¹ Lika bu nkuini bame, mutini nki me nkuini e klisto. ² Muli meki elisibu kuobu biene litunu oki me mu bilo biobeso. Me elisisibu kuobu biene liki nzu tsée mu omaru mu obamu mutini eliwi me bio. ³ Muli, me nkuini biene liyiaba ni klisto aki mukuru eboo ndeso mpe boo aki mukuru e mukara, mpe nziame aki mukuru e klisto. ⁴ Boo ndeso esisama too we emumono mando ebu muntsui endo etiu asisabu ka mukuru ende we. ⁵ Mubo mukara ndeso esisama too emumono mando ebu muntsui akuini we tuu asisibu ka mukuru ende we. Ndo ebu nde aki mutini mumo kiri ntu ende bakie. ⁶ Kuobu kiri mukara mumo akuini we obuari tuu mu muntsui, nde kikie ntuu ende. kiri iki bunturu mu mukara okie ntuu ende. Mpe mu otsiri mutsui ende, nde otiu mutsui ende. ⁷ Kuobu boo wa atiu we mutsui ende, ndo ebu nde aki we ekiri nziame mpe likunu le nziame. Ndo ebu mukara aki likunu le boo. ⁸ Ndo ebu boo bamukiri ka mu mbeo e mukara we kuobu mukara ba mukiri mu mbeo e boo. ⁹ Boo, ba mukiri ka mu mukara we. Ndo ebu mura ba mukiri ndo boo. ¹⁰ Mu ndoebu mukara waki ya mutini e bukuru mu mutsui ende, mundo ba banzelu. ¹¹ Ku ebu, munkara nziame, mukara wa akawe oluru boo, nsa boo oluru mukara. ¹² Ndo ebu momaso mpe mukara ayi mu boo, ndonki boo aki mundo mukara. Mpe ilo kio eso eyi oki nziame. ¹³ Linsiri mu biene ba ngako: iki yana mundo mukara osama nziame, mutsui ebuu? ¹⁴ Bara ba lilue we biene mutini ebu boo ebu ani ntuu ende, eki bunturu mundo nde? ¹⁵ Bara ba lilue we biene ebu ni mukara enga ntuu ende, iki likunu le nde? kuobu ntu ende bamuwi anka ntu. ¹⁶ Muli kiri muru mumo akuini ako mintunu mundo eso yi, biu liki we ya mutini mukimi, nsa ka mu manzo ma nziame we. ¹⁷ Muli mu miki mi miluene, me eli sama we. kuobu ina livinu biene, ka mundo mambue we, kuobu mundo ma yana. ¹⁸ Ya tere, me kingiu ebu ina liviu biene manzo ma nziame, iki ani oyeno mukara biene, mpe me liwele mu biba. ¹⁹ Buani ika ya ibui e bara ba baki bakiu ba bayiaba munkara biene. ²⁰ Muli kuobu ibiene ibiene livunu, iki ka bilo ba odia be nziame bi lidiadia biene. ²¹ Ina lidia biene, muru edia bilo be nde ngako nku ebu banike bawu biebo. Wunu ani nza mpe wumuke eyiu anka we ewiri maa. ²² Biene liki manzo we mu owe odia mpe onua? Liyio obiene nzo e nziame mpe tiso obiene babu ilo we? nki me nkuni elilie? Likuini obiene me lisama? Me elisibu we mundo mamana! ²³ Ma eliwi me eki ma ebio me nziami, ni ntumu yesu, nkara mpibi ku batiene nde, wele limpa. ²⁴ Mpe kungue obio likunu, nde ya liulu mpe yalie: « Mama maki nduru eme, maki mundo e biene, lisa mama mu litunu leme.» ²⁵ Mu mutini mumo nde ya wele ilimi kunguele odia mpe ya lie: « ilimi esoki iki ovunu ku oyana munkara maki ma me. Lisa mama ina kio eso ebu biene linua ku litunu me.» ²⁶ Ina kio eso ebu biene lidia limpa kleso mpe biene linua itimi esoki, biene liyalie lintu le nziame ti ntoo oya turu nde. ²⁷ Webu li to nui ilimi e nziame mu mutini we mubi, aka wu muru yiaba nduru mpe maki ma nziame. ²⁸ Mpe muru ya muru amita nde ngako nku, mpe mubo nde adia limpa mpe anua ilimi. ²⁹ Ndo ebu webu eli mpe enui nsa oyiaba muru, ti mpe nui mitunu oki nde ngako. ³⁰ Mundo ebu munkara biene ntini baki ba buu mpe babiele, mpe banike ba biene baleli tuu. ³¹ Muli kiri mu ibiu ibiu litii yana, biu lika we mu mitunu mi oya sama. ³² Muli ina liki biu mu osama ala nziame, biu liki ani liziri, mundo ebu biu balidu we isa mu mukili mu. ³³ Kuobu, bandu bame baba boo mu ibiene biene ina livinu mu odia, lindi o biene babake ya baba kimi. ³⁴ Kiri wu muke ani nza, nde odia a la nde, ndo ebu biene lika vunu mu oko ma mitunu. mpe mu ota mando mamake ebu biene eki linka me, me ewa manzi ma ku eya me.