¹ Un nɔvi lɛ mi , na mi lo kpa ɔ, mi nɔ byɔ mi fan na mi nɔ xo eɖɛ na mi nɛ aklunɔ xo ɔ ni yawu gbakpe nɛ mɛlɛ ni lo kafu kɛn eɖe ɖo ɖe mikɛ ɔ. ² Mi gɔ xo eɖɛ na mi nɛ Mawu ni hwlɛn mi ɖe emɛ nyinylan gɔ emɛdida lɛ si, ɖo emɛ tɛtɛ gonɛ e ɖinu na wɛnɖagbɛ lɔ e. ³ Aklunɔ ɔ gbejinɔtɔ nɛ ela na hihlɔn mi mɔ cɔn olɔdo miji. Awovi gona kpe migo e. ⁴ Aklunɔ e na jiɖiɖe mi do migo, e na ganjɛgo mi fan mi bayi inu exe milɔ na mi lɛ ɔ, mi mɔ gbɛkpo nɔ bayi. ⁵ Aklunɔ ni wa dɔn ɖe ayimɛ na mi, mi mɔ nyiwan na Mawu , mɔɖo hunkuku éxé Yesu na emɛ ɔ ! ⁶ Nɔvi lɛ mi , mi nɔ byɔ mi ɖe Aklunɔ Yesu Klisu e nyikɔ mɛ fan mi ni nɔ ozɔga na mi nɔvi éxé nɔ ɖiɖɔ gbɛmɛ ma jlo awa nuti e ma jlo wa jɛ inu éxé mi kplɔnen lɛ gun e. ⁷ Myɛlɛ tete ɔ, kɛn mi wa wanu ɖi myɛlɛ ha ɔ , mi nyɔ ganji; ɖo ganéxé mɛ mi ɖe mikɛ ɔ mi go wa ɖiɖɔ e; ⁸ Mi go ɖu mɛti e nuɖuɖu mɔ gbɛ axɔ susu e, nɛ miwa lɔ, mi jɛ tagba mɔ wa dɔn kɛnklo gɔ ozan, ma nɔ kɔ na mɛnti. ⁹ Ego wa fan mi gbɛ acɛ éxé la ɖu mi nu mɔ gbɛ axɔ susu ɔ ɖiɖo wutu gonɛ mi lo bayi etɔnɛ e.Mi wanu zɔn etɔnɛ lona kpwɛ éxé gun mi wa jɛ ɔ mi. ¹⁰ Xonugbo ɔ, gan éxémɛ miɖe mikɛ ɔ, mi mɔ lɔ na mi fan emɛ éxé go jlo wa wadɔn e le ɔ ni ma ɖunu fée. ¹¹ Mi nɔ lɔ xo nami etɔnɛ, ɖo mi se fan emɛ nehwlɛn lɛ ɖe mimɛ mɔ nɔ ɖiɖɔ gbɛmɛ, gbɛ e go din awanu ti zɛ ela ɖe nugbɛn do mɛbu lɛ e xo mɛtɔn e. ¹² Emɛ enɛlɛ ɔ, mi nɔ ɖe esi mɔ gɔ nɔ zwɛn ɖe Aklunɔ Yesu Klisu e nyikɔ mɛ fan nɛ ma nɔ yan ixo gbée , nɛ nɔ do vivɛnu do idɔn go , mɔ lo tɛn kpego lo nyi eɖe. ¹³ Nɔvi lɛ mi, ɖagbɛ wiwa ni ma cikɔ na mi e. ¹⁴ Nu exe mi nɔ kplɔn mi ɖe xoma éxé mɛ , nɛ mɛti go bayi deji e le ɔ, mi ɖo ayi eji, mɔ gbɛ e ha dido nɛ inya ni wɛ. ¹⁵ Vɔ, mi ma yi lo bayi kɛntɔ e, vɔ mi kplɔn nu wi ɖi nɔvi mɔɖe. ¹⁶ Aklunɔ éxé na fifa emɛ ɔ, eyɔ tete ni na fifa mi gan tɛtɛ, zɔn olɔkpa tɛtɛ mɛ. Aklunɔ ni nɔ kpwɛ gɔ mi mɛ tɛtɛ. ¹⁷ Nyɔ Pɔlu tete e yi un olɔ lo wlan xogbe éxé lɛ: I dogbe nami, kɛn i do olɔ un xoma lɛ tɛtɛ mɛ wenɛ. Etɔnɛ i wlannu ɖo. ¹⁸ Majɛna Aklunɔ mitɔn Yesu Klisu etɔn ninɔ kpwɛ gɔdo mɛtɛtɛ !