1 Le Antyɔcu we agun ji, oxolɔɖenyitɔ kpo onu kplan ɛmɛtɔ ɖe ye lɛ. Ye ɛn nyi ke: Banabasi, Simenyɔ, ke nan ye nan unkɔ wu lɔ bio ɛmɛ xui, Lisiwisi silɛnu tɔn kpo Solu kpo, Manayɛnu ke kpo Elodu hwɛn do kpɔkpɔ. 2 Gbeɖokpo le gankemɛ na ye sɛn xwetɔ nɔn ɔ bo bla onu nɔn, gbigbɔ kinkwɛn lɔ nan ye lɔ bio:« Mi sɔ Banabasi kpo Solu kpo do ovan nan, nan odan ke ko yɔ ye nan.» 3 Iwɛ, ke ye bla onu bo xo ɛɖɛ vɔ ɔ, ye ɖo ɔlɔ ota nan Banabasi kpo Solu kpo, bo jo ye do, ye bo sɔn. 4 Ke na gbigbɔ kinkwɛn dɔn Banabasi kpodo Solu kpo dodan ɔ, ye sin Seleci.Blɛ wɛ ye ɖyɛ otɔjihun mɛ le bo sɔn nyi otɔ dodomɛ we oto ke ye nɔn bio Ciplu. 5 Ke na ye va Salaminu, ye jɛ Mawu we oxo jijla ji ye Jwifu ye we okpli tyɔn ye. Jaan Maki bo xodo ye a do kpedo ye wu. 6 Ye gbɔn otɔ dodomɛ we toxo bi gbun bo ve jɛ Pafosu, blɛ ye ve kpɔn mciki wasi tɔn ɖe, ŋkɔ yitɔn bo nɔn nyi Ba-Yesu, e bo nyi Jwifu. Oxolɔɖenyitɔ ojo kantɔ wɛ e nyi. 7 E bo le ɔgɔ nan oto ɔ mɛ we oga ke ye nɔn nyi Sɛlugisi Polusi, ɛmɛ onu nyɔn tɔ. Ɛmɛ xin ɔ e nyɔ Banabasi kpo Solu ɖ o e jro nan se Mawu we oxo. 8 Vɔ Elimasi:«Ke nyi macki wasi tɔ.» ci ote do ye wu, e jro nan lɛ oko nan oto we oga le yise wu. 9 Vɔ Solu, ke ye mɔn nɔn nyɔ bio Polu, gɔ kpo gbigbɔ ɖedo ovo, e kpɔn ɛn nɔn trululu 10 bo lɔ bio:«Lɔ lɛgba we ovi o gɔ kpo ɛdɛn nylan kpo dɔmɛ nyinylan kpo. O nyi kɛntɔ nan jijɔɛ nyi-nyi bi. Ɔn nan gɔ xwetɔ we omɔn jijɔ gugu? 11 Kpɔn siɛ-ɔ, xwetɔ we ɔlɔ nan jɛ wu we o bo nan va ŋu. Ɔn mɔn nan mɔn kpɔn ohwe nan azan viɖe.» Zɔn ɔkpo ɔ vuvlu do do Elimasi; e bo ta fuflu bo kan ɛmɛ nɔn nan ye a hɛn ɔlɔnu ni. 12 Ke oto ga kpɔn onu ke na jɔ ɔ, e nyi se ɖo onu kpinkplan do xwetɔ ɔ wu ɔ, e kpaca wi. 13 Pɔlu kpodo yi we hadoe ye ɔ ye ɖyɛ otojihun mɛ sɔn Pafosu bo ve jɛ Pɛji le Pamfili we oto mɛ. Vɔ Jaan lɛ le ye kɔn bo trɔ okɔ si Jeluzalɛmu. 14 Pɔlu kpo yiwe hadoe ye ɔ ye lɛ le Pɛji bo va yi Antyɔcu le Pisidi. Blɛ ɔ ye ɖyɛ okple tyɔn le gbɔjɔ ɛ zan gbe bo xinɔn onyi. 15 Ke ye xlɛ osɛn oxolɔɖenyitɔ ye tɔn vɔ, oga okpli tyɔn tɔn e do ɛwɛn dodan ye bio:«Nɔvi ye, nan mi ɖo hɔnhlɔn do ɛmɛ we oxo ɖe nan otogun ɔ, mi lɔɛ.» 16 Pɔlu si ote bo wa ɔlɔ bo lɔ bio:«Izrayɛli we ɛmɛ ye mi mɛ ke nan nɔn do gigo nan Mawu, mi se! 17 Mawu oto Izrayɛli we otogun tɔn e can mia dagbo ɔ ye ye bo ji do eji le ogankemɛ nan ye le Ejiputi we unkundan ji, gbɔn iwe ɔlɔ ke e kɔ yi oji e ɖe ye tɔn. 18 Le oxwe kanɖe, e kpedo ye wu le zogbeji. 19 Le ke e crɔn otogun acowe le Kanan, e sɔ ye we unkundan sɔ nan otogun mia tɔn ye do wasi cinɔn ye tɔn. 20 Onu xinye xeɖeɖe bi ɔ sandi ɛnɛ ota atun e mɔn ha ( 450 ans ). Mawu sɔ kojo ɖotɔ ye na ye, le onu xinye we godo, gbun do jɛ oxolɔɖenyitɔ Samyɛli ji. 21 Iwɛ otogun biɔ xɔlu, Muwu bo sɔ Sawilu sɔ na ye, kisi we vi, ɛmɛ kena sɔn bɛnjamɛ we okun kanmɛ ebo nyi oga na oxwe kande. 22 Do yi do eji Mawu yi xɔluɖuxwe ɔ le esi, bo sɔ Davidi do ɖo oga na ye . Dividi xi wu wɛ mawu lɔ oxo sɔn bio: "ko kpɔn Davidi isayi we ovi ke na nyi ɛmɛ leɖi oji tɛye ha na do wasi onu ke na ko jro na wasi". 23 Sɔn jijimɛvi yi tɔ, Mawu sɔ yi nan ɛmɛ nan Izrayɛli, Yesu, ɖi ke e lɔɛ do nyi ha. 24 Onu ta viva emɛ , le ogankemɛ nan, Jaan tɔ jimɛ titrɔ we ɛwɛn ɔ jijra gbɔxwe Yesu do va. 25 Le gankemɛ nan Jaan kpa odan yi tɔn vɔ ɔ, e lɔ bio:"Mɛ lɛ mi ye mi kpɔn bio ko mɔn nyi? kɔn nyi ɛmɛ e mɔn ha tɔn. Vɔ mi ɖoto wu, le blɔ we godo ɔ ɛmɛ bu mɔn nan va, ɛmɛ xi ke na blɔ kɔn jɛ nan tu ɔfɔ kpa kanye nan." 26 Nɔnviye, Ablaxamu we jijimɛ vi ye kpodo ɛmɛ ke nɔn sɛn Mawu le mia mɛ, miye wɛ hwlɛngan we oxo ke va nan. 27 Ɖo ɛmɛ ke nan le Jeluzalɛmu kpodo ye we oga ye ɔ yɔn nywɛn bio hwlɛngan we ɛwɛn mɛ ye bo zɔn do oxolɔɖenyitɔ ye we oxo ji ke na nyi Saba gbe ke ye do osɛn le. 28 Ke ye ɔn tɛ kpɔn ɛhwɛn jijɔ ti nan do hui ɔ, ye biɔ sɔn Pilati kɔn bio ni mɔn hwi. 29 Ke na onu ye wlan do ewu e va mɛ ɔ, ye ɖe tɛ le oti ɔ jibo sɔɛ sɔ ɖo yɔgun ɖokpo mɛ. 30 Vɔ Mawu fuɛn le ɛmɛ kuku ye mɛ. 31 Ye bo kpɔn ɛn nɔn nan azan susu ɛmɛ ke sɔn Galile bo do yi Jeluzalɛmu kpoe ye. Ɛmɛ xin ye wɛ nyi kunnu ɖe tɔ nan otogun ɔ syɛ. 32 Iwɛdɔn, mi hɛn o nywɛn xi do va nan mi do jɔgbe ke e fyan nan mia dagbɔ ye wu; 33 Mawu wasi do jɔgbe fifyan yitɔn ji nan mi, vikpɛ yitɔn, bo do fɔn Yesu sɔn ɛmɛ kuku ye mɛ. Iwɛdɔn ye wlin ɖe nyi do do Somu ɔwegɔ mɛ bio: 34 "O nyi ovi tɛye, egbe ɔ ko nyi otɔ nan we." Ke ɔ, e fwɛ sɔn ɛmɛ kuku ye mɛ nan olankpo yitɔn ɔn nan do nyɔn ɔ, e lɔ oxo ɖo e le ha:"Ko nan sɔ onu ɖe do ovo kpo donan Davidi tɔn ɖe ye sɔ nan mi." 35 Iwɛdɔn e mɔn lɔ le winwlan bu mɛ bio:"Ɔn ɖe omɔn nan ɛmɛ ɖe do ovo tɔ we ɔn ci yɔdomɛ nɔn. 36 " Ɖo Davidi, ke e sɛn Mawu le jijimɛ itɔn ye mɛ le ɖi ke Mawu jro ɖo ha, e ku, ye ɖi do otɔ ye kɔn olankpo itɔn bo ci yɔdomɛ, 37 Vɔ mɛke nan Mawu fɔn le ɛmɛ kuku ye mɛ olankpo yitɔn ɔ ɔn nyɔn. 38 Mi nywɛn do e mɔn ha nɔnviye bio sɔ gbɔndo hwanje xin ji wɛ ye do lɔ oxo sɔn onu nyinylan mia tɔn we sɔ kɛ wu nan mi. 39 Mɛ ɖekpokpoe ke nan kando eji ɔ e nan kpɔn jijɔ nyi-nyi le onu xinye le nan ye ɔn kpewu nan kpɔn jijɔ nyi-nyi gbɔndo Moyizi we osɛn ye mɛ. 40 Iwɛdɔn, mi cɔ mianɖe, nan oxo ke na oxolɔɖenyitɔ ye lɔ ɔn nan do jɔ do mian ji. 41 "Mi kpɔn, mi mɛ ke na do ovɔn ɛmɛye, ni kpaca do mi , mi mɔn bu; ɖo ko nan wa odan ɖe le zazan mia tɔn ye gbe. Odan ke na mi ɔn ba kando eji nɔn na ye mɔn lɔɛ nan mi can."» 42 Ke Pɔlu kpo Banabasi ba lɛ nɔn ɔ, otogun ɔ ɖe kuku na ye lɔ bio ye mɔn lɔ oxo xi ke le gbɔjɔɛ we azan gbe ke gbɔn nɔn. 43 Le okpli ɔ we godo ɔ, Jwifu ye kpodo ɛmɛ ke nan xodo Jwifuye we osɛn, ye xodo Pɔlu kpo Banabasi. Ye bo lɔ oxo kpo ɛmɛ ke na xodo ye bo do hɔnhlɔn wu ye bio ye mɔn tɛ do Mawu we ɛfɛnu wu. 44 Le gbɔjɔɛ we azangbe ke xodoe ɔ, ɛmɛ susu ye bɔ bo do se xwetɔ we oxo ɔ nɔn. 45 Ke nan Jwifu ye kpɔn ɛmɛ susu ɔ, ye gɔ kpo ɛwu hwan kpo bo lɔ oxo do nu ke na Pɔlu lɔ nɔn wu ye bo zuin nɔn. 46 Vɔ Pɔlu kpo Banabasi kpo mɔn lɔ oxo vivɛɖe bio:«E le dandanmɛ bio ye nan to Mawu we oxo nan mi jɛŋkɔn. I xɛn mi gbɛ bo kpɔn nɔn bio ye mɔn jɛ nan ɛgbɛ manvɔ, miye mi nan si man yise nɔn ye kɔn. 47 Ɖo, e mɔn wɛ xwetɔ sɔ nan mi ɖo bo lɔ bio:"Ko sɔ we nan nyi kinklɛn nan manyise nɔn ye a do hɛn hwlɛngan do yi unkundan we vivɔnu."» 48 Ke na mayise nɔn ye se oxo xinye , oji jɔ ye ye bo kafu Xwetɔ we oxo ɔ. Ɛmɛ ke ye can do nyi nan ɛgbɛ manvɔ ye ɔ bo yise. 49 Xwetɔ we oxo ɔ bo gba kpe oto ɔ bi. 50 Vɔ Jwifuye ye do oto nan nyɔnnusi ke ji na unkunsi le ye kpodo oto ɔ kplɔtɔ ye ye bo fɔn ogun do Pɔlu kpodo Banabasi ji bo yan ye tɔn le oto ɔ mɛ. 51 Vɔ Pɔlu kpodo Banabasi xuxu finzo ke na le ɔfɔ na ye do ye wu. Ye bo sin Ikɔnu we toxo mɛ. 52 Odansɔvi ye bo gɔ kpo jijɔɛ kpodo gbigbɔ ɖe do ovo.