¹ Ke e le e mɔ-ɔ, nɔvi vivɛ tɛ ye, ko jro nɔ vivɛ ɖe bio ma mɔ kpɔn mi, mi ye ke nyi jijwɛ tɛ ye , bo ni xɔlu gba tɛ ye jiɖuɖu tɔn, e mɔ wɛ nɔvi viv€ t€ ye, mi ɖo na nɔ ote gliŋ le Xwetɔ le mɛ. ² Ko ɖe kuku na mi Evodi kpodo Sɛntishi kpo nɔ tun ye ni ɖo ogbe kpɔkpɔ le Xwetɔ mɛ. ³ Yi can ke nyi odan wa tɔn, bo le ogbe ji na-a, ko byɔ we nɔ bio yi mɔ kpe do ye wxu. Do ye kpodo Klemakpoda bo we odan wa tɔ bu ye ke ye we nyikɔ ye wlan do ɛgbɛ we wema mɛ ye, mi bo do fun ahwan do ota na ɛwɛn nywɛn nɔ ⁴ Mi nɔjijwɛ kpinkpɔn mɛ tɛgbɛ le Xwetɔ mɛ, ko mɔ trɔ lwuɛ nɔ ke, mi nɔ jijwɛ kpinkpɔn mɛ. ⁵ Mi nɔ ɖɔ mɛ fa do ɛmɛ ye xeɖeɖe. Xwetɔ gbɔn nɔ zanɖe. ⁶ Mi ka mɔ lo onu nɔ do nu ɖe wu, vɔ le onu bi mɛɔ, mi lɔ onu ke mi kan nɔ na Mawu, gbɔn do kwue fan mɛ kpo kuku ɖiɖe mɛ. Mi bo wasi kpo ɛkpɛ dido. ⁷ E mɔ ha, fifa Mawu tɔn ke le ŋkɔn na ɛgbɛ we zinzin ye xeɖeɖe, na hɛn ayixa mia tɔn ye do ote le Kliso Yesu mɛ. ⁸ Na do yi vivɔ nu, nɔvi ye xɔsetɔ ye, onu ke na nyi oxojɔxo, bo jɛ na sisi, bo sɔgbe, bo mɛn, bo jɛ na owan nyinyi, bo jɛ na bubu, bo jɛŋu, bo jɛ kafu, ni nɔ ayixamɛ na mi. ⁹ Onu ke ko kplan mi ye, onu ke mi yi sɔ kɔn ye, oxo ke ko lɔ na mi bo se ye, kpo do ke na mi kpɔn-ɔ bo bo wasi ye, mi wasi do ye ji. Mawu ke nɔ na fifa ɛmɛ na nɔ kpo mi. ¹⁰ Ko kpɔn jijwɛ taŋu le Xwetɔ mɛ bio onu tɛ ye ke le ayixa mɛ na mi, mi mɔ va jɛ ɖiɖe xlɛ ji hin. Onu tɛ ye le ayixa mɛ na mi fe, vɔ omɔ ke na mi na kpɔn a do ɖe xlɛ-ɔ wɛ mi kan dokpo san. ¹¹ E ko nyi hudo tɛ ye xin don na ko do lɔ e mɔ, ɖo blɔ, ko bo kplan ɖi ye, yi wɛ ke na ko le nɔ jɛŋ na-a. ¹² Ko nyɔ onu ma le ɛmɛ si we ɛgbɛ zinzan. Le onu ye xeɖeɖe mɛ, le ofyɛ ye, ko kplan ɖi ye do ɔlɔ ɖe kpo kpwe ji. Xovɛ ɔn cu nɔ-o, xovɛ cu nɔ, onu su le si ye o, alo onu ɔn le si ye o! ¹³ Ko kpe onu bi wu do gɔn ɛmɛ ke nɔ do hɔnhlɔnwu nɔ ji. ¹⁴ Gan ke, onu nywɛ wɛ mi wasi bo do do ɔlɔ wu le vivɛ sise tɛ ye mɛ. ¹⁵ Filiputɔ ye mi ye tete mi nyɔ nyɔɖe bio ke ke lɛ le Maseduanu le ogan ke mɛ na ɛwɛn nywɛn jijra tɔɛji agun bu ti ɔn le zɛ gbɔn mia tɔn wu ke nɔ do ɔlɔ wu le onu ke ɖyɛ ɔlɔ mɛ na kpo ke ko mɔ zan we omɔ nu. ¹⁶ Sɔn gan ke mɛ na ko le Tɛsaloniki gbun, wɛ mi o nɔ ɖo onu do dan, zɔnnɛmu-nɛmuɖe. ¹⁷ E ɔn nyi ko do kan onu nina ye do mia si nɔ hwɛn, vɔ onu ke ko kan nɔ wɛ nyi bio-o, ale ke na tɔn sɔn onu ni na mɛ na mi, ni mɔ jɛ e ji nɔ. ¹⁸ Ko kpɔn onu ke mi sɔ ɖo dan xeɖeɖe, syɛ onu su le si ye. Onu ni na moa tɔn ɔn ke Ekpafloditi hɛn va na-a, susu gun bo drɔn. Onu nina ɖi ke celu ke nɔ hwɛn nywɛ ha, bo le ɖi ɔvɔsisan ke Mawu yi e bo jɛŋu ni-i ha. ¹⁹ Mawu tɛ ye can ɖɔkun nɔ ɖaxo wɛ e nyi, onu ye bi ke mi hyan, e na na mi kpo do gigo do gbɔn Kliso yesu ji. ²⁰ Gigo ni nyi Mawu mia tɔ tɔn sɔn mavɔ do yi mavɔ mɛ. Ami ²¹ Mi do ogbe na xɔsetɔ ye bi ke le Kliso Yesu mɛ ye. Nɔvi xɔsetɔ ye ke le bwɛ kpo ye can, do ogbe do dan mi. ²² Xɔsetɔ ye bi o do ogbe do dan mi, vivɛɖe-ɔ ke na le xɔlu ɖaxo Rɔma tɔn we oxwe gbe ye. ²³ Xwetɔ Yesu Kliso we ɛfɛnu ni nɔ kpo mi.