¹ Inyɔ Pɔlu gɔ Silasi gɔdo Timɔtée e wlan xoma éxé loxlan ogunvi éxéɖe Tesaloniki mɔɖe kpwɛ gɔ Mawu tɔɔ gɔ Aklunɔ Yesu Klisu ɔ; ² Mawutɔ gɔ Aklunɔ Yesu ni na Majɛna gɔdo fifa mi ! ³ Nɔvilɛ mi, mi ɖo anɔ ekpɛ dona Mawutɔn gantɛtɛmɛ do mi takun. Esɔgbe fan nami nɔ bayi etɔnɛ, ɖo nuɖiɖi éxé mi ɖo ɔ nɔ sɔn unkɔn tawun; wannyinyi éxé lokpo lokpoé mitɔn lɛ ɖo na miɖé ɔ mɔnɔ jɛji. ⁴ Enɛ wutu eyɔ mi lo go ɖe ogun Mawutɔn ɖelɛ mɛ do myɛlɛ wutu; kɛn mi ɖo ɖɛɖɛ ɖo ɖe takpa éxé enɔ do na milɛ gɔ vivɛ éxé minɔ se lɛ nugbɛn, mɔnɔ do vivɛnu mɔ gbɛkpo nu ɖo nuɖiɖi eyi e zɔn mi lo go. ⁵ Enɛ ɖexlɛ fan ehwɛ lilɔ Mawu etɔn sɔgbe; Mawu la yi mi lo bayi emɛ éxé jɛ gɔdo e kɔsu ɖuɖu wutu mi lo ɖu aya , ɖo mi ɖɛ ɖe inu lɛ tɛtɛ nugbɛn. ⁶ Ɖo Mawu la wa inu exe sɔgbe ɔ, e la do aya na emɛ éxé nɔ do aya nami lɛ; ⁷ Gan éxé mɛ Aklunɔ Yesu gɔ e wɛnzangun hinhlɔn nɔ lɛ la lɛɖe jihwle mɔ zɔn zo hɛhɛ cɛncɛn lo wa ɔ , e la na gbɔjwɛ myɛ emɛ éxé e nɔ do aya na tɛn lɛ. ⁸ ma na gbɛjwɛ myɛlɛ fe mɔ dɔnto na emɛ éxé go nyɔ Mawu lɛ gɔdo emɛ éxé go setonu na wɛnɖagbɛ éxé lɔxo do mi aklunɔ Yesu e xo go lɛ e. ⁹ E la yi ku magɔn magɔn lo dɔnto nɛ; e la ɖée do ozɔga na xie Aklunɔ ɖe ɔ, e la ɖe do zɔga na Aklunɔ e hinhlɔn susunɔ lɔ. ¹⁰ E la wa gbe enɛgbe na emɛ éxé nyi etɔn lɛ ɔ mɔ kafu wi enu mɔ jɛ emɛ éxé ɖinu ni lɛ tɛtɛ nukun, myɛlɛ fe la nɔ emɛ enɛ lɛ mɛ; ɖo mi ɖinu na e xo éxé mi we lɔ na mi ɔ. ¹¹ Enɛ wutu mi lo nɔ eɖɛ xo na mi tɔn gantɛtɛmɛ. Mi byɔmi Mawu fan ni bayi na mi nyi emɛ éxé jɛ gɔdo egbɛ éxé wutu e lo ylɔ mi ɔ.Mi byɛ fan zɔn e hinhlɔn mɛ ɔ ami bayi inu mɛmɛyi éxé mi jlo a wa lɛ tɛtɛ, nɛ bayi nɛ nu tɛtɛ ni gɔn ɖe inuɖiɖi dɔ éxé mi nɔ wa ɔ go; ¹² Gan enɛmɛ ɔ, lo zɔn mi Mawu gɔdo Aklunɔ Yesu Klisu e majɛna mɛ ɔ, e la kɔ mi Aklunɔ Yesu e nyikɔ do jihwle zɔn miji, ma yi myɛlɛ fe e nyikɔ do jihwle zɔn eyɔ ji.