¹ Jɔ otɔn gɔ we izwan mikɛ. Kɛn Mawuxo xoma ɔ lɔ ɖo ɔ, "edo ehwɛ mɛlele ɔ, emɛ owe alo emɛ otɔn ɖo wa ɖe klun na". ² Nɔ lɔ xo ɖewan na emɛ nɛhwlɛn, mɔ lo lɔ na emɛ éxé mɔ hu ehwɛ we nya lɛ gɔ emɛɖetɔlɛ tɛtɛ; mɔ nɔ lɔnami gan éxé mɛ i wa mikɛ jɔ owegɔ ɔ; vɔɔ gɔ nɔ vɔ tɛn éxé iɖe ozɔga ɔ. Tɛn tɔn éxé la wami kɛ ɔ, go na kpɔ mɔlɔ gɔ emɛti e. ³ Mi nɔ din inu éxé ɖexlɛ fan Klisu lɔxo zɔn unji ɔ; mɔ wa ɔ mi la mɔ. Klisu go wa emɛ ma ɖo hinhlɔn e nu lele ɖe mi cɛncɛn e; vɔɔ, e hinhlɔn eyi e ɖexlɛ ɖe mi cɛncɛn. ⁴ Xonugbo nɛ; e kɛ do otinsogaji ɖe e hinhlɔ maɖo go; vɔɔ, eɖegbɛ ɖe hinhlɔn Mawu etɔn mɛ. Ɖe ikpwɛ éxé mi ɖe gɔdi ɔ mɛ ɔ, myɛlɛ fe go ɖo hinhlɔn e; vɔɔ, mi la ɖexlɛ mi fan myɛlɛ gɔdi ɖe gbɛ zɔn hinhlɔn Mawu etɔn mɛ. ⁵ Mi jlo mi ɖe mɛ kpɔn , mɔ keje mi ayimɛ kpɔn fan eyɛ zan egbɛ ɖe inuɖiɖiemɛ jaa? ⁶ Mi nyɔ fan Yesu Klisu ɖe mǐ cɛncɛn; etɔnɛ gonɛ? Afi nɛ mi gawan ɖe mi tintɛnkpɔn. Vɔɔ, i ɖi fan mila nyɔ fan myɛlɛ ɔ, mi go jawan ɖe tintɛnkpɔn mɛ e. ⁷ Eɖe etɔnɛ co, mi nɔ ɖe kuku na Mawu fan ami ma bayi inu nyinylan lele; e go wa fan mi la ɖexlɛ zɔ xie fan e mɔ do mikpɔn nɛ é; vɔɔ, nɛ egɔ lo nyi fan mi mɔ jawan ɖe tintɛnkpɔn ha ɔ, a mi mɔ mi ɖe inu dagbɛ wiwa mɛ. ⁸ Ɖo mi go kpego a wa nuti, kewun emɔ tɔnvo na xonugbo Mawu etɔn e, xonugbo Mawutɔn jɛn mila tɛn kpego yi lo wanu. ⁹ Gan éxé mɛ mi go hinhlɔn é le ɔ, kewun myɛlɛ mɔ ɖo ɔ, mi mɔ jijwɛ; enɛ e wanu, mi gɔ byɔ ɖe mi eɖɛlɛ mɛ fan a mi tlɔzun inu ɖagbɛ watɔ gbɔn losɔn. ¹⁰ Inu éxé wanu lo ɖe ozɔga lo nɔ wlan inu enɛlɛ tɛtɛ loxlan mi ɔ we: eyɔ enyi fan, gan éxémɛ la we nɔ mikɛ ɔ, ama kpɔndo acɛ éxé Mawu na go, mɔ nylanhun do migo e; acɛ enɛ éxé Aklunɔ na ɔ, edɔn nɛ fan nalo dolɔ mi, na mi losɔn owunkɔn ɖe inuɖiɖimɛ; ego wa fan la lo dɔn mi do ogodo nɛ e. ¹¹ Nɔvilɛ mi, tɛn ɔ, e sɔn gbenɛhwlɛn gbe ! Mi do hinhlɔn mɔ nyi inu ɖagbɛ watɔ losɔn ; mi do igan lanmɛ na miɖe; mi ɖo gbekpwɛ; mi fa odɔmɛ do miɖe go ; enɛ ɔ, Mawu wannyinyin gɔ fifa nɔɔ la nɔ kpwɛ gɔ mi. ¹² Mi ki nɔvi nɔvi e si na miɖe, lo dogbe miɖe. ¹³ Emɛɖedovo Mawu etɔn lɛɛ dogbe loxlan mi. ¹⁴ Majɛna Aklunɔ Yesu Klisu etɔn gɔ wannyinyi Mawu etɔn, gɔdo kɔdokpɔ gbigbɔ ɖedovo etɔn ni nɔ kpwɛ gɔdo myɛmɛ tɛtɛ!