nyi Jwiu lɛ fe ɔ, gan éxé mi se xonugbo e wɛn ɔ, wɛnɖagbɛ éxé hwlɛn mi gan ɔ exo ɔ, mi ɖinu na Klisu. Mawu mɔ na gbigbɔ ɖedovo e akpa éxé e do ɔ wu mi, mɔ yi lo ɖo untun wu mi. ¹⁴ Gbigbɔ wiwe eyi enyi inu mɛmɛyi éxé Mawu yi ɖawan na e togun ɔ, e yi e nyi jiɖiɖe na mi , eyɔ enyi jiɖiɖe na mi fan ganéxémɛ mi wa nyi Mawu etɔn tɛtɛ ɔ, mi la mwɛn yi . Hun ami mɔ kafun Mawu. ¹⁵ Enɛ ezɔn éxé nyɔ fe ilo se kɛn mi ɖinu na Aklunu Yesu ɖo, mɔ se kɛn mi nyi wan nan emɛɖedovo Mawu etɔn lɛ fe ɖo ɔ . ¹⁶ Go gbɛ ekpɛ dido naMawu do mi takun e. Nɔ xo eɖɛ ganlele kpokpwe mɛ ɔ, i flin mi. ¹⁷ I byɔ Mawu mi Aklunɔ Yesu Klisu éxé nyi tɔ susnɔ ɔ fan ni na gbigbɔ wu mi gan enɛmɛ ɔ gbigbɔ lɔ mɔ na nunyinyɔ wu mi, e mɔ ɖe emɛ éxé Mawu nyi ɔ xlɛ mi na mi lo nywɛn. ¹⁸ I byɛ fan nɛ bayi nɛ kinklɛn ni byɔ mi ayi lɛ mɛ, nɛ ami lo nyɔ inu éxé okun ɖiɖo éxé wutu e lo ylɔ mi ɔ nyi ɔ. Mwan nyɔ kɛn dɔkun éxé ɖe nu ganji ganji éxé e yi ɖawan na emɛ éxé enyi etɔnlɛ mɛ ɔ ɖo ɔ. ^{19 20 21 22} Gan enɛmɛ ɔ mi mɔ nyɔ acɛ gbo éxé enɔ wadɔn ɖe myɛmɛ éxé ɖinu ni lɛ mɛ ɔ, acɛ gbo enɛ lokpo ɔ eɖexlɛmi gɔ e hinhlɔn gan exe mɛ e fɔn Klisu ɖe ku lo wa egbɛ, mɔ ze i xinɔ oɖusimɛ ɖe yɛswimɛ ɔ. Ɖe xinɛ ɔ, Klisu e hugan igalɛ tɛtɛ , e hugan hinhlɔn lɛ tɛtɛ; e hugan acɛ kpikpa lɛ tɛtɛ; e hugan ganhwemɛtɔ lɛ tɛtɛ; lo jɛ inu éxé mɛlele anyi ɔ e hugan tɛtɛ, e go nyi gbɛmɛ yie , e hugan inu tɛtɛ ɖee. Egɔ hugan nu tɛtɛ ɖe egbɛ éxé zwan ɔ mɛ. Mawu yi nu lɛ tɛtɛ yi do Klisu e acɛmɛ mɔ yi iɖo ogun ɔ nugbɛn, emɔ nyi iga gbo tɛtɛ ɔ. Ogun Mawu etɔn ɔ Klisu e agbaza nɛ , Klisu éxé kpacɛ na egbɛ ɔ tɛtɛ ɔ, ogun lɔ mɛ eɖe tɛtɛ blebu.