1 Vɔ, Solu gbɛ do vivɛ sise bo gbɛ hu onu kplanvi xwetɔ tɔn ye nɔ, e sɔn yi ɔvɔsantɔ we ga kɔn 2 a do biɔ wema ke na na ogbe wi na a do yi okplityɔnjwxifu ye tɔn le Damasi gan wlɔmɛ na e kpɔn nyɔnnusi olo ŋusunglo ke na le kpo ɛmɛ didɔn ye, e mɔ bla ye a bo sɔ ye va yi Jeluzalɛmu. 3 Ke e jɛ mɔ do sɔn nɔ, e kpɔ Damasi, zɔnɖokpo kinklɛn sɔn jiŋukunsin bo klɛn lɛto do-e; 4 e jɛ nyi bo ci ŋukundanmɛ bo se ogbe ɖe olɔ ni nɔ bio:« Solu, Solu, e ni jɔ o do ci ɛtɛ na?» 5 Solu ɖo e wu ni « Mɛ lɛ onyi Xwetɔ?» Xwetɔ ɖo e wu ni:« Ko nyi Yesu ke na o ci ɛtɛ na nɔ 6 vɔ site a bo ɖyɛ oto xo mɛ, ye bo na lɔ onu ke o ɖo na wa na we» 7 Ɛmɛ ke kpo Solu o sɔn nɔ ye ɔ ci ote onu kikɛ bo glpo; ye se ogbe ke lɔ oxo-ɔ vɔ ye ɔn kpɔn ɛmɛ ti 8 Solu site le nyixomɛ, ke e hun ŋukunsin, e mɔ hɔn kpɔn onu nɔ, ye bo hɛn ɔlɔnu ni, bo kploɛdo sin Damasi. 9 E nɔ onu ma kpɔn ma kpɔn onu ma ɖu, ɛsin ma nu na onyi hihɔn ɔtɔn 10 Onu kplanvi ɖe le Damasi ye bo nɔ yo-ɛ bio Ananiasi; Xwetɔ lɔ oxo ni le odro mɛ:« Ananiasi» E bo to-ɔ bio «Xwetɔ bo xɛn.» 11 Xwetɔ bo lɔ ni bio:« Site, a bo yi omɔ ke ye nɔ yɔ bio omɔ jijɔ ji, le Jwida we oxwe gbe, hwanje ɖe sɔn Tasi ye bo nɔ yɔ-ɛ bio Solu kan yi we tase; ɖo e xo ɛɖɛ nɔ 12 ɖo e kpɔn le ŋute gan mɛ ɛmɛ ɖe nɔ nyi Ananiasi e bo dyɛ oxwe ɔ gbe nɔ e bo ɖo ɔlɔ ota ni a bo xo ɛɖɛ ni, na a do kpewu kpɔn o nu.» 13 Vɔ Ananiasi bo lɔ bio:« Xwetɔ ko se ɛmɛ susu lɔ oxo do dahwe ke wu, vivɛ sise ke e nɔ do na oto kinkwɛn tɔwe le Jeluzalɛmu. 14 E yi ɛcɛ le ɔvɔsan tɔ we oga kɔn nɔ do wle ɛmɛ ɖe kpokpoe ke nɔ yɔ nyi kɔ tɔwe.» 15 Vɔ Xwetɔ lɔ ni bio:« Yi onu zizan wɛ e nyi na ko bo cin, a do na mayisenɔn ye a do nyɔ bo we nyi kɔ, na oga ye kpo Izrayɛli we vikpɛ ye can a do nyɔ bo we nyikɔ, 16 ko na xlɛ onu ke na jɔ do e ji do bo we nyikɔ wu.» 17 E mɔ ha, Ananiasi bo yi, e ɖyɛ oxwe-ɔ gbe. E ɖo ɔlɔ ota ni, bo lɔ bio:« Nɔnvi Solu, Xwetɔ Yesu, ke na ze na we le omɔ ji le ke o do gbɔn nɔ, wɛ dɔn do dan na do kpɔn onu a do yi gbigbɔ kinkwɛn we nyinyrɔn.» 18 Le zɔnɖokpo, onu ɖe flɛ le ŋukusin ji na Solu le ɖi ohwe we afan ha, e bo kpɔn onu; e site ye bo nyrɔ-ɛn do ɛsin mɛ; 19 e bo ɖu onu hɔnhlɔn bo va ni, e bo nɔ kpɔ kpɔ kpo Damasi we onu kplanvi ye na azan susu. 20 Sɔn azan xin ye gbe, e tɔ yesu we oxo lilo le okplityɔn ye, bo nɔ lɔ bio he mɔ nyi Mawu we ovi. 21 Ɛmɛ ke na se oxo itɔn nɔ ye e kpaca ye ye bolɔ bio:« Ɔn nyi dahwe ke na nɔ hu ɛmɛ ke nɔ yɔ nyi kɔ xin le Jeluzalɛmu nɔ ye hwɛnnyi ke wɛ? E va bwɛ a do wle ɛmɛ ye sɔ bla a bo sɔ ve na vsantɔ ye we oga.» 22 Vɔ, Solu hɔnhlɔn mɔ jɛ hɔnhlɔn ji ni nɔ, le oxo lilɔ mɛ, Jwifu ke na le Damasi ye, nɔ flu e bo ɖe xlɛ bio Yesu mɛ mɔ nyi Kliso. 23 Le azan susu we godo, Jwifu ye bla ogbe a do hwi. 24 Vɔ, Solu bo se okpa. Ɛmɛ ye bo cɔ toxo-ɔ we agbo ye nɔ, le ozan kpo oklo, a do hwi. 25 I we gbe ɖokpo zanmɛ, onu kplanvi Yesu tɔn ye sɔ Solu do jaxwi ɖe mɛ, bo jɛ do te do ogli kpa godo. 26 Ke na Solu va Jeluzalɛmu, e jɛ gbagba a do ɖyɛ Yesu we onu kplanvi ye mɛ, vɔ ye mɛ bio bo vo-ɛ nɔ, ɖo ye ɔn kando e ji bio e mɔ nyi Yesu we onu kplanvi oxo jɔ xo tɔn. 27 Vɔ Banabasi kple do yi ɛmɛ dindɔn ye kɔn, bo lɔ oxo na ye sɔn kena Solu kpɔnXwetɔ ɖo, kena Xwetɔ lɔ oxo ni le Damasi we omɔ ji ni ɖo. Banabasi bo mɔ lɔ ke na e mɔ jra ɛwɛn nyɛn ɔ le Yesu we nyikɔ mɛ le Damasi kpo kandoji kpo ɖo. 28 Bɛ sɔn gan xin mɛ Solu kpo ye kpo nɔ yi nɔ a bo gbɔn nɔ, le Jeluzalɛmu, e nɔ lɔ oxo nɔ kpo kando e ji kpo le Xwetɔ we nyikɔ mɛ. 29 E bo nɔ lɔ oxo kpo Jwifu ke nɔ do glɛki ogbe ye can, a bo nɔ dɔn onu kpo ye, v yee bo jro na hwi. 30 Kena nɔvi le xɔse mɛ se okpa, ye kplɔ Solu do sin nyi Sezale, bo sɔ-ɛ do dan Taasi. 31 E mɔ ha fifa bo le na agun ye le Jwide, Galile kpo Samali we kansin mɛ bi, ye bo nɔ do ye nɔ niɔ ye nɔ, bo nɔ zan ɛgbɛ le Xwetɔ vivo mɛ nɔ, agun vi ye bo su do e ji nɔ, gbɔn gbigbɔ kinkwɛn we hɔnhlɔn do ɛmɛ mɛ. 32 Ke na Pyɛ o dan gbɔn ofi bi ye nɔ gbe ɖokpo e va yi xɔsetɔ ke le Lide ye kɔn. 33 bo kpɔn dahweɖe ye bo nɔ yɔ-ɛ bio Ene, e ci onyi hihlɔn na oxwe atrotɔn ɖo e kplibɔ. 34 Pyɛ bo lɔ ni bio:« Ene, Yesu Kliso gɔ ɔdɔn na we. Site a bo xa odyɛn tɔ we.» Zɔn ɖokpo e bo site. 35 Lide tɔ ye kpo Sarɔn tɔ ye kpɔ-ɛn bo yi Xwetɔ ji se. 36 Syɛ-ɔ onu kplanvi ɖe le Jɔpe ye bo nɔ yɔ-ɛ bio Tabita, i we gɔnmɛ wɛ yi« Dɔkasi» . Nyɔnusi xi e gɔ kpo do odan wiwa dodan ayanɔn ye de. 37 E va jɛ ɔdɔn bo ku, ke na ye lɛ ɛsin ni vɔ, ye kɔ-ɛ sɔ ve ɖo sanhun ji. 38 Ke Lide we oto kpɔ Jope wu, onu kplanvi ye se bio Pyɛ mɔ le blɛ, ye dɔn ɛmɛ ye do din bo ɖe ku ku ni bio:« Ya wu xo do mi.» 39 Pyɛ site bo xodo ye. Ke e jɛ blɛ-ɔ, ye kple do yi sanhun-ɔ ji okposi ye bo le oco-ɔ kɔn bo vi avi nɔ, bo sɔ awu kpo onu dido ke e wasi na ye le gan ke mɛ na ye le kpɔ kpɔ. 40 Pyɛ ɖe ɛmɛ bitu tɔn le oxɔ mɛ, bo jɛ klita bo xo ɛɖɛ; bo trɔ kɔ kpan oco-ɔ bo lɔ bio:« Tabita, site» E bo hun ŋukunsi, ke e kpɔn Pyɛ e bo xinɔn nyi. 41 Pyɛ bo na ɔlɔ wi bo fwɛn site. E bo yɔ xɔsetɔ ye kpo kposi ye bo sɔɛ sɔ na ye ɛgbɛ gbio. 42 Onu xlɔn gbakpe Jope bi, ɛmɛ susu bo yise do Xwetɔ ji 43 Pyɛ bo nɔ Jope na azan susu le Simɔ oxodanwatɔ kɔn.