¹ Inu éxé kan ixo éxe na egbɛ mɛ ɔ eyi mi nɔ lɔ lohlan mi. Ixo enɛ mɔɔ ɖée ɖe bibɛ nugbɛn nulɛ etɔn elɔxo mimɔ se. Mimɔmɔ gɔdo miokun: mimɔmɔ ɖolɔ ego. ² Gan éxé igbɛ enɛ wa ɔ, mi mɔ ɛ, enɛ wutu milo lɔ ixo na mi , mɔnɔ lɔ egbɛ magɔn magɔn éxé mɔɔ ɖe itɔ lɔ kɛ, emɔ ɖexlɛ mi ɔ eklun na mi, mɔnɔ lɔ ixo na mi. ³ Inu éxé mi mɔmɔ se ɔ, mi nɔ lɔ́ na miɛlɛ fe , a mi lo nɔ kpwɛ gɔdo miɖe kpwɛ éxé mi ɖe gɔdo tɔ́ ɔ gɔdo evi Yesu Klisu ɔ mɛ. ⁴ Mi nɔ wlan nu enɛ lɛ lohlan, nɛ mi e jijwɛ ni nyi jijwɛ kpikpe. ⁵ Ewɛn éxé mi se ɖe Yesu Klisu nugbɛn, mɔnɔ do na mi ɔ, eyi enyi fan Mawu nyi kinklɛn, gbɛ zinvlu ti go ɖe ego e. ⁶ Nɛ mi lɔ fan mi ɖe kpwɛ gɔdo Mawu mɔ gɔkpo mɔnɔ zan egbɛ zinvlu mɛ tɔn ɔ, hun awo mi nɔ ɖo ɖe xolilɔ mɛ, gɔdo mi nu wiwa lɛ mɛ. ⁷ Vɔɔ, nɛ mi nɔ zan egbɛ ɖe kinklɛn mɛ ɖikɛn Mawu tete ɖe kinklɛn mɛ ɖo ɔ, hun mi ɖe kpwɛmɛ gɔdo miɖe lɛ, evi Yesu Klisu e hun mɔlɛ mi we ́ ɖé́ mi ehwɛ lɛ tɛtɛ mɛ. ⁸ Nɛ mi lɔ fan ehwɛ ti go ɖe kɔ nami le ɔ, hun mi nɔ klɔ miɖe ɖu, gbɛ xojɔxo lɔ go ɖe mimɛ e. ⁹ Enyi fan mi lɔ mi ehwɛ lɛ na Mawu ɔ, mi yi ɔ, mila ɖeji dego, ɖo inu jijɔ e wa; ela yi mi ehwɛ lɛ yi kɛ mi, mɔ lɛ mi we ɖe inu nyinylan éxé mi wa lɛ tɛtɛ mɛ. ¹⁰ Nɛ mi lɔfan mi go hu ehwɛ ti lɛɔ, hun Mawu mi nɔ ylɔ fan owo lótɔ́ wenɛ gbɛ e xo go ɖe mimɛ e.