¹ Ko sɔ Foebe sɔ do asi mɛ na mi nɔ, mia nɔviɔ nyɔnusi, ke nyi odansɔvi le Sankle we cɔci mɛ, ² na mia do kpewu yi le Xwetɔ mɛ. Mi wasi leɖi ke ɛmɛ mimɛ ye nɔ wasi ɖo ha, a bo kpe do e wu le onu bi tu ke we ohyan ke e na ɖo le mia kɔn mɛ. Ɖo e trɔ zun kpedo e wu tɔ na ɛmɛ susu ye kpo bo can agba. ³ Mi do ogbe na Plisili kpo Akilasi, ke nyi bo we bɔdo e wu tɔ vivɛ le odan Yesu Kliso tɔn mɛ, ⁴ ke ye sɔ ye we ɛgbɛ sɔ san ɔvɔ do hlin bo we ɛgbɛ gan. Ko do ɛkpɛ na ye, e ɔn nyi boɖoɖyo hɛn, vɔ cɔci ke hɔn nyi jwifu ye tɔn can. Mi do ogbe na cɔci ke na le ye xwe. ⁵ Mi do ogbe na Epayinɛti ɛmɛ vivɛ tɛ ye, ke na nyi ɛmɛ tantyɛn na Kliso le Azi we oto mɛ. ⁶ Mi do ogbe na Mali, wa odan vivɛ ɖe do mia nu. ⁷ Mi do ogbe na Andronikusi kpo Juniasi, bo we jila ye, kpo bo we bɔ de wu tɔ le ogan kpa mɛ. Ye nyi ɛmɛ vivɛ le ɛmɛ didɔn ye mɛ, ye ke o le Kliso mɛ jɛ unkɔn na. ⁸ Mi do ogbe na Anplyasi ɛmɛ vivɛ tɛ ye le Xwetɔ mɛ. ⁹ Mi do ogbe na Ubin, mia we bɔ do e wu tɔ le Kliso we odan mɛ, kpo Sitacisi, bo we ɛmɛ vivɛ. ¹⁰ Mi do ogbe na Apelɛsi, ɛmɛ ke ye na kafu le Kliso mɛ. Mi do ogbe na ɛmɛ ke le Anisetobulu xwe na. ¹¹ Mi do ogbe na Elodyɔn, bo we jila. Mi do ogbe na ɛmɛ ke na le Nasisi xwe ye na, ke le Xwetɔ mɛ. ¹² Mi do ogbe na Tlifɛnu kpo Tlifozu, ye ke nɔ wa odan vivɛ ɖe le Xwetɔ mɛ. Mi do ogbe na Pɛsidi nyɔnusi ke nyi ɛmɛ vivɛ na, ke wa odan susu le Xwetɔ mɛ. ¹³ Mi do ogbe na Rufusu, ɛmɛ cican le Xwetɔ mɛ, kpo onɔ ke nyi nɛye. ¹⁴ Mi do ogbe na Asinklitu, Flejɔn, Ɛmɛsi, Patrobasi, Ɛmasi, kpo nɔvi nɔ ke le ye kɔn ye. ¹⁵ Mi do ogbe na Filologi kpo juli, Nele kpo nɔviɔ nyɔnusi kpo Olinpu, kpo ɛmɛ mimɛ ke le ye kɔn ye. ¹⁶ Mi do ogbe na mi nɔ niɔ ye kpo osiki na ɛmɛ mimɛ. Kliso we cɔci ye bi o do ogbe na mi nɔ. ¹⁷ Syɛ-ɔ ko do hɔnhlɔn wu mi nɔ, nɔvi ye le Kliso mɛ mi mɔ bu tamɛ sɔn ɛmɛ ke nɔ hɛn mima kpo ɔfɔ klinklɛn, ke nɔ gbɔn do okplan ke mi yi wu. Mi trɔ le ɛtɛ na ye. ¹⁸ Ɖo ɛmɛ emɔ ha tɔn ye hɔn sɛn Kliso, mia we Xwetɔ nɔ, vɔ ɔdɔ ye tɔn wɛ ye sɛn nɔ. Kpodo oxo lilɔ vivi kpo ɛmɛ blɛ ɖu, ye blɛ oji ye tɔn kpo ɛmɛ ma nyɔ ɖe ye. ¹⁹ Ɖo mia we oto nu sise we kpɔndo ewu ni yiɛgbɛ-ɔ bi mɛ. Ko nɔ kpɔn jijwɛ, taŋ do mia wu, vɔ ko jro bio mia nyɔ onu le onu nyɛn wu, vɔ a bo nyi onu man nyɛn tɔ le onu nyinylan mɛ. ²⁰ Fifa we Mawu na kutu legba le mia we ɔfɔ gɔ zanɖe. Fifa mia we Xwetɔ Yesu Kliso tɔn ni nɔ kpo mi. ²¹ Timote, bo we bɔdo e wu tɔ le odan mɛ, do ogbe na mi, Lusiwusi can, Jasɔn kpo Sosipate, bo we jila ye. ²² Blɔ, Tɛtiwusi ke wlan wema ke nɔ, o do ogbe na mi nɔ le xwetɔ mɛ. ²³ Gayiwusi, bo we jonɔ yi tɔ kpo ɛmɛ ke le cɔci ye bi, o do ogbe na mi nɔ. Elasi, oho ji kpɔntɔ oto-ɔ tɔn do ogbe na mi, e mɔ ke nɔvi Kalutusi. ²⁴ Na ɛfɛnu mia we Xwetɔ Yesu Kliso tɔn na nɔ kpo mi mɛ bi! Ami! ²⁵ Syɛ-ɔ na ɛmɛ ke na le ogbe sisɔ ke na na na mi na do nɔ ɖokpo bo we ɛwɛn nyɛn kpodo Mawu we oxo lilɔ Yesu Kliso tɔn do gbɔn ɖiɖe xlɛ onu wiwla ke na ye hin ewu le bibɛ mɛ xoxo, ²⁶ vɔ ke ye va sɔ xlɛ le syɛ e bo ze gbɔn onu winwlan oxolɔɖonyi tɔn gbɔn osɛn Mawu Mavɔ mavɔ tɔn, na oto nu sise xɔse tɔn le ɛmɛ ke hɔn nyi Jwifutɔ ye mɛ. ²⁷ Mawu tɔn ɖoɖio tɔn wɛ nyi onu nyinyɔ, gbɔdo Yesu Kliso ji, na gigo tɛgbɛ. Ami.