¹ Muli, mu ma mati ntoo ya minsa, bana banguame ba boo, biene like we ya mpiao ebu bo bali kome. ² Kuobu biene bangako liyiabi yana ebu nsu leyia Mfumu Yesu ayia anka mibi. ³ Mu ina ayia nde, oka nvi mpe ya oke, muli mpe mumbalimo mando ma bebe oke bo, eka mpuru mutini mamo ya mukara wu bi bini misuo me oluru, bo baku obara nsa ansi. ⁴ Muli biene, bana banguame ba boo, biene like kabara bake opibi we, kuobu nsu leso likabo anka mibi. ⁵ Kuobu biene bana mpe ya ya muili, biu like bana ba pibi we, mpe ka bana ba ba infuru we. ⁶ Muli, lika la anka babake, muli biene like mpe lika ya makani. ⁷ Kuobu ba lila, balila pibi, baba wu wuru ma, ba wu wini pibi. ⁸ Muli, kuobu biu like bara insui, lika ya makani, like okiu obu mpe ya likunu le biu, mpe lisa insui ki mawama, lisa insui mu maya. ⁹ Kuobu Nziami a liponi ka mukene we, muli ku lebo mawama munzi e Mfumu ebiu Yesu - klisto. ¹⁰ Mpe nde we nfi mundo ebiu, kuobu, lika ebu biu liya ike lika laa, biu lika invui ya nde. ¹¹ Mu mutini eso wu, liyia iwa maluo ibiene ibiene mpe liyia ike ibiene ibiene, mutini lisenasisa. ¹² Biu lilili ala biene, bana nguame ba boo, liyaba yiaba basisa mukara biene mpe ba batita biene mpe bake bakuru ba biene mukara Mfumu mpe baba liluo biene. ¹³ Biu lilie ala biene liya basibu tse ala bo mukara likunu mundo bisia be bo, lika nvi mukara biene. ¹⁴ Biu li lilue, bana bangua me ba boo, libonsu ba basisa mando mabi, libawa nfu ala baba wene anfu, likuru mikoo ala baba lame, likaya okuru mikoo ala bobaso. ^{17 15} likebe muru mumo efiri mambi ala mbuini we, mu mutini eso, liya amumo nsu loleso osa ma mabue ibiene ibiene mpe ala bara ba bakimi. ¹⁶ Lika ya ise tsu loleso. 17 Lisama ntoo yeso lika leme. ¹⁸ Liya tuono mu mando momaso, kuobu like lekunu le Nziami me Yesu-klisto mundo ebiene. ¹⁹ Lika du muru nga insui. ²⁰ Likasa liwiu ala bara babatiu mando ma ewuwa insui. ²¹ Muli li yiata mando momaso, liwu mamake yiana. ²² Lima momaso ma mabi. ²³ Muli Nziami envi aka ya biene yana aka ikuiu ya biene, kuobu insui e biene kieso, muko biene, mpe nduru e biene eka ebu mambi we tie ku eya furu Mfumu ibiu Yesu-klisto. ²⁴ Nde we ebiu biene ake wu ekuiu, mpe nde we kiri. ²⁵ Bana bangua me ba boo, lisama mpe mundo ebiu. ²⁶ Libawa mbuere ala bana banguame bobaso ba boo mpe liba yao munduru mu mukoo wu mubue. ²⁷ Me liwiwi isia inene munzi Mfumu ebu mukana eso wu ba tiao anku bana banguame ba basa. ²⁸ Kuobu mawama ma Mfumu biu Yesu-klisto maka ya biene.