¹ Inyɔ Pɔlu gɔ Silasi gɔdo Timɔtée enɔ wlan xoma éxé loxlan ogunvi éxé ɖe Tɛsaloniki mɔ ɖe kpwɛ ɖe Mawutɔ gɔdo mi Aklunɔ Yesu Klisu mɛ ɔ: Mawu ni na fifa gɔdo majɛna wu mi ! ² Mi do ekpɛ na Mawu tɛgbɛ do myɛ mɛ tɛtɛ takun, ³ mi mɔ flin mi gan tɛtɛmɛ ɖe mi eɖɛ lɛmɛ. Xonugbo ɔ, ɖe mi Mawutɔ e nukɔn ɔ, mi flin kɛn mi yi mi nudiɖi lo wadɔn ɖo ɔ, mi flin kɛn mi wa wannyinyi dɔn ɖo ɔ, okun éxé mi nɔ ɖo mi Aklunɔ Yesu Klisu ɔ, kɛn mi lido ɖemɛ ɖo ɔ , mi flin. ⁴ Nɔvi lɛ mi , mi nyɔ fan Mawu nyi wan na mi, mɔ yi mi na mi lo nyi etɔn. ⁵ Ɖo mi jla wɛnɖagbɛ do mi; gbɛ mi go jla do nugbɛn go kpowun; vɔ, mi jla do mi gɔdo hinhlɔn, gɔdo alɔdo gbigbɔ ɖedovo etɔn, gɔdo olɔdo gbigbɔ ɖedevo etɔn, gɔdo jiɖiɖe tete exeɖe wɛnɖagbɛ lɔ mɛ ɔ. Mi nyɔ kɛn mi zan mi egbɛɖo ɖe mi cɛncɛn do ɖagbɛ mitɔn wutu. ⁶ Kɛn mi wanu ɖo gɔ kɛn Aklunɔ wanu ɖo ɔ gun mi jɛ lo wanu; ɖo mi se vivɛ tete co mi mɔ yi Mawuxo ɔ gɔdo jijwɛ éxé gbigbɔ ɖedovo na emɛ ɔ; ⁷ enɛ ezɔn mi lo tlɔzun kpɔndego na Klisusɛntɔ éxé ɖe Masedwanilɛ gɔdo exe ɖe Akayilɛ . ⁸ Ɖo Aklunɔ e xo ɔ mikɛ e lɛɖe emɛ susu lo se; e go wa Masedwani gɔ Akayi lokponɔ e se ixo enɛ ɖée; vɔ, xitɛtɛ eyɔ nuɖiɖi éxé mi ɖo na Mawu ɔ kpakpe; mi go na gɔ jɛ tagba lo lɔ enɛ e. ⁹ Mɛlɛ tɛtɛ e lɔ kɛn mi yi mi ɖo gan éxé mɛ mi wa mikɛ ɔ; mɛlɛ tɛtɛ e lɔ kɛn mi jo inu mɛsɛn lɛ do ɖo, mɔ tlɔ jɛ Mawu gbɛgbɛ ɔ, Mawu xonugbo ɔ e mɔji , ma lo wadɔn ni; ¹⁰ ma nɔte kpɔn fan evi Yesu ni lɛkɔ ɖe sɛwɛ lo wa ɔ. Evi enɛ e fɔn ɖe ku mɔ hwlɛn ɖe xomɛsin Mawutɔn éxé zwan lɔ mɛ.