¹ Inyɔ Pɔlu éxé Mawu ylɔ zɔn é jlo mɛ , na lo nyi emɛɖoloxlan Klisu Yesu etɔn , gɔdo mi nɔvi ɖe Klisumɛ Sositɛnu. ² Eyi e nɔ wlan xoma éxé loxlan ogun Mawutɔn éxé éɖé Kolɛnti ɔ, mɔnɔwlan loxlan yɛmɛ éxé Mawu ylɔ, e mɔ gbɛ nii, ɖe kpwɛ éxé éɖé ɖe Klisu Yesu mɛlɛ ɔ, mɔnɔ wlan loxlan emɛ éxé e nyi etɔn lɛɛ, gɔdo emɛ éxé énɔ mi Aklunɔ Yesu Klisu é nyikɔ ylɔtɔnɖé xilele kpokpwe eɖé lɛ tɛtɛ. Aklunɔ Yesu Klisu ɔ éyi ényi é Aklunɔ, mɔ nyi myɛlɛ fe etɔn. ³ Mi Mawu itɔ gɔdo mi Akmunɔ Yesu Klisu ni na majɛna gɔdo fifa etɔn myɛ mɛ éxé mɔ ɖe Klisumɛ lɛ tɛtɛ. ⁴ I do ekpɛ na Mawu gan tɛtɛmɛ do mi takun, ɖo majɛna éxé éna mi ɖe kpwɛmɛ éxé miɖe ɖe Yesu Klisu mɛ ɔ wutu. ⁵ Xonugbo ɔ, Mawu yi nunina lɛ tɛtɛ lo do dɔkun na mi, ɖé kpwɛmɛ éxé miɖé ɖé Klisu Yesu ɔ mɛ; ɖé taji ɔ, e nunina éxé kunkpla ixo lɔ lɛ, gɔdo éxé kunkpla okunnu mɔjɛnugo lɛ tɛtɛ la do dɔkun nami. ⁶ Klun éxé éɖé na Klisu ɔ, e li ɖe mimɛ tete tɔn. ⁷ Gbɛ inu nina Mawutɔn tiohwe do myɛmɛ éxé ɖetékpɔn gan éxé mɛ Mawu la ɖé Aklunɔ Yesu Klisu e. ⁸ Mi Aklunɔ Yesu Klisu ɔ eyɔ e wa hɛn mi , mi mɔ doɖɔdo kaka losɔn gigɔn nugbɛn; nɛ mɛti ni ma mɔ xo ti lɔ do migo ɖe aklunɔ Yesu Klisu azan gbée. ⁹ Mawu ɖe gbeji , eyɔ e ylɔ mi, na milo nɔ kpwɛ gɔdo é vi aklunɔ mitɔn Yesu Klisu. ¹⁰ Nɔvi lɛ, ɖe mi aklunɔ Yesu Klisu é nyikɔmɛ ɔ, nɔ byɔ mi fan myɛmɛ tɛtɛ ni ɖo gbe kpwɛ , nɛ kinklan ni manɔ mii cɛncɛn e; mi nɔ kpwɛmɛ ganji , mɔ ɖo linlin lokpo ɔ, nɛ ayilɛ ni nɔ lɔ ixo lokpo ɔ. ¹¹ Hun nɔvi lɛ xonugbo ɔ, Klowée é hɛnnu nɛhwlɛn lɛ é lɔ na fan jlɛ ɖe mi mɛ. ¹² Inu éxé nɔ lɔ mɔ lɔ etɔnɛ ɔ wée: myɛmɛ lokpo lokpo nɔ ixo voɖe voɖe lɔtɔn; emɛ nɛhwlɛn lɔ fan: " inyɔ ɔ Pɔlu etɔn inyi," mɛ nɛhwlɛn mɔ lɔ fan: " inyɔ ɔ Apolosu etɔn inyi" ; emɛ bu lɛ mɔ lɔ fan: ¹³ inyɔ ɔ Efazi etɔn inyi; emɛ bu lɛ fe mɔ gɔɔ lɔ fan Klisu etɔn inyɔ nyi. Inu éxé wa kanse mi ɔ, mi mɔ lomo Yesu Klisu ɔ éma eɖe do vovonɛ Pɔlu ɔ e ka do otinsoga ji do mi takun ? Pɔlu e nyikɔmɛ é yi yelɛ Mawu sin nami doo ? ¹⁴ I do ekpɛ na Mawu fan i go lɛ Mawusin na mɛti ɖe mimɛ zɛ Klisipusi gɔdo Gayiwusi go e. ¹⁵ Hun, emɛti go kpego alɔ ɖemimɛ fan xuun wunnyikɔ mɛ i lɛ Mawusin na eyɛɖo e. ¹⁶ Aaaa ! I gɔ lɛ Mawusin na Sitefanasié hɛnnu ɔ fe; vɔɔ, yitoma gɔ lɛ Mawusin na mɛlele ma, i gɔ flin e. ¹⁷ Klisu gó ɖo loxlan fan awe lɛ Mawusin na emɛ e; ewɛnɖagbɛ éɖo go loxlan fan na lɛ jla; vɔɔ ama yi inúnyinyɔ gbɛtɔ étɔn é xo lo jla e go nyi etɔnɛ e leɔ, hinhlɔn éxé iku Klisu étɔn ɖo ɖé otinsoga ji ɔ la we nyi inu vɔ́ɔvɔ. ¹⁸ Xonugbo ɔ, ku éxé Klisu ku ɖe otinsogaji éxo ́ɔ, lulunɔ xó emɛ éxé énɔ bu lɛ mɔ́ ló mɔ́ vɔɔ hinhlɔn Mawutɔn ényi na emɛ éxé éɖe hwlɛngan é mɔ ji lɛ. ¹⁹ Inu éxé Mawuxo xoma lɔ́ lɔɔ wée: La su okundó na nunyɔtɔ́ lɛ énunyinyɔ́; la gbɛ inú éxé okunnu mɔjɛ́numɛtɔ lɛ nyɔ́ ɔ. ²⁰ Nɛ inu nyi etɔnɛ ɔ, amu nunyɔtɔ, alo xomasetɔ, alo xolɔdoxogotɔ gbɛmɛ xie tɔn lɛ go kpego lo lɔ? Mawu ɖexlɛfan inu nyinyɔ gbɛmɛ xyetɔn ɔ, ikle jijiɔ ényi ? ²¹ Xonugbo ɔ, zɔn nunyinyɔ éxé gbɔlɛ ɖo ɔ mɛ e go kpego mɔ nyɔMawu ɖé xye inu nyinyɔ nɔ wadɔn ɖe ɔ e. Enɛ wutu élo jɛ Mawu nukun fan eyɛláhwlɛn emɛ éxé éɖinu lɛ gan lo zɔn ewɛn éxé minɔ do éxé gbɛtɔ lɛ mɔ mɔ lomɔ klenɔ xo. ²² Jwifu lɛ byɔ fan nɛ e jlɛnu , ɖo ɖe hinhlɔn xlɛ eyɛ, glɛsinu lɛ mɔ din inunyinyɔ. ²³ Myɛlɛ ɔ KLISU éxé é ka do otinsoga ji ɔ eyi minɔ jlaa: ofɔklɛnnu xo é nyi xo enɛ na Jwifu lɛ, emɛ éxé égo nyi Jwifulɛmɔmɔlo mɔ lulunɔxo. ²⁴ Vɔɔ Klisu ɔ, hinhlɔn Mawu etɔn gɔdo é nunyinyɔ enyi na emɛ éxé Mawu ylɔ lɛ; Jwifu gɔdo Glɛsinulɛ. ²⁵ Ɖo inu éxé e mɔ lo mɔ lulu Mawu etɔn ɔ, inu nyinyɔ éxé éɖe mɛ ɔ, ehugan inunyinyɔ éxé gbɛtɔ lɛ ɖo ɔ; inu éxé emɔ lo mɔ ɖiɖɔ Mawu étɔn ɔ, hinhlɔn éxé éɖo ɔ é hugan éxé gbɛtɔ́ lɛ ɖo ɔ. ²⁶ Nɔvi lɛ, mi mɔ fan ɖé gbɛtɔ e mɔ ji ɔ, , mi mɔ fan inunyɔtɔ go nɛmu lele góɖe mɛ éxe Mawu ylɔ lɛ mɛ e ; éxé é ɖo hinhlɔn ɔ nɛ mu lele goɖe mimɛ e ; mɛnɛmu lele gó lɛɖe hɛnnu okuɖéji lɛ mɛ e. ²⁷ Vɔɔ Mawu yi nuéxé gbɛtɔ lɛ mɔ lo mɔ lulu ɔlo ɖo nya nunyɔtɔlɛ , e yi nuéxé gbɛtɔ mɔ lo mɔ ɖiɖɔ ɔ lo do nya emɛ éxé ɖo hinhlɔn lɛ. ²⁸ Inu éxé gbɛtɔ lɛ mɔ lo mɔ inu maɖinuti, nugbɛhɛn nuvɔɔvɔ ɔ Mawu i lo ga inu exe eylɔ ló ylɔ nugɛn ɔ. ²⁹ Eɖe etɔnɛ ɔ mɛti go kpego wa yi ogo ɖé Mawu e owunkɔn e. ³⁰ Vɔɔ Mawu dɔn myɛlɛ gɔdo Klisu Yesu do kpwɛ , mɔ yi loɖo mi nunyinyɔ, losɔn Klisu Yesu jiɔ mi ehwɛ jijɔnɔ ɖe Mawu e wunkɔn ; Mawu ɖe mi dovo zɔn éji; éhwlɛ mi ɖe mi ehwɛ lɛ mɛ zɔn eji. ³¹ Enɛ wutu ɔ, kɛn Mawuxo xoma ɔ lɔ ɖo ɔ: nɛ mɛlele na éɖe ɔ, ni jla ɖo Aklunɔ wutu.