¹ E mɔ yi e ji ke mɔn kplan onu le ɛhu to otogun susu bo trɔ to doe, e bo ɖiɛ tɔjihun me bo hinɛnyi. Otogun bo le ago to. ² Yesu bo kplan onu wu ye nɔ bo do olo bo lɔ oxo ke .. ³ Mi se! onu xwatɔ tɔn a do xwa onu. ⁴ Ganke mɛ a e xwa onu nɔ, onu kun ɖe ye jɛ omɔ to, oxe ye bocin ɖu. ⁵ Onun kun ɖe ye jɛ ɛkpin mɛ, ofi ke okɔ ti ɔn le. Onu kun ye wu zɔnɖokpo ɖo yi ogun. ⁶ Vɔ, ke na oxwe zɛ do eji ɔ, e fiɔ ɖo ɔn ɖo okiɔn ti e bo xu. ⁷ Onu kun ɖe ye bo jɛ ɛwun jamɛ, ɛwun jamɛ wu bo vun ble bo tu gbigbɔ do oxo ni e ko kpe wu sin okun ti. ⁸ Onu kun ɖe ye jɛ nyi xo ji bo sin okun bo wɛn, ɖe ye bo sin okun kanɖe kpe, ɖe ye kanɖe ko. ⁹ Yesu bo lɔ bio: «Mɛ ke si na oto le ni se onu!» ¹⁰ Ke Yesu tyɛ yi vlo bo ve le zɔ, ɛmɛ ke tɛkpo-e ye kpo onu kplanvi ye tɛkpɔ Yesu bo kan olo-ɔ we gɔn mɛ se wi. ¹¹ E bo ɖo e wu na ye bio:« Ye sɔ Mawu we onu wiwla ye ogaɖu xwe-ɔ tɔn sɔ na mi. Vɔ ɛmɛ gbo kpoe ye ɔ, onu bi we le olo dido mɛ. ¹² Gan hin mɛ na ye kpɔnu, ye kpɔn nu xojɔ xo, vɔ, na ye ko mɔ kpɔn onu nɔ, na ye se ɔ ye ko mɔ se nɔ oxo jɔ xo tɔn vɔ na ye a ka mɔ do se yi we gɔnmɛ, yi wɛ na ye na trɔ va yi Mawu kɔn e mɔ sɔ ɔgɔ jijɛ ye tɔn sɔ kɛ ye.╗ ¹³ Yesu bo mɔ yi eji bo lɔ na ye nɔ bio: « Mi hɔn se olo dido ke we gɔnmɛ wɛ? Na de lɛ mi se ɖiɛ ye we gɔnmɛ ɖo? ¹⁴ Onu ha tɔ o ha oxo ɔ nɔ. ¹⁵ Ɛmɛ ɖe ye yi ɛmɛ ke jɛ omɔ to ye, ofi ke ye xwa oxo ɔ do. Na ye se oxo ɔ, legba nɔ va zɔnɖokpo a bo ɖe oxo ɔ le ye mɛ. ¹⁶ Ɛme ɖe ye wɛ nyi onu ke ye xwa do ɛkpin mɛ, ɛmɛ e mɔ xa tɔn ye na ye se oxo ɔ ye nɔ yi kpo jijwɛ kpo. ¹⁷ Ye hɔn ɖo okwɔn ti, ye nɔ do oji viɖe kpɔnŋ wɛ, na vivɛ sise alo ofun ɖe na ɛmɛ sɔn oxo ɔ wu ɔ va, ye nɔ jɛ onyi zɔnɖokpo. ¹⁸ Ɛme ɖe ye wɛ nyi ɛmɛ ke jɛ ɛŋuja mɛ. Ye nɔ se oxo ɔ, ¹⁹ Vɔ ɛgbɛ mɛ bwɛ we tagba, ojo we dɔkun ɖiɖo, kpo onu jijro bubu ye nɔ va bla oxo ɔ, ye ko mɔ nɔ sɛn okun ti. ²⁰ Ɛmɛ kpotwi ye wɛ nyi ɛmɛ ke jɛ nyixo onywɛn ji . Ye nɔ se oxo ɔ, ye nɔ yi a bo sɛn okun, ɛmɛ ɖe ye nɔ sɛn ogban, ɛmɛ ɖe ye kanɖe ko, ɛmɛ bu ye kanwe ko.» ²¹ Yesu bo lɔ na ye bio:« Ɖe mi nɔ tɛ zogbin le xwegbe a bo sɔ ɖo onu gɔ wɛ alo batin gɔ wɛ? Alo mi nɔ sɔ ɖo onu ji. ²² Ɖo onu ti hɔn na nɔ wiwla mɛ ke na ɛmɛ ti hɔn na nyɔ onu wiwla ti ko lɔ na ye nɔ hɔn va do agba hun gba nɔ. ²³ Na oto le na mɛ ɖe na e nɔ do se onu ɔ, ni bo se onu!» ²⁴ Yesu lɔ na ye bio: « Mi kpɔn mia ɖe ji na onu ke mi se nɔ ye, ɖo ojrɛ gban ke mi do jrɛ ɔ ke wɛ ye na do jrɛ na mi, ye mɔ sɔ kpe na mi, ²⁵ ɖo ɛmɛ ke ɖo e mɔ na yi do e ji kpe, ɛmɛ ke hɔn do ye mɔ na yi ke le e si ɔ can.» ²⁶ E bo lɔ ni bio: « Ogba ɖu xwe Mawu tɔn le ɖi onu xwa tɔ ke xwa onu. ²⁷ E nɔ dɔ ɔwlɔn le ozan mɛ gbun a bo va fɔn le kekle nu, onu ke e wa nɔ jɛ a bo hwɛn e ko nɔ nyɔ ke e nɔ zɔn ɖo, ²⁸ Unkundan tete nɔ na okun sisɛn iɖe nu: tantyɛn tɔn otin, kpo ɔlɔ ye kpo okun sisɛn ye . ²⁹ Na okun sisɛn bia vɔ, ye nɔ gbin do ɖeɖe we ogan xo.» ³⁰ Yesu lɔ bio:«Onu ni lɛ mi sɔ oga ɖu xwe Mawu tɔn sɔ jrɛ do? Alo olo dido ni wu a do kpe wu ɖe iwe gɔnmɛ?» ³¹ Ele ɖi ahwa kun ha, na ye xwa vɔ, e nyi okun vitwe ɖe le ɛjinɔnkun ye mɛ le unkundan ji. ³² Vɔ gan ke ɔ, e nɔ jɛ a bo hwin wu gan otin ye bi a bo mɔ ɖo ɔlɔ susu ye ke nɔ na na oxe ye nɔ kpewu nɔ ɖo ɔdɔ do eji a bo mɔ kpɔn fifye itɔn.» ³³ Olo susu ke ye mɛ ɔ, e lɔ oxo ke na ye na ye na a do kpe wu se yi we gɔn mɛ. ³⁴ E ko nɔ lɔ oxo na ye ke na hɔn na do olo, vɔ ke yi ɖoɖio le ɔ, e nɔ ɖe onu bi mɛ na yi we onu kpanvi ye ³⁵ Le gbexin gbe, ke hwedo do ɔ, Yesu lɔ na ye bio:«Mi yi ago ɖyɔ ji» ³⁶ E bo lɛ le otogun ɔ kɔn, onu kplanvi ye bo kun Yesu ɖo Yesu o le otɔjihun ɔ mɛ. Otɔjihun bu ye le blɛ. ³⁷ Jɛhɔn ɖaxo ɖe bo ta xix0o le otɔ ji gbun ɛsin bo ɖyɛ otɔjihun ɔ mɛ gbun bo ba gɔ nɔ. ³⁸ Vɔ Yesu bo le godo na otɔjihun ɔ bo dɔ ɔwlɔn nɔ, Ye bo ve fɔnwɛn nɔ bo lɔ ni nɔ bio:« Onu kplan ɛmɛ tɔ, hɔn kpɔn nlɔ bio mi ba ku nɔ?» ³⁹ Ke Yesu fɔn ɔ E ɖe ogbe do jɛhɔn kpo ɛxu-ɔ:«Bɔ onu! Nɔ ofi ɖokpo!» Jɛhɔn bo ɖo te, oɖa bo ɖo cɛncɛn. ⁴⁰ Yesu bo lɔ na ye bio:«Ŋni lɛ jɔ mi do vo nɔ? Xɔse hɔn le mia si jan wɛ?» ⁴¹ Vivo bo jɛ ye ji ye bo ta li lɔ na ye nɔ ni-ɔn ye bio:«Ɛmɛ ni lɛ nyi mɛ ke? Jɛhɔn nɔ ɖo oto xi ɛxu can bo nɔ se oto nu ni.»