¹ Nsa ya ebu me imba minua mebara mpe mie ba ntumu, muli kiri ebu me likunu bo we, me ya ngu ngo mo ya isa mbuobo too teni li lebei ko ako. ² Nsa yebu me nkei ya likabu lie olie mando ma mafi mu itsui enziami mpe ebu me yiabu mando pia ma ibini mpe ya oyiabu mando iliue, mpe kuobu menkei ya okiu ebu sa nkio malamu mbuo ma ikei ma tsua mbuo nkimi. Muli kiri me likunu we, me nkei muru mpamu. ³ Mpe nsa yebu me ngiu bilo be me pia a la baba wiene bilo, mpe nsa mingiu nduru me ndo ebu ba itsunu mbaa, muli kiri me likunu we, me ki mbio we. ⁴ Likunu ekei okuru mukuo mpe ya osa mbue, likunu esa lika we ya enzimi mpe ami susuo we, nde akei lileni we. ⁵ Mpe akamaa mando mabu mabuani we, nde akei ifu we, nde aya mpuru, mpe aluie we mambi mabara (aluie we bara nkeni). ⁶ Nde akunu we mambi (mando mamabi), muli nde akunu mando ma ibini. ⁷ Likunu akalimbisa momaso nde aka kiu mando mabo. nde a isa mukuo a la boo mpe akuru mukuo ndo e boo. ⁸ Fikunu sa lefa we nsa tsu limo, kiri ebu ani mando ma ifi mu itsui e nziami, ma iluru, kiri ebu eni menua mimi yanu ma iyoo. Kiri ebu eni makani biwi nziami, ma eli mua (ma lolimu). ⁹ Ku obu biu limu yiabi neiami ndamu mpe biu lelie mando ma mafiku itsui nziami ndamu. ¹⁰ Muli mu ina ebu baba wiene mambi bayi mamakei ndamu ndamu ma ifa. ¹¹ Na ekei muana mpio, me ebei anke muana mpio, me efini anka muana mpio mpe me ekei ya makani anka muana mpio. Muli me ya nsiya mukuru, me ya ngio mando mabane ba mpio. ¹² Muli, biu limuene nziami bukome ampi entia, limuene ka puli puli we, muli li mono busu ya bisu. Muli me mu yiabu ndamu, muli ebu me muyiabu mutini nde anka bu nziabi nde. ¹³ Kasi muli, mando maturu makei akimu mukiri ma mayi biu bubue ba impeini: okiu nziami osa mukuo mu nde mpe oka ya likunu, muli ki ilui bunene mu bibi turi ekei likunu.