¹ Nɔvilɛ mi, gan éxémɛ ilo wa mikɛ a lo lɔ inu wiwla Mawu etɔn e xo na mi ɔ, i go zan xogbe huhlu, alo inunyinyɔ xwitixwiti lele lo lɔxo na mie. ² Ɖo imɔ lɔ fan gan éxé wa nɔ mikɛ na tɛtɛ ɔ, go na nyɔ nuti nya Yesu Klisu go e; ɖe taji ɔ, Yesu Klisu éxé eka do otinsoga ji e. ³ Enɛ ewanu ilo wa mikɛ, hinhlɔn maɖo, gɔ cicwɔ, gɔ sisisɔ. ⁴ E go wa nunyinyɔ gbɛtɔ etɔn vivilɛ eyɔ ikɔ lo kplɔnnu mi e, gbɛ ego nyi eyɔ ilo lɔ Mawuxo na e; vɔɔ, gbigbɔ Mawu etɔn e hinhlɔn e nu wiwa nɛ. ⁵ Enɛ ɔ, mi nuɖiɖi go sinɔ gbɛtɔlɛ etɔn ji e; vɔɔ, hinhlɔn Mawu etɔn ji eyi e sinɔ. ⁶ Eɖe etɔnɛ co , nɔ kplɔn inunyinyɔ nɛhwlɛn Klisusɛntɔ éxé mɔ sin ɖe nuɖiɖimɛlɛ; vɔɔ, inunyinyɔ enɛ go wa gbɛmɛ xie e tɔn e; gbɛ e go wa hinhlɔn éxé nɔ kpacɛ ɖe gbɛ éxé mɛ kewun emɔ we hu acɛ na lɛ e. ⁷ Oo! inu nyinyɔ enɛ gonɛ nɔ jla e. Nunyinyɔ Mawutɔn éxé nyi nuhwihwla Mawu mɔ yi hwla do gbɛtɔ lɛ ɔ, eyɔ nɔ jla; nunyinyɔ enɛ Mawu mɔ yi ɖawan na mi susu feto egbɛ lɔ lo jɔ. ⁸ Hinhlɔn egbɛ éxé mɛ tɔn lɛ go lele go nyɔ inu nyinyɔ enɛ san e; nɛ emɔ nyɔ nɛ ɔ, e gona zɔn fan nɛ ka Aklunɔ susunɔɔ do otinsoga ji e. ⁹ Vɔɔ, kɛn Mawuxo xoma ɔ mɔ lɔɖo ɔ: "inyu éxé mɛlele go mɔ kpɔn kple, gbɛ go se kpɔn gble le ɔ, imu éxé mɛlele go bu kpɔn gble le ɔ, Mawu bayi inu en elɛ ɖawan na emɛ éxé nyiwan ni lɛ. ¹⁰ Myɛlɛ emɔ wa emɛ éxé Mawu ɖe inu hwihwla emɛ xlɛ zɔn gbigbɔ ɖedovo ji ɔ. Xonugbo, gbigbɔ ɖedovo ɔ dindo na inu tɛtɛgbɔɔn lo jɛ tito Mawu etɔn éxé ɖe hwihwla ɖe gɔngɔn mɛ lɛ feji. ¹¹ Ɖe gbɛtɔ nyinyi e mɔji ɔ, gbigbɔ exé ɖe gbɛtɔmɛ jɛn nyɔ inu éxé kundo gbɛtɔ go; etɔnɛ ke ɔ,gbigbɔ Mawu etɔn kɛɖɛ jɛn nyɔ inu éxé kundo Mawu go ɔ. ¹² Myɛlɛ ɔ, ego wa gbigbɔ éxé ɖe egbɛ éxé mɛ eyɔ ena mi e; vɔɔ, Mawu na gbigbɔ éxé lɛ ɖekɛ ɔ wu mi na mi lo nyɔ inu éxé Mawu na mi wɔnu lɛ tɛtɛ, ¹³ Mɔ nɔ ixo lɔtɔn. Ego wa xogbe éxé inu nyinyɔ gbetɔ etɔn kplɔn emɛlɛ eyɔ mi lo lɔ e xo e; vɔɔ, xogbe éxé gbigbɔ Mawu etɔn kplɔn emɛlɛ ɔ eyi milo lɔ. Emɛ éxé ji gbigbɔ enɛ ɖelɛ ɔ, kɛn mi ko xonugbo Mawu etɔn lɔ mɛ nɛ ɖo ɔ wenɛ. ¹⁴ Emɛ éxé Mawu etɔn e le ɔ go kpego wa yi nunina Mawu etɔn éxé gbigbɔ enɛ na emɛ lɛ e; lulunɔ eyɔ emɔ xo enɛlɛ lo mɔ; ego kpego a mɔ kunnu jɛ emɛ e, ɖo gbigbɔ Mawu etɔn jɛn wa tɛn kpego lo dindo na xonugbo Mawu etɔn lɛ. ¹⁵ Emɛ éxé ɖo gbigbɔ Mawu etɔn jɛn tɛn kpego a lɔ ehwɛ do nutɛtɛ; vɔɔ emɛti go kpego a lɔ ehwɛ do eyɔ e. ¹⁶ Ɖo Mawuxo xoma lɔ mɔ lɔ: "emɛ nyɔ Aklunɔ e bubulɛ," vɔɔ, myɛlɛ ɔ, bubu Klisu etɔn eyi mi ɖo.