¹ Polo, Silvain, mpe ya Timothée, ala bara ba nzo Nziami Tesalonika ala Nziami tara a biu mpe Mfumu ebiu Yesu klisto. ² Mpe mawama mpe ya oka nvi mafa ala Nziami tara biu mpe ya Mfumu ebiu Yesu klisto maka ya biene ³ Biu le wa matuomo, nsu loleso ala Nziami ndo biene, bana bangua me ba boo kuobu mubo iku ibini, ndobu okuie obiu oke owe nku, mpe likunu li mukara biene lika mukara ibiene ibiene. ⁴ Mubo biu bangako ike le bibi mu kumba mu ndo biene mukara manzo ma Nziami, biu eke lebi tse mukuru obiene mikoo mpe ya okiu biene mpe ya motini ba mi miu biene biu mpe eke lebi mu mando le bui buani mo biene. ⁵ Ki kini ike ibini ki onsiri mando ma yana ma Nziami, ku oto ike bue biene ba limono yana mu bo Mfumu bo Nziami mu mando le muene biene mpari. ⁶ Oke yana ku miu me Nziami ofiri ma mpari ala bo bamuene biene mpari. ⁷ Muli biene bale muemuene mpari le we wunu, biene balike mu ngebe aka biu, nde asa mubo ala Mfumu ebiu Yesu wu oke ongia yu ya batumu bande mu nfu ende. ⁸ Mukara mba yi li lieme, nde ya mpuru ala babu ba yiabi we Nziami mpe ala babu ba kikiu we nsia yi mbue Mfumu ebiu Yesu. ⁹ Bo bamono mpari mpe ya itumu kimpini ki eka ntama ebeno akua Mfumu ba Mfumu bu ba mono we mu biyia mu bise bi me lu luru. ¹⁰ Eka mubo mu ina ayia nde munse leso lini kuko ku motuono bara nde mpe biene eke likiri momaso ma balie biene ala bobaso ba ba kiu, ndobu biene eke lekiu ma balie biene ma le muene biene. ¹¹ Mundo mamana biu eke lesama ina ki eso mundo biene, biu sisiama ndobu Nziami e biene ali yiaba yana mu obiu ali biu onde. Biu lisisami kuobu nde asa ma makiu ma ibini mpe bisia bi okiu ya biya. ¹² Biu lesisiame mubo ndoki kuobu nkumu e Mfumu a biene Yesu ba yi tuono tse mundo e biene, biu lesisiame kuobu biene lika ya matuono tse ala nde, mawama ma Nziami ebiu mpe Mfumu ba Mfumu Yesu-Klisto.