¹ Pɔlu, odansɔvi Yesu Kliso tɔn, ke ye yɔ na nyi ɛmɛ didɔn, ke ye ɖe dovo na Mawu xo jijra tɔ. ² Ɛŋɛn nywɛn ke we onu gbe wɛ ye do na mi va yi gbɔn oxolɔɖenyi tɔ ye ji gbɔn winwlan kinkɔn mɛ. ³ Sɔn ovi yi tɔn wu, ke na ye ji sɔn Davidi we okunkan mɛ gbɔn gbaza mɛ. ⁴ Yesu wɛ ye sɔ do ɖo ovi Mawu tɔn sɔ gbɔn do gbigbɔ kinkwɛn ji, gbɔn do fɔn sɔn okuYesu kliso mia we Xwetɔ tɔn mɛ. ⁵ Sɔ gbɔn do e ji-ɔ, mi yi ɛfɛnu kpo odan do asi a do nyi oto nu setɔ na yisetɔn le oto gun unkundan ji tɔn ye mɛ, do yi we nyikɔ wu. ⁶ Le oto gun xin ye mɛ, ye yɔ mi na mia do nyi Yesu Kliso tɔn. ⁷ Na ɛmɛ bi ke le Hloma, owannyi na nɔ Mawu tɔn ye, kpo ke ye yɔ na ye a nyi ɛmɛ kinkwɛn. Na ɛfɛnu kpo fifa sɔn Mawu otɔ mia tɔn kpo Xwetɔ Yesu Kliso tɔn a nɔ kpo mi. ⁸ Jɛ ŋkɔn, ko do ɛkpɛ na Mawu tɛ ye na mi gbɔn Yesu Kliso ji, ɖo yise mia tɔn egba kpe ɛgbɛ-ɔ mɛ. ⁹ Ɖo Mawu nyi bo we kunu ɖe tɔ, ɛmɛ ke ko sɛn nɔ le bo we gbigbɔ mɛ le ovi yi tɔn we ɛwin nyɛn mɛ, nɔ do flin mi nɔ tɛ gbɛ. ¹⁰ Ko nɔ biɔ le ɛɖɛ tɛ ye mɛ nɔ bio ma ɖo mɔnu kpinkpɔn a bo kpewu a va mia kɔn gbɔn ojro Mawu tɔn mɛ. ¹¹ Ɖo ko jro na kpɔn mi, a do kpewu sɔ onu nina gbigbɔ mɛ tɔn ɖe sɔ na mi, na mia do syɛnxu. ¹² I wɛ nyi bio mia do ɖo hɔnhlɔn gbɔn do mi nɔnyɔ ye we yise mɛ; mia tɔn kpo tɛ ye kpo. ¹³ Syɛ-ɔ, kɔn jro na mia yɔn mia nɔviɔ ye, ko jro na va kpɔn mi zɔn nɛ mu ɖe, vɔ ye xɛ omɔ na gbun do va jɛ syɛ. Ko jro nɔ na ma do kpɔn sinsɛn ɖe ye le mia mɛ ɖi ɛmɛ ke drɔn le ma xɔse tɔ ye mɛ. ¹⁴ Ko ɖu ɔxɔ do Glɛki kpo jonɔ ye, do dan onu nyɛn tɔ ye kpo ma nyɛn tɔ ye. ¹⁵ Emɔ ha, ke kan bo can, ko le ogbe sisɔ na do jra ɛwɛn nyɛn , na mi ɛmɛ ke le Hloma ye. ¹⁶ Ɖo oŋu hɔn nɔ kpyɔn do ɛyɛn nyɛn wu. Ɖo Mawu we hɔnhlɔn wɛ e nyi na hlɛn gan ɛmɛ bi ke kan do e ji, tantyɛn bɛ sɔ Jwifu ye ji, gbun do jɛ Glɛki ye ji. ¹⁷ Ɖo yi mɛ wɛ ye ɖe Mawu we jijwɛ nyinyi sɔ xlɛ gbɔn yise le yise mɛ ɖi ke e le winwlan ɖo ha:« Ɛmɛ jijwɛ na nɔ ɛgbɛ gbɔn yise mɛ.» ¹⁸ Ɖo Mawu we aɖi ɖe xlɛ sɔn jiŋkunsi ogaɖuxwe do Mawu ma sɔ yɔ Mawu kpo onu majɔ majɔ wiwa ɛmɛ ye tɔn ke na hla oxojɔxo-ɔ. ¹⁹ Ɖo onu ke ye yɔ do Mawu wu e le agban ungba na ye. Ɖo Mawu ɖe sɔ xlɛ ye. ²⁰ Ɖo sɔ ɛgbɛ we ɖiɖo mɛ, onu wiwla Mawu tɔn ye ye jɛ agban ungba ye bo nyɛn gbɔn do Mawu we onu ɖiɖo ye mɛ, ɖo yi we hɔnhlɔn manvo manvo, ɛmɛ nyinyi yi tɔn le gbigbɔ mɛ. ²¹ Yi wɛ dɔn ke ye nyɔ Mawu nyɛn ɖe can, yɔn kafu-i ɖi Mawu ha ye ko do ɛkpɛ ni. Vɔ ye va trɔ zun okle nɔ le ye susu mɛ kpo ye we oji ke hɔn nɔ do ovo gbingbɔn onu ye mɛ ye bo ci vuvlu mɛ. ²² Ye nɔ sɔ ye ɖe sɔ yɔ onu nyɔ tɔ, ye bo trɔ zun okle nɔ. ²³ Ye trɔ gigo Mawu tɔn ke hɔn nɔ gu-ɔ, bo sɔ wasi ɖiɖe xlɛ gbɛtɔ tɔn ke nɔ gu, ohe ye, olan ke nɔ zɔn do ɔfɔ ɛnɛ ji kpo ke nɔ dɔn ye ɖe gbɔn ŋkundan mɛ. ²⁴ Yi wɛ dɔn, Mawu jo ye do onu jijro ke sɔn ye we oji mɛ do makɔn makɔn wu; na ye do ovɔn wu ye nɔnyɔ ye we gbaza. ²⁵ Ye wɛ no ɖɔli Mawu we ocxojɔxo a do sɔ wasi ojo, ye bo nɔ sɛn onu ɖiɖo Mawu tɔn vɔ ye ko nɔ sɛn Mawu ke nyi onu ɖo tɔ ke ye nɔ kafu gbun do yi mavɔ mavɔ. Ami! ²⁶ Do er xin wxu tu-ɔ Mawu sɔ ye sɔ na ye we ojro ke hɔn sɔgbe, ɖo ye syɔ ye ɖɔli ye we ogo dido tete kpo ogodido ke hɔn sɔgbe. ²⁷ E mɔ ha ke, ye we unsuglo ye can jodo ye we ogo dido onyɛn kpo ye syɔ ye do a do wasi ojro ye nɔnyɔ ye tɔn . Unsuglo ye nɔ ɖo oxo kpo ye ɖe ye ke hɔn sɔ gbe, Ye bo nɔ yi le ye ɖe mɛ oto dindɔn ke na sɔgbe kpo onu ke ye wa ye. ²⁸ Ɖi ke na nyɔ kafu Mawu le ye we susu mɛ-ɔ, Mawu sɔ ye sɔ na ye we susu gugu na ye a do wasi onu ke ye hɔn ɖo na wasi. ²⁹ Ye gɔ kpo do majɔ majɔ ye bi, ɛdɛngbo, onu kpɔn jro kpo onu nyinylan. Ye gɔ kpo unbia, ɛmɛ huhu, ojrɛ wiwa, ɛmɛ blɛ ɖu kpo do susu nyinylan. ³⁰ Ye nyi adigbandotɔ, ɛmɛ xolɔtɔ, ɛmɛ nyinylan. Ye nyi okun nylan tɔ, ogu fɔn tɔ, ɛmɛ ɖe kɔ do yi oji tɔ. Ye wɛ no ɖe onu nyinylan wiwa we susu, ye bo nyi oto nu ma se tɔ na ye we aji tɔ ye. ³¹ Ye hɔn ɖo onu nyinyɔn, ye ko ɖo oji ɖiɖe, ye ko nɔ kpɔn dɔnuɖunu na ɛmɛ. ³² Ye nyɔ Mawu we kojo ɖiɖo mɔ le, ye mɛ ke wa onu emɔn ha tɔn nɔ ye ɔ jɛ na oku. Vɔ ye nɔ wasi onu xin ye, ye mɔ nɔ do ɛmɛ ke o wasi nɔ ye ji.