¹ Inyɔ Pɔlu éxé Mawu emɛhwlɛngantɔ mitɔn , gɔdo Klisu Yesu éxé nyi okunɖiɖo mitɔn ɖegbe, i mɔ nyi emɛɖoloxlan Klisu Yesu etɔn ɔ, ² e wlan xoma éxé loxlan oyɔ un vi jijiɖe nuɖiɖi mɛ Timɔtée. Mawu itɔ gɔdo Aklunɔ mitɔn Klisu Yesu ni na majɛna wi, mɔ kpɔn dɔnuɖunu nɛ, mɔ na fifa wi. ³ Nɔ Efɛ́zi kɛn ilɔ nɛ ɖo gan éxé mɛ i yimɔdo Masedwani ɔ; emɛɖehwlɛn lɛ ɖe hinɛ, mɔ nɔ inu éxé go sɔgbe gɔ nuɖiɖi mitɔn lɛɛ kplɔn emɛlɛ tɔn; o ɖo a togbe wi. ⁴ Lɔ nɛ fan nɛ jo xɛxo gɔ kanfifɔ magbɔjwɛdo, ɖo inu enɛlɛ ɔ, aɖikan ehɛn lowa, gbɛ ego lunwɔn mɛlɛ lo nyi inujikpɔntɔ Mawu etɔn mɛmɛyi ɖe nuɖiɖimɛ e. ⁵ Inu éxé wutu ilɔ etɔnɛ enyifan iunkplɔn emɛ mitɔn lɛ ɖola dolɔwu mi, mi mɔ ɖo wannyinyi éxé tɔn ɖe ayi kinkɔn mɛ ɔ; wannyinyi éxé tɔn ɖe linlɛn ɖagbɛmɛ ɔ; wannyinyi éxé tɔn ɖe nuɖiɖi jɔ nuɖiɖimɛ ɔ. ⁶ Emɛ ɖehwlɛn lɛ lɛkɔ ɖe walɔ enɛlɛ gódo, mɔ we kpo na adixo lɛ ɖoɖo, gbɔn bu ɖ'émɛ. ⁷ E jlo wa nyi esɛnkplɔn emɛtɔ, ego mɔ kunnu jɛ inu éxé eylɛtete mɔ lilɔ tɔn lɔ mɛ e; ego mɔ kunnu jɛ inu éxé ji e tɔ eɖɛ tawun, mɔnɔ lilɔ tɔn lɔ e. ⁸ Ɖe xonugbo mɛ ɔ, mi nyɔ fan esɛn ɔ, inu mɛmɛyi nɛ, nɛnyifan e yi lo wadɔn kɛn ejɛ ɖo ɔ wenɛ. ⁹ Ɖe taji ɔ, eɖo wa flin fan ego nyi inu jijɔwatɔlɛ wutu edo esɛnlɔ e; vɔɔ, emɛ éxé wutu edo esɛnlɔlɛ enyi nunyinylanwatɔ lɛ́ɛ, tonumasetɔ lɛ́ɛ, emɛ éxé go si Mawu lɛ́ɛ, ehwɛhutɔ lɛ́ɛ, emɛ éxé go nyi emɛkinkɔn lɛ́ɛ, emɛ éxé go ɖinu na Mawu lɛ́ɛ, emɛ éxé hu etɔ alo enɔ lɛ́ɛ, emɛhutɔ lɛ́ɛ. ¹⁰ Nuɖuedwiwatɔ lɛ́ɛ, islun éxé ɖoxo gɔdo ehagbɛ islun lɛ́ɛ ɔ, nyɔsi éxé ɖoxo gɔdo ehagbɛ nyɔsi lɛ́ɛ ɔ, kannumyɔjɔwatɔ lɛ́ɛ, aɖingbannɔ lɛ́ɛ, emɛ éxé ta nugbɛn do awoji lɛ́ɛ, gɔdo emɛ éxé wanu éxé go sɔgbe gɔdo inukplɔn emɛ adodowe lɔ lɛ́ɛ e. ¹¹ Ewɛnɖagbɛ éxé e yi do olɔmɛ na mi, e mɔ lɔxo do Mawu nyɔna tɛtɛ nɔ e kafu go ɔ, mɛ emɔ inukpɔn emɛ enɛ lɔ ɖe. ¹² Ido ekpɛ na Akunɔ mitɔn Klisu Yesu éxé na igan wu, na lo wa idɔn untɔn. I do ekpɛ n'i, e mɔ fan i nyi emɛ ema ɖeji do ungo, i do ekpɛ n'i, ɖo e can alo wa idɔn n'i. ¹³ Co isan ɔ, i mɔ lɔ xo nyinylan dego, mɔ do aya n'i, mɔ lɔ adanu n'i kpɔn. Vɔɔ, e kpɔn donuɖunu na, ɖo ɖe gan enɛmɛ ɔ, igo ɖinu n'i e, gbɛ go nyɔ inu éxé nɔ wa e. ¹⁴ Aklunɔ mitɔn mɔ kɔn Majɛna etɔn do unji, e mɔ su tawun; ena inuɖiɖi gɔdo wannyinyi éxé mi ɖo ɖe Klisu Yesu mɛ lɔ mi. ¹⁵ Xojɔxo lokpo we, emɔ jɔhun fan mɛtɛtɛ ni yi; eyɔ enyi fan Klisu Yesu wa egbɛlɔmɛ, ma hwlɛn ehwɛhutɔ lɛ gan; inyɔ mɔnɛ nyi ehwɛhutɔ wu ehwɛhutɔ lɛɛ tɛtɛ. ¹⁶ Vɔɔ, enɛlɔ wutu Mawu kpɔn dɔnuɖunu na; ejlo fan Yesu Klisu ni ɖe ohyɔjisinsɔn etɔn tɛtɛ xlɛ zɔn inyɔ enɛ éxé enyi ehwɛhutɔ hugan wu ehwɛhutɔ lɛ́ɛ tɛtɛ e gbɛzan mɛ, na lo nyi kpɔwɛ na emɛ éxé le we ɖinu n'i, ma mɔ egbɛ magɔn magɔn lɛ́ɛ tɛtɛ. ¹⁷ Kɔsu magɔn magɔn éxé go ku gbléé le ɔ, Kɔsu éxé ego mɔ ɔ, Kɔsu éxé nyi Mawu lokpo géé éxé ɖée; nɛwli yɛyi n'i, mɔ kafu wi gbɔɔn losɔn magɔn magɔn. Amǐ ! ¹⁸ Un vi Timɔtée, nɔ zɔ inu éxé wi, emɔ sɔgbe gɔ inu éxé Mawu lɔ fan ela jɔ do iji lɛ́ɛ, emɔ lɔnɛ san. Wado ixo enɛlɛji, nɔ lo fun ahwan mɛmɛyi lɔ, ¹⁹ gɔdo inuɖiɖi, gɔdo linlɛn ɖagbɛ. Emɛ ɖehwlɛn lɛ́ɛ gbɛ fan eyɛlɛ go na xwedo inu éxé linlɛn eyɛ tete etɔn nɔ lɔ na eyɛ e, emɔ kundo enɛlɔgo, inuɖiɖi etɔn mɔ jawan. ²⁰ Imɛnɛɛ gɔdo Alɛsandlu ɖe emɛ enɛlɔlɛ mɛ. I jo e do na Satáan, nɛ lo nyɔ fan eyɛlɛ go na gɔ lɔ ixo nyinylan do Mawu go kpɔn gblée.