¹ Ko ɖi bio hɔnhlɔn do ɛmɛ mɔ le Kliso mɛ. Ko ɖi bio oji fifa ɖe mɔ nɔ sɔn yi we owan nyinyi mɛ. Ko ɖi bio ɖokpo wiwa si mɔ le Gbigbɔ mɛ . Ko ɖi bio dɔnuɖunu kpo dɔmɛ nywɛ mawu tɔn mɔ le e mɛ. ² Mi sɔ jijwɛ tɛ ye na a bo ɖo susu ɖokpo,, owan nyinyi ɖokpo a bo wasi ɖokpo le gbigbɔ a bo ɖo tito mɛ ɖokpo. ³ Mi ka wa onu ti gbɔn goyiyi alo susu vovo ɖiɖe. Do ɔlɔkpa bu ji-ɔ, kpo ɛmɛ ɖe sɔ hwe kpo, mi sɔ ɛmɛ ɖyɛ ye sɔ xu mi ye tete. ⁴ Mi ka kan mi ye tete we onywɛn vɔ mia nɔviɔ ye tɔn. ⁵ Mi ɖo susu ɖokpo ye ke le Yesu kliso mɛ. ⁶ Yesu le ɖi Mawu ha, vɔ E ko nɔ jrɛ yi ɖe do Mawu wu. ⁷ Na mi na lɔ Yesu nɔ sɔ yi ɖe hwe. E sɔ ɛmɛ kpedewutɔ we ninɔ mɛ san. E bo ɖi gbɛtɔ ye. ⁸ Yesu sɔ yi ɖe hwe bo se tonu gbun bo yi oku mɛ, sɔn oku do yi otisoga ji. ⁹ Yi wɛ dɔn Mawu do kwɛ yi ji xe hunu bo na ŋkɔ ke xo ta na ŋkɔ ye bi. ¹⁰ Mawu wasi e mɔ ha na klita ye bi yi o do ni le jiŋkunsin ye, le ŋkundan ji kpo ŋkundan gɔ. ¹¹ Ogbe ye bi na lɔ bio Yesu Kliso mɛ mɔ nyi Xwetɔ, gbɔn gigo Mawu Otɔ. ¹² Nɔvi wan nyi na nɔ ye, ɖi ke mi ɖo bubu na ɖo le bo we mia mɛ ni nɔ alo bo we godo ɖo, mi mɔ yi eji ote ma tɔ na mia we hwlɛngan sisi mɛ. ¹³ Ɖo Mawu wɛ nɔ na mi ojro kpo wiwasi gbɔ yi we ojro mɛ. ¹⁴ Mi ka wasi onu ti a bo jɛ ɛhwɛ alo a bo hlun nɔ. ¹⁵ Mi zɔn do emɔ ha na mi nyi ɛmɛ le gbeji, ke ye hɔn na kpɔn ŋɖe le e wu. Mawu we vikpɛ ye ke nyɔ na kpɔn oxo a bo lɔ do ye wu. Mi zɔn ɖo e mɔ na mia klin le ɛgbɛ-ɔ mɛ le dodo mɛ ɛmɛ nynyla ye. ¹⁶ Mi nɔ ote gliŋ le ɛgbɛ we oxo ɔ mɛ na Kliso we azan gbe ɔ ma do kpɔn ɛhwɛ jijɔ a do kɔ ɖi ye, gan xin mɛ ɔ ko mɔ hɔn wa odan kpo ko doxeduno vovo . ¹⁷ Na ko sɔ ɖi ye sɔ sanvɔ na mia we xɔse oji ojɔ nɔ ko bo kpɔn jijwɛ kpo mi nɔ. ¹⁸ E mɔ ha ke mi jɔji agba a bo jɔji kpo. ¹⁹ Zanɖe syɛ ɔ ko na sɔ Timɔte sɔ ɖo dan mi na xin mɛ na mia do hɔnhlɔn bo can gan ke mɛ e na va lɔ mia ve oxo ye na. ²⁰ kɔn mɔ ɖo ɛmɛ ɖe ke ɖi yi ha, ke nɔ bu mia we tamɛ nɔ. ²¹ Ɖo ye nɔ kan ye tete tɔn nyɔ nɔ kan Yesu Kliso tɔn. ²² Mi nyɔ kpinkpin mɛ ke le e si, ɖi ke ovi nɔ kpe do otɔ wu ɖo, e mɔ wɛ Timɔte o kpe do wi ye ɖo nɔ le ɛwɛnnywɛ ji jra. ²³ Ko na swɛ ɖodan gan ke mɛ ko na nyɔn kojo ke ye ba va ɖo na nɔ. ²⁴ Vɔ ko ɖo kanɖe ji bio zanɖe bo tete mɔ na va. ²⁵ E mɔ le vivɛ ɖe na ma sɔ Epafroditu. E nyi nɔvi ye kpo bɔde wu tɔ odan mɛ, mɛ ke mi nɔ do ɛwɛn na kpo odansɔtɔ mia tɔn. ²⁶ Gan ke mɛ mi se bio e mɔ hɔn le ozan, e ci dɔnuɖu numɛ bo jro na va yi mia kɔn. ²⁷ E jɔ ɔdɔn gun bo va ku, vɔ Mawu bo hlin gan ɔn nyi iɖo ɖi hɛn e hlɛn gan bo can agba na vivɛ hɔn na do jɛ eji na. ²⁸ Ko le hlɛ do ji na do swɔ ɖodan mi na mia do kpɔn jijwɛ gan ke mɛ e na va-ɔ. ²⁹ Mi yi Epafroditu le Xwetɔ mɛ kpo jijwɛ. Mi xɔ susu ni. ³⁰ Ɖo gbɔn Kliso we odan wu-ɔ wɛ e ba do ku. E sɔ yi we ɛgbɛ sɔ sa do ota na bo wasi onu ke mi hɔn kpewu na wasi na.