1 Yesu ɖiɛ otɔjihun mɛ, bo yi ago ɖiɔ ji bo sin oto itɔn mɛ. 2 Ye bo kɔ tɛkunɔ ɖe va nü ke hlɔnnyi le oji inji. Ke yesu kpɔn xɔsé yetɔn, e lɔ ha tɛku-nɔ bio: « Ovi tɛye, do oji, ye sɔ yi we ɔgɔ jijɛ sɔ kɛwe. » 3 Siklibutɔ ɖeye bo lɔ le ye ɖe mɛ nɔ: « Wanje ke o ɖɔ owan nɔ. » 4 Yesu bo nyɔn onu ke le susu ye tɔn mɛ bo lɔ bio « Onu ni jɔ mi ɖo susu nyi nylan le oji miantɔn mɛ e mɔn ha? 5 Onu ni lɛ mɔn le bɔbɔ-ɛ ɖe bio alɔ bio: " ye sɔ yi we ɔgɔ jijɛye sɔ kɛ we" alo alɔ bio cité na zɔn zɔn ún?" 6 Vɔ, na mian do nyɔn-ɛ bio gbetɔ wevi-ɔ mɔn ɖo ɛcɛ le nyixo ji a do sɔ ɔgɔ jijɛ a sɔ kɛ. » Yesu lɔ tɛkunɔ bio « Cité, sɔ oji-in tɔ we a bo sin oxwe gbe. » 7 I we godo, tɛku nɔ bo cité bo sɔn yi oxwegbe. 8 Ke otogun kpɔn ɖo e mɔn, e nyɔn taŋu kpo guigo na Mawu ke sɔ ɛcɛ hin na gbetɔ. 9 Yesu gbon do e hin mɛ, bo kpɔn ɛmɛ ɖe ke ye nɔ yɔ bio Matye ke le bilo ke mɛ taku-ɛ jɔ tɔ ye le. Yesu bo lɔ ni bio « xodo. » Matye bo cité bo xo doe. 10 Yesu hin nɛ nyi le oxwe ɖegbe a do ɖu onu; mian kpɔn kpoŋu-ɔ taku-ɛ jɔtɔ susu ye kpo ɛmɛ ke nɔ zan ɛgbɛ nyin nyla ye va ɖu onu kpo yesu kpo yesu we onukplanviye. 11 Ke falizitɔ ye kpɔn ɖo e mɔn ha, ye lɔ na yesu we onukplanviye: « Uni lɛ jɔ na onukplan ɛmɛtɔ mian tɔn o ɖu onu nɔ kpo taku-ɛ jɔtɔye kpo ɛmɛ ke nɔ zan ɛgbɛ nyi nylan ye nɔ? » 12 Ke yesu sé emɔn, e lɔ bio: « Ɛmɛ ke le zan ɔn mɔn ɖo ohian na ɔdɔn gɔ na ɛmɛ tɔ, ɛmɛ ke ɔn le zan ye ɖoɖio wɛ hian na ɔdɔn gɔ na ɛmɛ tɔ. 13 Mi ve ɖe oxo ke we gɔnmɛ na ɛmɛye: "Ko nɔ kpɔn jijɔ-ɛ do dɔmɛ nyinyɔn wu hu gan wu ɔvɔ sin san." Ɖo ko va na ɔgɔ jɛ tɔye a do kpɔn wlin gan, ɔn nyi na ɛmɛ jijɔ ye a do trɔ jimɛ wɛn. » 14 Kpoŋu-ɔ jan we onukplanviye va yesu kɔn bo lɔ nü bio: « Uni lɛ jɔ, miye kpo falizitɔye mi nɔ bla onu eji eji, vɔ onukplanvi tɔwe ye ɔn nɔ wasi-ɔ? » 15 Yeso bo lɔ na ye bio: « Ɛmɛ ke ye kpe na ɔlɔ wiwle na va kpewu na nɔ dɔŋuɖu mɛ na mɛ ke wle ɔlɔ nɔ le ye kɔn-ɔn? Vɔ azanye gbon nɔ ke na ɔlɔ wlé tɔ na sɔn, ele emɔn, ɛmɛ kpikpeye bo na bla onu. 16 Ɛmɛ ɖe ɔn nɔ sɔ ɔvɔ yoyo do jla xixo ɖo; ɖo yoyo-ɔ na dɔn xixo-ɔ, vun-vun-ɔ mɔn na glo do eji kpe. 17 Ye ɔn nɔ kɔn ɛdéhan yoyo do kɔkpo lɔba-nɔ xixo mɛ, na ye wasi e mɔn, kɔkpo lɔbanɔ nɔ gba. Ɛɖéhan yoyo wɛ ye nɔ kɔn do kɔkpo lɔbanɔ yoyo mɛ, gan hin mɛ ɔweye nɔ nɔ kpɔ-kpɔ. » 18 Le ganke mɛ na yesu lɔ oxo hinye nɔ, sɔja ga ɖokpo va jɛ klita le ɔkɔn mɛ nü bo lɔ bio: « Nyɔnnusivi tɛye ku siɛ, vɔ va ɖo ɔlɔ eji, e na gbɔn va ɛgbɛ. » 19 Yesu bo cité kpo onukplanvi ye kpo. 20 Nyɔnnusi ɖe ke wu ɛhun o gbɔn nɔ sɔn oxwe wevé, gbɔn godo na yesu bo tɔ ɔlɔ ahu itɔn; 21 Ɖo nyɔnnusi-ɔ lɔ nɔ bio « Na kó kpewu tɔ lɔ yesu we ahu, ko na kpɔn ɔdɔn guigɔ. » 22 Yesu bo trɔ godo bo lɔ na nyɔnnusi-ɔ bio: « Viye, doji, xɔsé tɔwe wlin we gan.» Nyɔnnusi-ɔ bo kpɔn ɔdɔn guigɔ zɔnɖokpo-zɔnɖokpo. 23 Ke yesu yi sɔja ga we oxwegbe, e kpɔn onu xo tɔ, ohanjigbɛ ye kpo otogun susu ye ke fan-nɔ hoyo-hoyo, 24 yesu bo lɔ na ye bio mi « va sɔn ɖo nyɔnnusivi-ɔ ɔn ku, vɔ ɔwlɔn wɛ e dɔ. » Vɔ ye kó yeus. 25 Ke ye ɖe togun-ɔn tɔn vɔ, yesu diɛ oxo mɛ bo hɛn ɔlɔ nü, nyɔnnusivi-ɔ bo cité. 26 Ɛmɛye bo ma onu ke jɔ gbɔn kansin-ɔn hele-hele mɛ. 27 Ke yesu lɛ le blɛ-ɔ, unvanɔ ɔwe xo doé. Ye do axwa nɔ bio: « kpɔn dɔŋuɖu nu na mi Davidi we vi! » 28 Ke yesu diɛ oxwegbe, unvanɔye tɛ kpɔ-ɛ. Yesu bo kan ye sé « Mi kan do eji bio ko na kpewu wasi? » Unvanɔye bo ɖo ewu « Ɛe xwetɔ. » 29 Yesu bo tɔ ɔlɔ unkunsi ye tɔn bo bio: « Mi yii leɖé ke xɔsé miantɔn lé ha. » 30 Unkunsin yetɔn bo hun. Yesu bo gbɛ na ye taŋu bio: «ɛmɛ ti ni ka mɔn sé nu ke jɔ. » 31 Vɔ unvanɔ owe ke we unkusin hunye ɖiɛ kansin-ɔ bi mɛ bo jla oxo-ɔ. 32 Ke ɛmɛ ɔwe ye o sɔn nɔ, ye mɔn hin ɔdɔn nɔ ɖe do va na yesu, e ko nɔ lɔ oxo, bo mɔn gɔ kpo gbigbɔ nyanyan. 33 Ke yesu nyan gbigbɔ nyanyan, onu ma kɛ tɔ, ta oxo lilɔ. E kpaca togun-ɔ « ye ɔn kpɔn onu emɔn ha tɔn kpɔn le Izaɛli! » 34 Falizi tɔ ye lɔ nɔ bio: « gbigbɔ nylan kanye we oga wɛ ezan nɔ bo do nyan gbigbɔ nyannyan ye nɔ. » 35 Yesu nɔ gbɔn toxo ye kpo gletaxwe ye. Bo yi ejinɔ, bo kplan onu nɔ gbɔn cɔci xo ye mɛ bo lɔ Mawu we oxo nyɔn-ɛ kpo ogaɖu xwe-ɔ nɔ, bo mɔn gɔ ɔdɔn ye bi nɔ kpo masɔ-masɔ ye bi-nɔ. 36 Ke yesu kpɔn otogun-ɔ e ɖu ɔdɔnunü ɖo ɔgbɔ kpeye ye bo mɔn caka. Ye bo va leɖi lɛngbɔ ke ɔn ɖo kplɔtɔ ha. 37 Yesu bo lɔ na onukplanvi ye: « Odan glo vɔ odan wavi vitueɖe wɛle, ɛle emɔn mi xo ɛɖɛ na xwetɔ ogle-ɔ tɔn, na a sɔ danwavi ɖodan ogle-ɔ ji. 38 [Il manque le verset 38.]