¹ Ke na Jwifu ye we gbɔjwɛ zan va yi vɔ, Malya Madala tɔn, kpodo Malya Salome kpo Jaki onɔ, ye ve xɔ celu hwɛnnyɛ ye, a bo ve hu na Yesu we oco. ² Le kwɛsiɖagbe keklenu dɛɛn nyɔnnusi-ɛ ye yi yɔ gun to, ohwe bo zɛ. ³ Ye bo lɔ le ye ɖe mɛ nɔ bio:« Mɛ lɛ na bli ɛkpɛn ɔ tɛ le yɔ gun ɔ nu na mi?» ⁴ Iwɛ, ye kɔ okɔ kpoŋ bio mɔ na bli ɛkpɛn ɔ tɛ le yɔdo ɔ nu, ɛkpɛn ɔ bo glo taŋ. ⁵ Ke na ye ɖyɛ yɔdo ɔ mɛ, ye kpɔnhwanjevi ɖe, e bo xinnɔnyi le aɖusi mɛ, bo do awu gaga owe ɖe, iwɛ ye titɔ. ⁶ Vɔ e lɔ na ye bio:« Mi ka mɔ vo-o, Yesu Nazalɛti tɔ ke na ye kan do otin soga ji ɔ wɛ mi kan nɔ, e fɔn sɔn oku, ɔn le bwɛ, mi kpɔn ofi ke na ye sɔ oco itɔn sɔ ɖo san xɛn. ⁷ Mi ve lɔ na onu kplanvi itɔn ye lɔ bio: " E na ve tre kpɔn ye le ɖi ke na e lɔ-ɛ ɖo na mi san ha"» ⁸ Ye tɔn bo si bo sɔn yi didyɔn nu le yɔdo-ɔ kɔn. Ye ke lɔ oxo ti na mɛ ɖe, ɖo ye o vo nɔ. ⁹ ke na Yesu fɔn sɔn ɛmɛ kuku ye mɛ le kuɛsiɖagbe keklenu, Malya Madala tɔn ke mɛ e nya gbigbɔ nyinylan acowe le ɔ, wɛ e ze do ŋumɛ na jɛ ŋkɔn. ¹⁰ E bo ve lɔ na ɛmɛ ke kpo Yesu nɔ nɔ kpɔ kpɔ ye san ye. Ɛmɛ xin ye bo fan okoe nɔ bo vi avi nɔ. ¹¹ Vɔ, ke na ye se bio Yesu mɔ le ɛgbɛ ɔ, Malya bo kpɔn-ɛ, ye ɔn kan do e ji. ¹² Le onu xin ye we godo ɔ, Yesu ɖe iɖe sɔ xlɛ onu kplanvi-ɛ bo yi ogleta xwe ɖe mɛ nɔ. ¹³ Ye gbɔn bo va lɔ na ɛmɛ gbo kpwe ye, ye ko kando oxo-ɔ ke na ye can lɔ ji can. ¹⁴ Le vivɔ nu, Yesu ɖe iɖe sɔ xlɛ onu kplanvi weɖokpo ye le gan ke mɛ na ye xin nɔ nyi le ɔkplɔn wu bo ɖu onu nɔ, e bo gbɛ on ju na ye do ma kando eji ye tɔn kpodo oto titri ye tɔn wu, ɖo we ɔn kando oxo ke na ɛmɛ ke na kpɔn-ɛ ye, bo va lɔ bio e mɔ fɔn sɔn oku ye lɔ ji. ¹⁵ Iwe godo e lɔ na ye lɔ bio:« Mi yi ɛgbɛ-ɔ mɛ bi a bo jla ɛwɛn nyɛn na ɛmɛ ye bi. ¹⁶ Ɛmɛ ke na kando eji;, ye mɔ lɛ Mawu sin ni-i, na kpɔn hwlɛngan, vɔ ɛmɛ ke na ɔn kando eji nɔ, ye na do ɛhwɛ ni. ¹⁷ Ŋudandonu ke na kplɔ ɛmɛ ke na kando eji ye do xɛn: le nyikɔ tɛ ye mɛ, ye na do ogbe yoyo ye. ¹⁸ Ye na wle lanvi kpo ɔlɔ kpo, na ye nu onu hu ɛmɛ ɖe, onu ti ɔn wa ye nɔ, ye na ɖo ɔlɔ ota na ɔdɔnnɔ ye, ɔdɔn mɔ gɔ na ye.» ¹⁹ Ke na Xwetɔ Yesu lɔ oxo na ye ɖo-e mɔ vɔ, Mawu ku-ɛ sɔ sin nyi ɛsɛxwue, e bo xinnɔ onyi le aɖusi mɛ ni. ²⁰ Onu kplanvi itɔn ye bo sɔn nyi Mawu xo jla gbe le ofi bi, Xwetɔ bo wa odan kpo ye nɔ, bo ɖo ɛkpɛn oxo-ɔ ji nɔ kpo ŋu dandonu ke na kplɔ oxo-ɔ do nɔ ye.