¹ Solu yi ogbe na yi we oku. Sɔn gan xin mɛ we ye ta ofun ɖiɖe na cɔci ke le Jeluzalɛmu, mɛ ke ɖo kanɖe ji ye gbado bo si sɔn mɛɖe ye yi Jude, mɛɖe ye yi Samali, ɛmɛdidɔn ye jan wɛ cinyi. ² Ɛmɛ mimɛ ye ve ɖi Etiɛnu bo vi avi do ota ni nɔ. ³ Vɔ Solu bo nɔ wa onu nyinylan do cɔci, e nɔ g ɔn oxwe ye gbe a do bɛ ŋusuglo kpo nyɔnusi do gan kpamɛ. ⁴ Cogan ke xɔsetɔ ye ke jɛ gbe ye ɔ olɔ Mawu we oxo do sɔn nɔ. ⁵ Filipu ɖyɛ Samali we oto mɛ bo jra Kliso na ye nɔ. ⁶ Gan ke mɛ ɛmɛ susu o se nɔ, bo kpɔn nɔ nu ke Filipu o wasi nɔ, ye sɔ susu ye tɔn sɔ ɖo oxo ke e lɔ nɔ ji. ⁷ Ɛmɛ susu bo le ye mɛ ke ɖo gbigbɔ nyinylan, ye bo kpɔn okan tuntun gbigbɔ ye bo nɔ tɔn le ye mɛ an bo do ahwa ɖaho de, emɔ xa ke ɛtɛkunɔ ye kpo tɛnkpo nɔ ye bo kpɔn ɔdɔn gigɔ. ⁸ Jijwɛ ɖaho ɖe bo le otoɔ mɛ. ⁹ Le otoxoɔ mɛ, ŋsunglo ɖe le ye bo nɔ yɔ-ɛ bio Simɔ, ke nɔ wasi majiki, e bo nɔ kpaca Samalitɔ ye e bo nɔ sɔ yi ɖe sɔ yɔ ɛmɛ jɔɛmɛ. ¹⁰ Samalitɔ ye, bɛ sɔn ovi kpɛ vi gbun do jɛ ɛmɛ hwihwɛn ye ji nɔ sɔ bubu ni; ye mɔ lɔ nɔ:« ŋsunglo ke-ɔ mawu we hɔnhlɔn, mɛ ke ye nɔ yɔ bio Mɛhuɔ.» ¹¹ Ye nɔ ɖo oto wi, ɖo edin na e nɔ do sɔ hɔnhlɔn itɔn a do kpaca ɛmɛ ye. ¹² Gan ke mɛ Filipu o lɔ Mawu xo na ye nɔ, ye xɔse, ke kan xɔluɖuxwe Mawu tɔn kpo Yesu Kliso, ye bo wasi nyinnylɔ na ŋsuglo kpo nyɔnusi. ¹³ Simɔ can bo xɔse bo wasi nyinylɔ, i we godo-ɔ Simɔ majiki nɔ hɔn mɔ lɛ le Filipu kɔn e bo kpaca wi nɔ ke e kpɔn ŋdandonu nɔ. ¹⁴ Siɔ, gan ke mɛ ɛmɛ didɔn ke le Jeluzalɛmu ye se bio Samalitɔ ye mɔ yi Mawu xo-ɔ, ye sɔ Pyɛ kpo Jaan ɖo dan ye. ¹⁵ Gan ke mɛ ye va Samali ye fan okwue na ye naye a do kpewu yi gbigbɔ ɖedovo. ¹⁶ Gbun do va blɛ-ɔ gbigbɔ ɖedovo hɔn le ye mɛ ti mɛ nyinylɔn le xwetɔ mɛ wɛ ye wasi. ¹⁷ Pyɛ kpo Jaan ɖo ɔlɔ ota na ye, ye bo yi gbigbɔ ɖedovo. ¹⁸ Gan ke mɛ Simɔ majiki wasi tɔ kpɔn bio ɛmɛ didɔn ye mɔ na Gbigbɔ ɖedovo wu ye gbɔn ɔlɔ ɖo ota mɛ ɔ e na oho wu ye. ¹⁹ E bo lɔ:« Mi na hɔnhlɔn xin wu bo can agba na ko ɖo ɔlɔ ota na mɛ ɖe e mɔ, do yi gbigbɔ ɖedovo. ²⁰ Vɔ Pyɛ yi ogbe ni:« Oho tɔ we ni ku kpo we ɖo o buyi nɔ bio ye mɔ nɔ yi onu nina Mawu tɔn kpo oho.» ²¹ Ɔn ɖo cica ɖe le onu ke mɛ ɖo yi we oji hɔn le Mawu we ŋkɔn. ²² Trɔ jimɛ, a bo fan kwue na xwetɔ na do kpewu sɔ kɛ we le su su nyinylan mɛ. ²³ Ɖi ko kpɔn bio yi mɔ le onu huɛ mɛ vivɛ ɖe mɛ kpo okan ovuɛn tɔn mɛ. ²⁴ Simɔ yi ogbe na ye:« Mi fan okwue na xwetɔ na, na oxo ke mi lɔ xin ye ɔ ti ni ka va e mɛ na.» ²⁵ Gan ke mɛ Pyɛ kpo Jaan ye ɖe kunnu bo lɔ xwetɔ we xo na ye ɔ, ye trɔ yi Jeluzalɛmu, le o mɔ ji ɔ, ye lɔ ɛwɛn nyɔɛn gbɔn ogleto xo mɛ Samalitɔn me. ²⁶ Siɔ, ɛwɛndotɔ Mawu tɔn lɔ na Filipu bio: " Cite a bo yi ɔfɔ gbe na omɔ ke yi Jeluzalɛmu kpo Gaza" ( omɔ ke le Zogbeji). ²⁷ E cite bo yi. Mi kpɔn Etiopi tɔ, enuku ɛmɛ kɔsu le Candasi, xɔlu Etiopi tɔn. I wɛ nɔ kpɔn dɔkun e tɔn bi ji. E yi Jeluzalɛmu do ve sɛn Mawu. ²⁸ E bo trɔ sɔn Jeluzalɛmu bo le osɔ kɛtɛ tɔn mɛ, e hlɛ wema oxolɔɖenyitɔ Ezayi tɔn nɔ. ²⁹ Gbigbɔ lɔ na Filipu:« Yi a bo zɔn kpo kɛtɛ xin. ³⁰ Filipu do xedun bo tɛkpɔɛ, e bo se e hlɛ oxolɔɖenyitɔ Ezayi tɔn nɔ e bo lɔ ni: « O se onu ke o hlɛ nɔ we tɛn mɛ nɔ?» ³¹ Etiopi tɔ yi ogbe ni:« Na ɖe ko na wa a do se yi we gɔmɛ, na mɛɖe hɔn kpe do wi ye?» E ɖe kuku na Filipu bio ni mɔ ɖyɛ kɛkɛ ɔ mɛ. ³² Fi ke e hlɛ na wema nɔ wɛ nyi ke:« Ye kple yi fi ke ye nɔ hu lɛngbɔ le ɖi lɛngbɔ ha, ɖi agbo ke hɔn nɔ lɔ oho do yi ŋkɔn na mɛ ke nɔ xlɛ ofu na ye, ɔn hɔn kɛ onu. ³³ Le iɖe sɔ xue mɛ, ye sɔ yi we kojo ɖiɖo bo sɔ ke. Yi we jiji mɛ ye na va klɔɛ e wu? Ɖo yi we ɛgbɛ ye swuɛ le ŋkundan ji.» ³⁴ Siɛɔ enuku o kan Filipu se nɔ:« Ko ɖe kuku na we mɛ we xo lɛ oxolɔɖenyitɔ o lɔ nɔ? Yi tete wɛ a lo mɛ bu? ³⁵ Filipu yi gbe ni bo tue ji sɔn Ezayi we wema, bo va lɔ Yesu we oxo ni. ³⁶ Ke ye o sɔn nɔ, ye va fi ke otɔ le enuku lɔ:« Kpɔn, ɛsin le buɛ, ŋny na xɛ omɔ na nyinylɔ.» ³⁷ Filipu yi gbe:« Na o xɔse sɔn oji tɔ we mɛ bio Yesu Kliso e na nyi wi wasi. Enuku yi ogbe ni ko xɔse bio Yesu Kliso wɛ nyi Mawu we vi. ³⁸ Etiopi tɔ e lɔ bio ye mɔ ɖo te kɛkɛ ɔ, Filipu kpo enuku bo ɖyɛ ɛsin ɔ mɛ, Filipu bo wasi nyinylɔ ni. ³⁹ Ke ye tɔn le ɛsin ɔ mɛ, gbigbɔ xwetɔ tɔn kɔ Filipu enuku ko mɔ kpɛn kpɔn, vɔ oji o juɛ nɔ le yi we omɔ ji. ⁴⁰ Filipu va Azotu. E gbɔn oto xin ye mɛ bo jra ɛwɛn nyɔɛn gbɔn oto ye mɛ gbun do jɛ Sezale.